Read tsonga Vafilipiya 4 Bible Online

Vafilipiya 4 - tsonga bible

Vafilipiya 4

¹Hikwalaho, vamakwerhu lava rhandziwaka, lava naveriwaka ngopfu, lava mi nga ku tsaka ka mina, ni harhi ya mina, tiyiselani sweswo eHosini, varhandziwa.

²Ndzi khongotela Efodiya na Sintika leswaku va va ni mianakanyo yin'we eHosini.

³Na wena, nakulorhi wa xiviri, va pfune; vavasati volavo va tirhele Evhangeli na mina, na Klemento, ni van'wana vatirhikulorhi, valavo mavito ya vona ma tsariweke ebukwini ya vutomi.

⁴Titsakeleni eHosini hi masiku; ndzi tlhela ndzi vurisa sweswo, ndzi ri: Titsakelani.

⁵Vunene bya n'wina a bvi tiviwe hi vanhu hinkwavo; Hosi yi kusuhi.

⁶Mi nga tshuki mi kanakana ha nchumu; kambe etimhakeni hinkwato, tivisani ku pfumala ka n'wina eka Xikwembu hi ku khongela, ni ku kombela, mi va mi khensa;

⁷kutani ku rhula ka Xikwembu loku tlurisaka ku twisisa hinkwako, ku ta hlayisa timbilu ta n'wina, ni miehleketo ya n'wina eka Yesu Kriste.

⁸Loko swi ri tano, vamakwerhu, hinkwaswo leswi nga ntiyiso, hinkwaswo leswi sasekeke, hinkwaswo leswi lulameke, hinkwaswo leswi tengeke, hinkwaswo leswi rhandzekaka, hinkwaswo leswi khensiwaka, hinkwaswo leswi nga ni vunene ni ku dzunisiwa, leswo hinkwaswo, mi va mi swi anakanya.

⁹Hikuva mi dyondzile swona, mi swi amukerile, mi swi yingisile, mi swi vonile eka mina; na n'wina swi endleni, kutani Xikwembu xa ku rhula xi ta va na n'wina.

¹⁰Ndzi tsakile ngopfu eHosini hikuva sweswi, mi tlhela mi pfuxeta ku anakanya ka n'wina ku ndzi pfuna; kasi kunene a ma ha anakanya, kambe a mi pfumala mikarhi.

¹¹A ndzi vuri sweswo hi ku pfumala, hikuva ndzi dyondzile ku tsaka hi leswi ndzi nga na swona;

¹²ndzi tiva ku tsongahatiwa, ndzi tiva ni ku tsaleriwa. Hinkwako, ni le matlhelweni hinkwawo, ndzi dyondzile ku xurha ni ku twa ndlala, ku va endzalweni, ni ku va evusiwaneni.

¹³Ndzi nga endla hinkwaswo ha Kriste la ndzi haka matimba.

¹⁴Hambiswiritano, mi endle swinene loko mi ndzi pfunile evusiwaneni bya mina.

¹⁵Na n'wina Vafilipiya, ma swi tiva leswaku eku sunguleni, kuteloko ndzi mi byele Evhangeli, kutani ndzi suka eMakedoniya, a ku vanga na kereke leyi ndzi heke nchumu emhakeni ya ku nyika ni ku amukela, loko mi nga ri n'wina ntsena.

¹⁶Hikuva hambi ndzi ri eTesalonika, mi ndzi rhumerile kan'we ni ra vumbirhi leswi ndzi swi pfumaleke.

¹⁷Swi nga ri leswaku ndzi lava ku nyikiwa, kambe ndzi lava mihandzu leyi nga ta mi talela.

¹⁸Ndzi kumile hinkwaswo, swi ndzi andzele ngopfu; ndzi taleriwe hi ku amukela ha Epafrodito leswi humaka eka n'wina, leswi nga nun'hwela, ni gandzelo leri amukeriwaka hi Xikwembu lexi tsakisiwaka ha rona.

¹⁹Kambe Xikwembu xa mina xi ta mi tatisela hinkwaswo leswi mi swi pfumalaka, hikuva ku fuwa ni ku kwetsima i ka xona, ha Yesu Kriste.

²⁰Sweswi, eka Xikwembu ni Tata wa hina, a ku ve ku twala hi masiku ni masiku, Amen!

²¹Ndzi runguleleni vakwetsimi hinkwavo lava nga eka Yesu Kriste. Vamakwerhu lava ndzi nga na vona va mi rungula.

²²Vakwetsimi hinkwavo va mi rungula, ngopfu lava nga va yindlu ya Khezari.

²³Tintswalo ta Hosi ya hina Yesu Kriste a ti ve ni mimoya ya n'wina.