Read tsonga Vakolosa 2 Bible Online

Vakolosa 2 - tsonga bible

Vakolosa 2

¹Hikuva ndzi rhandza leswaku mi tiva nyimpi leyikulu leyi ndzi mi lwelaka yona, n'wina, ni va Lawodikiya, ni hinkwavo lava nga ka va nga voni mombo wa mina;

²timbilu ta vona ti ta chaveleriwa loko va ri karhi va hlanganisiwa swin'we hi rirhandzu, va nyikiwa ku twisisa loku hetisekeke va ta tiva xihundla xa Xikwembu Tatana ni xa Kriste,

³yeloyi, ku fuwa hinkwako ka vunene ni vutivi swi fihliweke eka yena.

⁴Ndzi mi byela swona, leswaku munhu a nga tshuki a mi kanganyisa hi ku vulavula loku dyelelaka.

⁵Hikuva hambi ndzi nga ri kona hi nyama, hi moya, ndzi na n'wina; kutani ndzi tsakile loko ndzi vona ku lulama ka n'wina, ni ku tiya ka ku pfumela ka n'wina eka Kriste.

⁶Kutani sweswi, kukota leswi mi amukeleke Hosi Yesu Kriste, fambisani xisweswo eka yena;

⁷mi ri karhi mi dzima timitsu eka yena, mi va mi akiwa eka yena, mi tiya eku pfumeleni, hilaha mi dyondzisiweke hakona, mi ri karhi mi kulela kona, mi ri ni ku khensa.

⁸Tilanguteleni leswaku munhu a nga tshuki a mi koka hi filosofi ni mavunwa ya swahava, hi ku landzelela mikhuva ya vanhu ni timhaka to rhanga ta misava, ku nga ri ha Kriste.

⁹Hikuva ku tala ka vukwembu hinkwabyo ku akile eka yena hi miri.

¹⁰Kutani eka yena mi kume ku tala hinkwako, yena a nga nhloko ya vuhosi hinkwabyo ni ya ku fuma hinkwako.

¹¹Na swona, mi yimbisiwile eka yena hi ngoma leyi nga endliwangiki hi mavoko, eku suseni ka miri wa nyama, yi nga ngoma ya Kriste;

¹²mi yimberiwile na yena eku khuvuriweni, na kona, mi tlhela mi pfuxiwa na yena hi ku pfumela matimba ya Xikwembu, lexi nga n'wi pfuxa eku feni.

¹³Kuteloko ma ha ri lava feke evudyohweni bya n'wina, ni le vukhuneni bya nyama ya n'wina, u mi hanyisile swin'we na yena hi ku hi rivalela ku dyoha hinkwako.

¹⁴U hlangurile papila ra nandzu ra milawu leyi hi tengisaka, kutani a ri susa hi ku ri bela exihambanweni;

¹⁵a gumba tihosi ni ku fuma, a swi humesela erivaleni, loko a swi hlurile exihambanweni xolexo.

¹⁶Hikwalaho, munhu a nga tshuki a mi sola emhakeni ya ku dya ni ya ku nwa, hambi ku ri emhakeni ya mikhuvo, ni ya tin'weti letintshwa ni ya Tisavata;

¹⁷swi ri leswi nga ndzhuti wa leswi nga ta ta, kambe miri wa swona i Kriste.

¹⁸Munhu a nga tshuki a mi tekela hakelo hi ku rhandza ka yena, wo nge a swi endla hi ku titsongahata ni ku gandzela tintsumi; a tinghenisa eka leswi a nga swi vonangiki, hi ku tikurisela swahava hi ku anakanya ka nyama ya yena;

¹⁹a nga tikhomeleri hi nhloko leyi, miri hinkwawo wa yona, loko wu hlanganisiwa swinene hi ku hlangana ka swirho swa wona, wu kuma eka yona leswi wu hanyaka ha swona, kutani wu kula hi ku kula loku humaka eka Xikwembu.

²⁰Loko kunene mi file na Kriste hitlhelo ra timhaka ta ku rhanga ta misava, xana ma ha boheriwa yini hi mikhuva kukota leswo ngi ma ha hanyela misava xana?

²¹Loko va ku: “U nga tshuki u dya, u nga tshuki u nantswa, u nga tshuki u khumba”;

²²swi nga leswi yisaka eku boleni, loko swi hundzuluxiwa hi ku ya hi nawu ni ku dyondzisa ka vanhu;

²³kunene swilo leswi, swi nga va ni mpfumawulo wa vutlhari loko va gandzela hi ku tirhandzela, ni ku titsongahata, ni ku ka va nga tsetseleri miri, va nga tilaveri leswi tsakisaka nyama.