Read tsonga Vakolosa 4 Bible Online

Vakolosa 4 - tsonga bible

Vakolosa 4

¹Veni, endlelani malandza ya n'wina hi ku lulama, ni leswi fanelaka, mi ri karhi mi tiva leswaku, na n'wina, mi ni Hosi ematilweni.

²Tiyiselani emikhongelweni, mi hitekela kona hi ku khensa;

³na kona mi hi khongelela, leswaku Xikwembu xi hi pfulela nyangwa ya Rito, hi ta vulavula xihundla xa Kriste, lexi ndzi nga mubohiwa hikwalaho ka xona;

⁴ndzi ta xi vula hi mukhuva lowu ndzi fanelaka ku xi vula ha wona.

⁵Fambani hi ku xiya eka lava nga ehandle, mi ri karhi mi hatlisela mikarhi.

⁶Ku vulavula ka n'wina a ku ve lo kunene hi masiku, ku lungiwe hi munyu, mi ta tiva hi laha mi fanelaka ku hlamula hakona eka un'wana ni un'wana.

⁷Tixiko, makwerhu la rhandziwaka ni nandza la tshembekaka, la khomeke na mina ntirho wa Hosi, u ta mi tivisa hinkwaswo hilaha timhaka ta mina ti tshameke hakona.

⁸Ndza n'wi rhuma eka n'wina hikwalaho, leswaku a ta tiva timhaka ta n'wina, a ta chavelela timbilu ta n'wina,

⁹u na Onesima, makwerhu la tshembekaka ni la rhandzekaka, a nga warikwenu; va ta mi tivisa timhaka hinkwato ta halenu.

¹⁰Aristarko, la bohiweke na mina, wa mi rungula, na Marka, makwa Barnaba, loyi mi lerisiweke timhaka tin'wana hikwalaho ka yena (kutakuloko a ta eka n'wina, n'wi amukeleni).

¹¹Yesu, la vuriwaka Yusto, na yena, wa mi rungula. Valavo hi va ku yimba; kambe hi vona ntsena vatirhikulorhi entirhweni wa ku fuma ka Xikwembu, i vachaveleri eka mina.

¹²Epafra, warikwenu, ni nandza wa Kriste, wa mi rungula; a karhi a mi lwela hi masiku emikhongelweni ya yena, leswaku mi va lava hetisekeke, ni lava kholwaka eku rhandzeni hinkwako ka Xikwembu.

¹³Ndza tiyisa, na mina, leswaku kunene wa mi chivirikela, n'wina, ni va le Lawodikiya, ni va le Hiyerapoli.

¹⁴Luka, n'anga leyi rhandziwaka, na Demasi, va mi rungula.

¹⁵Rungulani vamakwerhu va le Lawodikiya na Nimfa, ni kereke leyi nga endlwini ya yena.

¹⁶Kutakuloko epistola leyi, yi hlayiwile eka rikwenu, mi ta vona leswaku yi hlayiwa ni le kerekeni ya Lawodikiya, kambe na n'wina mi hlaya leyi nga ta ta hi le Lawodikiya.

¹⁷Kutani mi nge eka Arkipo: “Tilangutisele ntirho lowu u wu averiweke hi Hosi, leswaku u wu heta swinene.”

¹⁸Mina Pawulo ndza mi xeweta kwala hi voko ra mina. Anakanyani ku bohiwa ka mina. Tintswalo a ti ve na n'wina.