Read tsonga 1 Vatesalonika 5 Bible Online

1 Vatesalonika 5 - tsonga bible

1 Vatesalonika 5

¹Loko ti ri ta masiku ni mikarhi, a swi hi fanelanga, vamakwerhu, ku mi tsalela.

²Hikuva ma swi tiva swinene, na n'wina, leswaku siku ra Hosi ri ta humelela ri kotisa khamba ra vusiku.

³Hikuva siku va nga ta ku: “Ku rhurile, ku tsakiwile!” Hilaha ku onhaka loku nga languteriwangiki ku nga ta va wela ehenhla, kukota mbeleko loko yi humelela la tikeke, va nga ka va nga poni.

⁴Kambe loko mi ri n'wina vamakwerhu, a mi le munyameni, siku rero ri nga mi weli hi xitshuketo kukotisa khamba.

⁵Hinkwenu mi vana va ku vonakala, mi vana va nhlekanhi; a mi va vusiku, hambi va munyama.

⁶Hikwalaho-ke, hi nga tshuki hi etlela kukota van'wana, kambe a hi hitekeni, hi ri karhi hi tikhoma.

⁷Hikuva lava etlelaka, va etlela nivusiku ni lava pyopyaka, va pyopya nivusiku.

⁸Kambe hina hi nga va nhlekanhi, a hi tihlayiseni, kutani hi ambala xisirhelelo xa xifuva, ku nga ku pfumela ni rirhandzu, hi havaxela ni xihuku xa ku tshemba ku hlayiseka.

⁹Hikuva Xikwembu a xi hi vekelanga ku kariha, kambe ku ri ku hi fuwisa ku hlayiseka hi Hosi ya hina, Yesu Kriste,

¹⁰la hi feleke leswaku, hambi hi hanyanya, hambi hi etlele, hi hanya swin'we na yena.

¹¹Hikwalaho khongotelanani, mi akisana, kukotisa leswi mi swi endlaka.

¹²Ha mi khongela, vamakwerhu, leswaku mi va ni xichavo eka lava nga ni ntirho exikarhi ka n'wina, lava mi risaka eHosini, lava mi tiyisaka;

¹³mi va ni xichavo eka vona ngopfungopfu hi rirhandzu, hikwalaho ka ntirho wa vona. Akisanani swin'we hi ku rhula.

¹⁴Kambe, vamakwerhu, ha mi khongotela, hi ri: Layani lava nga fambiki hi nawu, mi chavelela lava karheleke timbilu, mi tiyisa lava tsaneke, mi va lehisela mbilu hinkwavo.

¹⁵Mi vona leswaku ku nga tshuki ku va na loyi a rihisaka swo biha hi leswo biha; kambe lavani hi masiku leswo saseka eka un'wana ni un'wana exikarhi ka n'wina, ni ka hinkwavo.

¹⁶Tsakani hi masiku.

¹⁷Mi nga rhuteli ku khongela.

¹⁸Etimhakeni hinkwato, mi khensa; hikuva hi swona leswi Xikwembu xi swi rhandzaka, ha Yesu Kriste.

¹⁹Mi nga timi Moya.

²⁰Mi nga sandzi vuprofeta.

²¹Ringani hinkwaswo, mi tiyisela eka leswo saseka.

²²Chavani hinkwaswo leswi fanaka ni leswo biha.

²³Xikwembu xa ku rhula a xi mi basise swinene, xi mi endla lava hetisekeke hinkwenu, leswaku hinkwaswo leswi nga eka n'wina, moya, ni mbilu, ni miri, swi hlayiseriwa ku vuya ka Hosi ya hina, Yesu Kriste, swi basile.

²⁴La mi vitaneke wa tshembeka, u ta swi endla.

²⁵Vamakwerhu, hi khongeleleni.

²⁶Rungulani vamakwavo hinkwavo hi ku ntswontswa loku tengeke.

²⁷Ndza mi khongela hi Hosi leswaku epistola leyi, yi hlayeriwa vamakwerhu hinkwavo.

²⁸Tintswalo ta Hosi ya hina, Yesu Kriste, a ti ve na n'wina.