Read tsonga Yoxuwa 10 Bible Online

Yoxuwa 10 - tsonga bible

Yoxuwa 10

¹Adoni-Sedeke, hosi ya Yerusalema, kuteloko a twile leswaku Yoxuwa a tekile Ayi, a va a wu yirisa, ni leswaku a endlele Ayi ni hosi ya kona kukotisa leswi a endleke Yeriko ni hosi ya kona, ni leswaku vaaki va Gibiyoni a va kumile ku rhula ni Vaisraele, ni leswaku a va ri exikarhi ka vona,

²a chava ngopfungopfu, hikuva Gibiyoni a wu ri muti lowukulu, kukotisa muti wa tihosi, wu tlula Ayi, kambe vavanuna va wona a ti ri tinhenha.

³Kutani Adoni-Sedeke, hosi ya Yerusalema, a rhuma eka Hohamu, hosi ya Hebroni, ni le ka Piramu, hosi ya Yaramutu, ni le ka Yafiya, hosi ya Lakixi, ni ka Debiri, hosi ya Egiloni, a ku eka vona:

⁴Khandziyani eka mina, mi ta ndzi pfuna, hi ta hlasela Gibiyoni, hikuva va twananile na Yoxuwa ni vana va Israele.

⁵Kavaloko tihosi ta ntlhanu ta Vaamori, yi ri hosi ya Yerusalema, ni hosi ya Hebroni, ni hosi ya Yaramutu, ni hosi ya Lakixi, ni hosi ya Egiloni, ti hlengeletana ti khandziya ni tinyimpi ta tona hinkwato, ti ya gova emahlweni ka Gibiyoni ti wu rhendzela.

⁶Kutani vanhu va Gibiyoni va rhuma eka Yoxuwa, emixaxeni ya Giligala, va ku eka yena: “U nga tshiki malandza ya wena, hatlisa u khandziya eka hina, u hi kutsula ni ku hi pfuna, hikuva tihosi hinkwato ta Vaamori, leti akeke entshaveni ti hlengeletanele hina.”

⁷Kavaloko Yoxuwa a suka eGiligala a ri ni vanhu hinkwavo lava hlomeke ni tinhenha hinkwato.

⁸Kutani Yehovha a ku eka Yoxuwa: “U nga va chavi hikuva ndzi va nyiketile emavokweni ya wena, ku nga ka ku nga tiyi ni un'we emahlweni ka wena.”

⁹Kavaloko Yoxuwa a fika kan'we eka vona; a fambile vusiku hinkwabyo loko a suka eGiligala.

¹⁰Kutani Yehovha a va hangalasa emahlweni ka Israele kutani Israele a lwa na vona, a va hlula swinene ekusuhi na Gibiyoni; kutani Israele a va hlongorisa endleleni leyi khandziyaka ya Bet-Horoni, a lwa na vona ku fika eAzeka na Makeda.

¹¹Kutani, kuteloko va ha balekele Israele eku rheleleni ka Bet-Horoni, Yehovha a va nisela hi le tilweni maribye lamakulu ku fika eAzeka, kutani va fa, lava dlayiweke hi maribye lawa ya xihangu a va tlula lava vana va Israele va va dlayeke hi tlhari.

¹²Kavaloko Yoxuwa a vulavula na Yehovha siku Yehovha a nyiketeke Vaamori eka vana va Israele, a ku: “Dyambu, yima ehenhla ka Gibiyoni, na wena n'weti enkoveni wa Ayaloni.”

¹³Kavaloko dyambu ri yima, ni n'weti wu yimisa ku famba ka yona, tiko ri ko ri tirihisela eka valala va rona. A hi timhaka leti tsariweke ebukwini ya La Lulameke xana? Dyambu ri yima etilweni, ri nga hatlisanga ku pela, ku lava ku ringana siku rin'we.

¹⁴A ku vanga na siku kukota siku lero, hambi ku ri emahlweni, hambi ku ri ndzhaku, loko Yehovha a yingisa rito ra munhu; hikuva Yehovha a a lwela Israele.

¹⁵Kutani Yoxuwa a tlhelela emixaxeni, eGiligala, a ri ni Vaisraele hinkwavo.

¹⁶Kutani tihosi leti ta ntlhanu ti baleka, ti ya tumbela ebakweni ra Makeda.

¹⁷Kutani va ya byela Yoxuwa, va ku: “Tihosi leti ta ntlhanu, va ti kumile ti tumbele ebakweni ra Makeda.”

¹⁸Kutani Yoxuwa a ku: “Vumbuluxelani maribye lamakulu enyangweni ya bako, mi veka kona vavanuna ku ti langutela.

¹⁹Loko mi ri n'wina, mi nga yimi, hlongorisani valala va n'wina, mi va pfukela ku lwa hi le ndzhaku; mi nga va pfumeleli ku nghena emitini ya vona, hikuva Yehovha, Xikwembu xa n'wina, u va nyiketile emavokweni ya n'wina.”

²⁰Kuteloko Yoxuwa ni vana va Israele va va hlaserile va ko va va heta, kambe van'wana va balekela emitini ya makhokholo,

²¹tiko hinkwaro ri vuya ka Yoxuwa, emixaxeni, eMakeda ri tsakile; kambe a ku vanga na munhu un'we la hlevaka vana Vaisraele.

²²Kutani Yoxuwa a ku: “Pfulani nyangwa ya bako, mi humesa tihosi leti ta ntlhanu, mi ti tisa eka mina.”

²³Va endlisa sweswo, va ya n'wi humesela ebakweni tihosi leti ta ntlhanu, hosi ya Yerusalema, ni hosi ya Hebroni, ni hosi ya Yaramutu, ni hosi ya Lakixi, ni hosi ya Egiloni.

²⁴Kuteloko va tisile tihosi leti emahlweni ka Yoxuwa, Yoxuwa a hlengeleta vavanuna hinkwavo va Israele, kutani a ku eka tihosi ta vanhu va nyimpi lava fambeke na yena: “Tshinelani mi kandziya hi mikondzo ya n'wina emikolweni ya tihosi leti.” Kutani va tshinelela va kandziya hi mikondzo ya vona emikolweni ya tona.

²⁵Kutani Yoxuwa a ku eka vona: “Mi nga chavi, mi nga tsemeki nhlana, tiyani, mi va ni mbilu, hikuva Yehovha u ta endlela valala va n'wina hinkwavo lava mi lwaka na vona hi sweswo.”

²⁶Endzhaku ka swona, Yoxuwa a ti tlhava, a ti dlaya, kutani a ti hayeka emirhini ya ntlhanu, ti tshama ti hayekiwa emirhini ku fika nimadyambu.

²⁷Kakuloko dyambu ri ya eku peleni, Yoxuwa a lerisa leswaku ti hawuriwa emirhini, ti cukumetiwa ebakweni, laha ti tumbeleke kona; kutani va veka enyangweni ya bako maribye lamakulu, lama nga kona ni namuntlha.

²⁸Hi siku leri, Yoxuwa a teka Makeda, a wu heta hi matlhari, kutani a yirisa hosi ya wona, ni hinkwavo lava hanyaka lava ngi va ri eka wona; a nga tshikanga mubaleki, kambe a endlela hosi ya Makeda kukotisa leswi a endleleke hosi ya Yeriko.

²⁹Yoxuwa ni Vaisraele hinkwavo va suka eMakeda, va ya Libina, a lwa na Libina.

³⁰Kutani Yehovha a wu nyiketa emavokweni ya Israele, wona ni hosi ya wona, kutani a dlaya hi tlhari hinkwaswo leswi hanyaka leswi ngi i swi ri kona, ku nga balekanga munhu, kutani a endlela hosi ya kona kukotisa leswi a endleleke hosi ya Yeriko.

³¹Yoxuwa ni Vaisraele hinkwavo va suka eLibina, kutani va ya eLakixi, va gova emahlweni ka wona, va lwa na wona.

³²Kutani Yehovha a nyiketa Lakixi emavokweni ya Vaisraele kutani hi siku ra vumbirhi a wu teka a dlaya hi tlhari hinkwaswo leswi hanyaka, leswi ngi swi ri eka wona, kukotisa leswi a endleleke Libina.

³³Kavaloko Horamu, hosi ya Gezere, a ya pfuna Lakixi; kambe Yoxuwa a lwa na yena ni tiko ra yena, a va dlaya, ku nga balekanga munhu.

³⁴Yoxuwa ni Vaisraele hinkwavo, va suka eLakixi, va ya eEgiloni, kutani va gova emahlweni ka wona, va lwa na wona.

³⁵Va wu teka hi siku rolero va wu herisa hi tlhari: hi siku leri, va yirisa hinkwaswo leswi hanyaka leswi ngi swi ri eka wona kukotisa leswi va swi endleleke Lakixi.

³⁶Kutani Yoxuwa ni Vaisraele hinkwavo va suka eEgiloni, va ya eHebroni, va lwa na wona,

³⁷va wu teka, kutani va wu heta hi tlhari, ni hosi ya wona, ni miti hinkwayo ya wona, ni leswi hanyaka hinkwaswo leswi ngi swi ri eka wona, a nga tshikangi munhu a baleka, kambe a wu yirisa kukotisa leswi a swi endleleke Egiloni, ni hinkwaswo leswi hanyaka leswi ngi swi ri eka wona.

³⁸Kutani Yoxuwa ni Vaisraele hinkwavo va kongoma eDebiri, va lwa na wona.

³⁹Kutani va wu teka, ni hosi ya kona, ni miti hinkwayo ya wona, va wu heta hi tlhari, kutani va yirisa leswi hanyaka hinkwaswo leswi ngi swi ri ka wona, a nga tshikanga mubaleki hilaha a endleleke Hebroni hakona, kambe a endlela Debiri ni hosi ya kona kukotisa leswi a swi endleleke Libina ni hosi ya kona.

⁴⁰Yoxuwa a hlasela tiko leri hinkwaro etintshaveni ni le dzongeni, ni le tikweni leri nga ehansi, ni le eku rheleleni ka tintshava, ni tihosi hinkwato ta kona, a nga tshikanga mubaleki, kambe a yirisa hinkwaswo leswi hefemulaka, hilaha Yehovha, Xikwembu xa Israele a leriseke hakona.

⁴¹Yoxuwa a hlasela ku suka eKadexe-Bariniya ku ya fika eGaza, ni tiko hinkwaro ra Goxeni ku ya fika eGibiyoni.

⁴²Yoxuwa a teka kan'we tihosi hinkwato ni matiko ya tona, hikuva Yehovha, Xikwembu xa Vaisraele, a a lwela Israele.

⁴³Kutani Yoxuwa ni Vaisraele hinkwavo va tlhelela emixaxeni, eGiligala.