Read tsonga Yoxuwa 11 Bible Online

Yoxuwa 11 - tsonga bible

Yoxuwa 11

¹Yabini, hosi ya Hasoro, kuteloko a yingisile timhaka teto, a rhuma tintsumi eka Yobabu, hosi ya Madona ni ka hosi ya Ximroni, ni ka hosi ya Akixafa,

²ni ka tihosi ta le n'walungwini entshaveni, ni le rivaleni, edzongeni ka Kinereta, ni le tikweni leri nga ehansi, ni le mitsungeni ya Dori, evupeladyambu;

³ni le ka Vakanana va le vuxeni ni vupeladyambu, ni le ka Vaamori, ni le ka Vahiti, ni le ka Vaperesi, ni le ka Vayebusi, entshaveni, ni le ka Vahivhi, ehansi ka Hermoni, ni le tikweni ra Mispa.

⁴Kutani va huma vona, ni tinyimpi hinkwato ta vona, byi ri vunyingi lebyikulu ngopfu, byi fana ni sava leri nga eribuwini ra lwandle va ri ni tihanci, ni tigolonyi leto tala ngopfu.

⁵Tihosi hinkwato leti ti hlengeletana endhawini leyi hlawuriweke, kutani ti ya gova swin'we ekusuhi ni mati ya Meromi, ku ya lwa na Israele.

⁶Yehovha a ku eka Yoxuwa: “U nga tshuki u va chava, hikuva mundzuku, enkarhini lowo, ndzi ta va nyiketa hinkwavo va tlhaviwile emahlweni ka Israele; u ta tsema milenge ya tihanci ta vona, u hisa ni tigolonyi ta vona endzilweni.”

⁷Kavaloko Yoxuwa ni vanhu hinkwavo va yena lava hlomeke, va fika hi nomu lowu eka vona ekusuhi ni mati ya Meromi, kutani va va tshuketa.

⁸Yehovha a va nyiketa emavokweni ya Vaisraele, kutani va va tlhava va va hlongorisa ku ya fika eSidoni lowukulu ni Misrefoto-Mayimi, ni ku fika enkoveni wa Mispa, evuxeni; va lwa na vona, va nga siyi mubaleki ni un'we.

⁹Yoxuwa a va endla hilaha Yehovha a n'wi byeleke hakona: a tsema milenge ya tihanci, a va a hisa tigolonyi ta vona endzilweni.

¹⁰Enkarhini wolowo Yoxuwa a engeta a teka Hasoro, kutani a dlaya hosi ya kona hi tlhari; hikuva khale Hasoro a wu ri ntsindza wa tihosi leti hinkwato.

¹¹Kutani va dlaya hi tlhari hinkwaswo leswi hanyaka leswi ngi swi ri eka wona, a swi yirisa, a ku salangi nchumu eka leswi hefemulaka; kutani a hisa Hasoro hi ndzilo.

¹²Yoxuwa a teka miti hinkwayo ya tihosi leti, ni tihosi hinkwato ta kona a ti yirisa, a ti dlaya hi tlhari, hilaha Muxe, nandza wa Yehovha, a leriseke hakona.

¹³Kambe Yoxuwa a nga hisanga ni wun'we wa miti leyi ngi yi akiwile eswitsungeni, loko wu nga ri Hasoro ntsena, lowu Yoxuwa a nga wu hisa.

¹⁴Vana Vaisraele va avelana xuma hinkwaxo, ni swifuwo swa miti leyi, kambe va dlaya hi tlhari vanhu hinkwavo va ko va va heta kunene va nga siyanga munhu.

¹⁵Hilaha Yehovha a leriseke Muxe, nandza wa yena, hakona, Muxe a lerisa sweswo Yoxuwa, kutani Yoxuwa a endlisa sweswo; a nga siyanga nchumu eka hinkwaswo leswi Yehovha a swi leriseke Muxe.

¹⁶Yoxuwa a teka tiko leri hinkwaro, yi ri ntshava, ni tlhelo ra dzonga hinkwaro, ni misava ya Goxeni, ni tiko leri nga ehansi, ni rivala, ni ntshava ya Israele, ni tiko leri nga ehansi ka yona,

¹⁷ku suka entshaveni ya Ripalo leyi yimeke etlhelo ra Seyira, ku fika eBaali-Gadi, enkoveni wa Lebanoni, ehansi ka ntshava ya Hermoni; a khoma tihosi hinkwato ta kona, a ti dlaya.

¹⁸Yoxuwa a lwa ni tihosi leti hi masiku layo tala.

¹⁹A ku vanga na muti wun'we lowu kombeleke ku rhula eka vana va Israele, loko va nga ri Vahivhi lava akeke eGibiyoni; va teka miti leyi hinkwayo hi ku lwa.

²⁰Hikuva a swi huma ka Yehovha leswi va nonon'hwiseke timbilu ta vona ku lwa na Israele, leswaku a va yirisa va nga kumi tintswalo, kambe a va heta hilaha Yehovha a leriseke Muxe hakona.

²¹Enkarhini wolowo, Yoxuwa a ta, a heta Vaanaka va le ntshaveni ya Hebroni, ni le Debiri, ni le Anabu, ni le ntshaveni hinkwayo ya Yuda, ni le ntshaveni hinkwayo ya Israele; Yoxuwa a va yirisa swin'we ni miti ya vona.

²²A ku salanga Vaanaka etikweni ra vana va Israele va sala ntsena eGaza, na Gati na Axidodo.

²³Yoxuwa a teka tiko hinkwaro hilaha Yehovha a byeleke Muxe hakona, kutani Yoxuwa a ri nyika Israele, yi va ndzhaka ya yena, a nyika nyimba yin'wana ni yin'wana hi ku averiwa ka vona; kutani tiko ri wisa, ri nga vi na ku lwa.