Read tsonga Yoxuwa 22 Bible Online

Yoxuwa 22 - tsonga bible

Yoxuwa 22

¹Kavaloko Yoxuwa a vitana va Rhuveni, ni va Gadi, ni va hafu ya nyimba ya Manase, a ku eka vona:

²“Mi hlayisile hinkwaswo leswi Muxe, nandza wa Yehovha, a mi leriseke swona, kambe mi yingisile rito ra mina etimhakeni hinkwato leti ndzi mi leriseke tona.

³A mi tshikanga vamakwenu hi masiku layo tala lawa, ku fikela namuntlha, kambe mi hlayisile leswi fanelaka ku hlayisiwa, wu ri nawu wa Yehovha, Xikwembu xa n'wina.

⁴Sweswi, Yehovha, Xikwembu xa n'wina, u nyikile vamakwenu ku wisa hilaha a va byeleke hakona: kutani sweswi, tlhelelani mi timukela emitsongeni ya n'wina, etikweni ra rifuwo ra n'wina, leri Muxe, nandza wa Yehovha, a mi nyikeke rona ehase ka Yordani.

⁵Ntsena tilanguteleni swinene, mi endla hi ku lerisa ni nawu lowu Muxe, nandza wa Yehovha, a mi leriseke wona, ni ku rhandza Yehovha, Xikwembu xa n'wina, ni ku famba etindleleni hinkwato ta yena, ni ku hlayisa ku lerisa ka yena, ni ku namarhela yena, ni ku n'wi tirhela hi timbilu hinkwato ta n'wina, ni mimoya hinkwayo ya n'wina.”

⁶Kutani Yoxuwa a va katekisa, a va rhumela ekaya; kutani va timukela emitsongeni ya vona.

⁷Muxe a a nyikile hafu ya nyimba ya Manase tikwanyana eBaxani, kambe Yoxuwa a a nyikile hafu yin'wana ya nyimba ya Manase, tikwanyana halenu ka Yordani, evupeladyambu; kakuloko Yoxuwa a va rhumela emitsongeni ya vona, a va katekisa,

⁸kutani a va byela, a ku: “Mi tlhelela ekaya mi ri ni xuma lexikulu, ni swifuwo leswo tala, ni silivhere, ni nsuku, ni koporo, ni nhumbu, ni tinguvu leto tala ngopfu. Avelanani ni vamakwenu xuma xa valala va n'wina.”

⁹Kavaloko vana va Rhuveni, ni vana va Gadi, ni va hafu ya nyimba ya Manase va timukela, va hambana ni vana va Israele eXilo, etikweni ra Kanana, va timukela etikweni ra Giliyadi, leri nga tiko leri va ri kumeke hi ku lerisa ka Yehovha, hi nomu wa Muxe.

¹⁰Va fika eribuwini ra Yordani leri nga endzilakaneni wa tiko ra Kanana, kutani vana va Rhuveni, ni vana va Gadi, ni va hafu ya nyimba ya Manase, va aka alitari eribuwini ra Yordani, yi nga alitari leyikulu swinene.

¹¹Kavaloko vana va Israele va twa leswaku va ku: “Maswivo! Vana va Rhuveni ni vana va Gadi, ni va hafu ya nyimba ya Manase va akile alitari leyi langutaneke ni tiko ra Kanana, eribuwini ra Yordani, hitlhelo ra vana va Israele.”

¹²Vana va Israele va swi twa, kutani va vitana nhlengeletano hinkwayo ya vana va Israele eXilo, ku ya lwa na vona.

¹³Vana va Israele va rhumela eka vana va Rhuveni, ni ka vana va Gadi, ni ka va hafu ya nyimba ya Manase etikweni ra Giliyadi, Finiyasi, n'wana Eliyazara, muprista,

¹⁴ni tindhuna ta khume, ndhuna yin'we hi nyimba yin'wana ni yin'wana ya tinyimba hinkwato ta Israele; yin'wana ni yin'wana a yi ri hosi ya yindlu yin'wana ya vatata wa vona emavandleni ya Israele.

¹⁵Va ta eka vana va Rhuveni ni ka vana va Gadi, ni ka va hafu ya nyimba ya Manase, etikweni ra Giliyadi, kutani va va byela, va ku:

¹⁶“Nhlengeletano hinkwayo ya Yehovha yi vula sweswo, yi ku: ‘Xana ku dyoha ka n'wina loku mi dyoheleke Xikwembu xa Israele hakona hi kwihi, leswi mi fularhelaka Yehovha namuntlha, mi ri karhi mi tiakela alitari ku pfuka Yehovha namuntlha xana?

¹⁷Xana xidyoho xa Peyori a hi nchumu eka n'wina lexi hi nga siki basisiwaka eka xona ni namuntlha, hambi khombo ri bile nhlengeletano ya Yehova-ke?

¹⁸Kambe n'wina mi fularhela Yehovha namuntlha! Kungakuloko mi pfukela Yehovha namuntlha, mundzuku u ta karihela nhlengeletano hinkwayo ya Israele.

¹⁹Kambe loko tiko ra ndzhaka ya n'wina ri nga tenganga, pelelani etikweni ra ndzhaka ya Yehovha, laha yindlu ya Yehovha yi yimisiweke kona, kutani mi va ni ndzhaka exikarhi ka hina; kambe mi nga tshuki mi pfuka Yehovha, kutani mi nga hambani na hina hi ku tiakela alitari ehandle ka alitari ya Yehovha, Xikwembu xa hina.

²⁰Xana Akani, n'wana Zera, a nga dyohanga emhakeni ya leswo yila? Kutani ku kariha a ku ri ehenhla ka nhlengeletano hinkwayo ya Israele; kambe a nga felangi xidyoho xa yena a ri yena ntsena xana?’ ”

²¹Vana va Rhuveni, ni vana va Gadi ni va hafu ya nyimba ya Manase va hlamula va ku eka tindhuna ta madzanadzana ya Israele:

²²“Xikwembu xa matimba, Xikwembu, Yehovha wa swi tiva, na yena Israele u ta swi tiva! Loko hi endlile sweswo ku pfuka Yehovha ni ku n'wi dyohela, u nga tshuki u hi ponisa namuntlha.

²³Loko hi tiakele alitari ku fularhela Yehovha ni ku humesa tiholokosta ni mihlengo kona, ni ku humesa kona magandzelo ya ku khensa, Yehovha a a ve yena la hi avanyisaka;

²⁴kambe hi swi endlile hi ku chava mhaka yin'wana, hileswaku: Mundzuku vana va n'wina va ta ku eka vana va hina: ‘Xana mhaka ya n'wina hi yihi na Yehovha, Xikwembu xa Israele-ke?

²⁵Hikuva exikarhi ka hina na n'wina, vana va Rhuveni ni vana va Gadi, Yehovha u vekile ndzilakana, a ri Yordani: a mi na ku averiwa na Yehovha!’ Hi mukhuva wolowo vana va n'wina va ta sivela vana va hina ku chava Yehovha.

²⁶Hikwalaho hi nga te: ‘A hi tiakeleni alitari, ku nga ri alitari ya tiholokosta ni ya magandzelo;

²⁷kambe leswaku yi va mbhoni exikarhi ka hina na n'wina, ni le tinxakeni ta hina endzhaku ka hina, leswaku hi tirhela Yehovha emahlweni ka yena hi tiholokosta ta hina, ni timhamba ta hina, ni magandzelo ya ku khensa, ni leswaku vana va n'wina va nga tshuki va byela vana va hina siku rin'wana va ku: “A mi na ku averiwa na Yehovha.” ’

²⁸Kutani hi ku: Kungakuloko siku rin'wana va hi byela sweswo ni vatukulu va hina, hi ta ku eka vona: ‘Langutani xivumbeko xa alitari ya Yehovha leyi vatata wa hina va yi akeleke, yi nga ri ya tiholokosta ni ya magandzelo, kambe leswaku yi va mbhoni exikarhi ka hina na n'wina.’

²⁹A swi ve kule na hina ku pfuka Yehovha ni ku fularhela Yehovha namuntlha hi ku aka alitari ya tiholokosta, ni ya mihlengo, ni ya magandzelo ehandle ka alitari ya Yehovha, Xikwembu xa hina leyi nga emahlweni ka yindlu ya yena.”

³⁰Finiyasi, muprista, ni tindhuna ta nhlengeletano, ni tindhuna ta madzanadzana ya Israele, leti ngi ti ri na yena, va yingisa marito lama vuriwaka hi vana va Rhuveni, ni vana va Gadi, ni vana va Manase, kutani mhaka yi lulama emahlweni ka vona.

³¹Kavaloko Finiyasi, n'wana Eliyazara, muprista, a ku eka vana va Rhuveni, ni ka vana va Gadi, ni ka vana va Manase: “Namuntlha ha tiva leswaku Yehovha u le xikarhi ka hina, leswi mi nga dyohelangiki Yehovha hi mukhuva lowu: Sweswi mi ponisile vana va Israele evokweni ra Yehovha.”

³²Finiyasi, n'wana Eliyazara, muprista, ni tindhuna, va suka eka vana va Rhuveni, ni le ka vana va Gadi, etikweni ra Giliyadi, kutani va tlhelela etikweni ra Kanana, eka vana va Israele va ya va ambela timhaka leti.

³³Timhaka leti ti lulama emahlweni ka vana va Israele, kutani vana va Israele va dzunisa Xikwembu, kambe a va ha kanelangi ku ya lwa na vona, ni ku onha tiko leri vana va Rhuveni ni vana va Gadi va akeke eka rona.

³⁴Vana va Rhuveni ni vana va Gadi va thya alitari vito; hikuva va ku: “Hi yona mbhoni exikarhi ka hina leswaku Yehovha i Xikwembu.”