Read tsonga Yoxuwa 5 Bible Online

Yoxuwa 5 - tsonga bible

Yoxuwa 5

¹Tihosi ta Vaamori leti nga evupeladyambu ka Yordani, ni tihosi hinkwato ta Vakanana leti nga eribuwini ra lwandle, kuteloko ti twile leswaku Yehovha a omisile mati ya Yordani emahlweni ka vana va Israele va ko va pela, timbilu ta tona ti nyuka, ti tsemeka mihlana emahlweni ka vana va Israele.

²Enkarhini wolowo, Yehovha a ku eka Yoxuwa: “Endla mikwana ya maribye, u yimbisa kambe vana va Israele ra vumbirhi.”

³Kavaloko Yoxuwa a endla mikwana ya maribye kutani a yimbisa vana va Israele entsungeni wa Haraloti.

⁴Yoxuwa a va yimbisa hikwalaho ka mhaka leyi: Tiko hinkwaro leri humeke eEgipta, va nga vavanuna lava hlomeke hinkwavo, a va file emananga, endleleni, loko va humile eEgipta;

⁵tiko hinkwaro loko ri hume eEgipta ri yimbisiwile; kambe hinkwavo lava tswariweke emananga, endleleni, loko va humile eEgipta, a va yimbisiwanga.

⁶Hikuva hi malembe ya 40, vana va Israele a va famba emananga, tiko hinkwaro ri ko ri herisiwa, va ri vavanuna lava hlomaka, lava humeke eEgipta, lava nga yingisangiki rito ra Yehovha; hikwalaho, Yehovha u va hlambanyele leswaku va nga ka va nga voni tiko leri Yehovha a hlambanyeleke vatata wa vona ku hi nyika rona, ri nga tiko leri khulukelaka hi ntswamba ni vulombe.

⁷Kutani u vekile vana va vona ematshan'weni ya vona; hi vona lava yimbisiweke hi Yoxuwa, hikuva a va nga yimbanga, leswi va nga yimbisiwangiki endleleni.

⁸Kuteloko va hetile ku yimbisa tiko hinkwaro, va tshama evutshan'weni bya vona, emixaxeni, va ko va hola.

⁹Kutani Yehovha a ku eka Yoxuwa: “Namuntlha ndzi vumbuluxile tingana ta Egipta, ndzi ti susile ehenhla ka n'wina.” Kutani xivandla lexi xi thyiwa Giligala (ku vumbuluxa) ku fika namuntlha.

¹⁰Vana va Israele va dzima mixaxa eGiligala, kutani va endla Paseka hi siku ra 14 ra n'hweti, nimadyambu erivaleni ra Yeriko.

¹¹Hi siku leri tlhandlamaka Paseka va dya mavele ya tiko: xi ri xinkwa lexo kala comela ni tindzhoho leti oxiweke.

¹²Kutani manna yi kala siku leri tlhandlamaka leri va dyeke ha rona mavele ya tiko; vana va Israele a va ha yi kumanga manna, kambe va dya lembe leri, leswi milaka etikweni ra Kanana.

¹³Kuteloko Yoxuwa a ri ekusuhi na Yeriko, a tlakusa mahlo a languta; kutani waswivo, wanuna a a yimile emahlweni ka yena, a ri ni tlhari leri vangamaka evokweni ra yena; Yoxuwa a ya eka yena, a ku: “U wa ka hina xana, kumbe u wa valala va hina?”

¹⁴A hlamula, a ku: “E-e, hikuva ndzi hosi ya nyimpi ya Yehovha; ndza ha ku ta sweswi.” Kavaloko Yoxuwa a korhama ehansi hi mombo wa yena, a khinsama, kutani a ku eka yena: “Xana hosi yanga yi ri yini eka nandza wa yena xana?”

¹⁵Hosi ya nyimpi ya Yehovha yi ku eka Yoxuwa: “Susa tintanghu emilengeni ya wena hikuva ndhawu leyi u yimeke eka yona yi hlawuriwile.” Kutani Yoxuwa a endlisa sweswo.