Read tsonga Yoxuwa 9 Bible Online

Yoxuwa 9 - tsonga bible

Yoxuwa 9

¹Kuteloko tihosi hinkwato leti nga haleno ka Yordani entshaveni, ni le tikweni leri nga ehansi ni le ribuwini hinkwaro ra Lwandle Lerikulu, laha ku langutaneke na Lebanoni, Vahiti, ni Vaamori, ni Vakanana, ni Vaperesi, ni Vahivhi, ni Vayebusi, loko va twile timhaka teto,

²va hlengeletana swin'we hinkwavo, va twanana, ku ya lwa na Yoxuwa na Israele.

³Kambe vaaki va Gibiyoni, kuteloko va twile hilaha Yoxuwa a tirheke hakona na Yeriko na Ayi,

⁴va endla hi vutlhari na vona: va suka va tekile timbuva va ri ni masaka ya khale timbhongolweni ta vona, ni mikwama ya vhinyo ya khale leyi boxiweke, leyi rhungiweke;

⁵emilengeni ya vona, va vehele tintanghu leta khale, leti laperiweke; emirini, va ambele tinguvu leti hlakaleke, ni vuswa hinkwabyo bya timbuva ta vona a byi omile, ma ri mahlanhla ntsena.

⁶Va ya eka Yoxuwa emixaxeni ya Giligala, kutani va ku eka yena ni ka vavanuna va Israele: “Hi pfe etikweni leri nga ekule, hambiswiritano endlani xinakulobye na hina.”

⁷Kutani vanhu va Israele va ku eka Vahivhi lava: “Swimbe mi akile exikarhi ka hina, xana hi nga endlisa ku yini xinakulobye na n'wina xana?”

⁸Kutani va ku eka Yoxuwa: “Hi malandza ya wena.” Yoxuwa a ku eka vona: “Mi va mani, mi huma kwihi-ke?”

⁹Va ku eka yena: “Malandza ya wena ma sukile etikweni leri nga ekule swinene hikwalaho ka vito ra Yehovha, Xikwembu xa wena, hikuva hi yingisile ntwalo wa yena, ni hinkwaswo leswi a swi endleke eEgipta,

¹⁰ni hinkwaswo leswi a swi endleleke tihosi timbirhi ta Vaamori ehase ka Yordani, a nga Sihoni hosi ya Hexiboni, na Ogo, hosi ya Baxani, lava akeke eAxitaroto.

¹¹Kutani vakulukumba ni vaaki hinkwavo va tiko ra hina va ku eka hina: ‘Tekani timbuva ta ndlela, mi ya hlangana na vona, mi ku eka vona: “Hi malandza ya n'wina, kutani sweswi endlani xinakulobye na hina.” ’

¹²Vuswa bya hina hi lebyi hi byi tekeke bya ha hisa etindlwini ta hina loko hi suka ku ta eka n'wina; kutani sweswi, byi omile, i mahlanhla ntsena.

¹³Ni mikwama leyi, hi yi cherile yi ri leyintshwa, sweswi yi boxekile; tinguvu ta hina ni tintanghu ta hina hi leti; ti hlakarile hi ku leha lokukulu ka ndlela.”

¹⁴Kutani vanhu va Israele va pambula timbuva ta vona, kambe va nga vutisanga nomu wa Yehovha.

¹⁵Kavaloko Yoxuwa a twanana na vona, kutani a endla xinakulobye na vona leswaku va ta tshikiwa va hanya, ni tihosi ta nhlengeletano ti va hlambanyela swona.

¹⁶Kuteloko ku hundzile masiku manharhu ana va endlile xinakulobye na vona, va twa leswaku va tshama ekusuhi na vona, ni leswaku va akile exikarhi ka vona.

¹⁷Kavaloko vana va Israele va suka va famba, kutani siku ra vunharhu va fika emitini ya vona; miti ya vona a wu ri Gibiyoni, na Kefira, na Beroto na Kiriyata-Yeyarimi.

¹⁸Kambe vana va Israele a va lwanga na vona hikuva tihosi ta nhlengeletano ti va hlambanyele hi vito ra Yehovha, Xikwembu xa Israele; kambe nhlengeletano hinkwayo yi dzumadzumela tihosi.

¹⁹Kutani tihosi ti ku eka nhlengeletano hinkwayo: “Hi va hlambanyele hi vito ra Yehovha, Xikwembu xa Israele kutani sweswi hi nga ka hi nga va endli nchumu.

²⁰Hi ta endlisa sweswo na vona: Hi ta va tshika va hanya leswaku hi nga tshuki hi kariheriwa hikwalaho ka leswi hi va hlambanyeleke.”

²¹Kutani tihosi ti ku eka vona: “Va ta hanya.” Kutani va va vapandzeri va tihunyi, ni vaki va mati va nhlengeletano hinkwayo, hi laha tihosi ti va byeleke hakona.

²²Kutani Yoxuwa a va vita, a va byela, a ku: “Xana mi hi xisele yini loko mi te: ‘Hi akile ekule na n'wina,’ kasi mi akile exikarhi ka hina?

²³Sweswi, mi rhuketeriwile; mi nga ka mi nga tshiki ku va makhumbi, mi va vapandzeri va tihunyi ni vaki va mati va yindlu ya Xikwembu xa mina.”

²⁴Va hlamula, va ku eka Yoxuwa: “Makhumbi ya wena ma byeriwile leswaku Yehovha, Xikwembu xa wena, xi lerisile Muxe, nandza wa xona, ku mi nyika tiko hinkwaro ni ku heta emahlweni ka n'wina vaaki hinkwavo va tiko; sweswo hi chavile ngopfu hikwalaho ka vutomi bya hina, emahlweni ka n'wina, kutani hi endlile sweswo.

²⁵Sweswi-ke, hi le vokweni ra wena. U nga endla eka hina hi ku saseka ni ku lulama, hi laha u nga vonaka hakona.”

²⁶Kutani a va endlela sweswo; a va kutsula emavokweni ya vana va Israele leswaku va nga va dlayi.

²⁷Yoxuwa a va veka siku lero vapandzeri va tihunyi ni vaki va mati va nhlengeletano ni alitari ya Yehovha ku fika namuntlha, endhawini leyi a nga ta yi hlawula.