Read tsonga 2 Vatesalonika 1 Bible Online

2 Vatesalonika 1 - tsonga bible

2 Vatesalonika 1

¹Pawulo, na Silvano, na Timotiya, eka Kereke ya Vatesalonika leyi nga eka Xikwembu Tatana, ni le ka Hosi Yesu Kriste;

²Tintswalo ni ku rhula a swi ve na n'wina, swi huma eka Xikwembu Tata wa hina, ni le ka Hosi Yesu Kriste.

³Hi fanele ku khensa Xikwembu hi masiku hikwalaho ka n'wina vamakwerhu, hilaha swi lulameke hakona, hikuva ku pfumela ka n'wina ku karhi ku kula ngopfu, ni ku rhandzana ka n'wina ku engeteleka;

⁴hi kona hi tidzunisaka ha n'wina etikerekeni ta Xikwembu hikwalaho ka ku tiyisela ka n'wina, ni ku pfumela ka n'wina eku xanisekeni hinkwako, ni le maxangwini lawa mi ma yingiselaka,

⁵hi kona ku kombisa ka ku avanyisa loku lulameke ka Xikwembu, ku va leswaku mi endliwa lava lulameleke ku fuma ka Xikwembu, xolexo mi twisiwaka ku vaviseka hikwalaho ka xona.

⁶Hikuva swi lulamile loko Xikwembu xi tlherisela lava mi xanisaka ku xaniseka, kasi n'wina mi xanisiwaka mi ta nyikiwa ku wisa na hina,

⁷siku Hosi Yesu a vonakalaka, a huma etilweni ni tintsumi ta yena leta matimba,

⁸hi ndzilo lowu pfurhaka, ku rihisa lava nga tiviki Xikwembu, ni lava nga yingisiki Evhangeli ya Yesu Kriste, Hosi ya hina.

⁹Valavo va ta biwa hi ku onhaka loku nga heriki, hi ku humelela eka Hosi, ni matimba layo kwetsima ya yona;

¹⁰loko a ta ta ku ta dzunisiwa enkarhini wolowo hi vakwetsimi va yena, ni ku tlangeriwa hi hinkwavo lava pfumeleke; hikuva vumbhoni bya hina exikarhi ka n'wina byi amukeriwile.

¹¹Hikwalaho ha mi khongelela hi mikarhi, leswaku Xikwembu xa hina xi mi veka lava lulamelaka rivitano ra xona, xi hetisa makungu ya xona lamanene, ni mitirho hinkwayo ya ku pfumela;

¹²leswaku vito ra Hosi ya hina, Yesu Kriste, ri dzunisiwa eka n'wina, na n'wina mi dzunisiwa eka yena, hi tintswalo ta Xikwembu xa hina ni ta Hosi Yesu Kriste.