Read tsonga 1 Timotiya 1 Bible Online

1 Timotiya 1 - tsonga bible

1 Timotiya 1

¹Pawulo muapostola wa Yesu Kriste, hi ku lerisa ka Xikwembu, Mulondzovoti wa hina, ni ka Hosi Yesu Kriste loyi a nga ku langutela ka hina; Eka Timotiya, n'wananga wa xiviri, eku pfumeleni;

²Tintswalo, ni ku tsetseleriwa, ni ku rhula, a swi ve na wena, swi huma eka Xikwembu Tatana, ni le ka Yesu Kriste Hosi ya hina.

³Hilaha ndzi ku khongoteleke hakona loko ndzi ya eMakedoniya, ndzi ku, u sala eEfesa ku lerisa van'wana leswaku va nga tshuki va dyondzisa tidyondzo tin'wana,

⁴ni leswaku va nga tshuki va namarhela mitsheketo, ni swivongo leswi nga heriki, leswi humesaka ku tengisana, ku nga ri ku akisa yindlu ya Xikwembu leyi nga eku pfumeleni, ndza ha tiyisa swona.

⁵Hikuva laha ku lerisa ku kongomaka kona, i rirhandzu leri humaka embilwini leyi tengeke, ni le ripfalweni lerinene, ni le ku pfumeleni loku nga riki na ku kanganyisa.

⁶Swoleswo, van'wana loko va swi tshikile va nga tilahlela etimhakeni ta swahava;

⁷va rhandza ku va vafundhisi va nawu, kambe a va tivisisi leswi va swi vulaka ni leswi va swi tiyisaka.

⁸Kasi ha tiva leswaku nawu wu sasekile loko munhu a tirha ha wona hi mfanelo,

⁹a ri karhi a tiva leswaku nawu a wu vekeriwanga la lulameke kambe lavo homboloka, ni lava alaka ku yingisa, ni lava nga riki na xichavo, ni vadyohi, ni lava nga khongeriki, ni lava sandzaka, ni lava dlayaka vatata wa vona ni vamana wa vona,

¹⁰ni lava dlayaka vanhu, ni vaoswi, ni va Sodoma, ni lava yivaka vanhu, ni vahembi, ni lava hundzukaka eku hlambanyeni ka vona, hambi xi ri xilo xihi ni xihi lexi lwaka ni dyondzo leyi lulameke,

¹¹yi nga Evhangeli ya ku twala ka Xikwembu lexi katekeke, leyi ndzi yi lerisiweke.

¹²Kutani ndzi khensa Hosi ya hina, Yesu Kriste, la nga ndzi tiyisa, hikuva u ndzi ringanisile la tshembekeke, loko a ndzi veke entirhweni, mina loyi ingi ndzi ri musandzi khale, ni muxanisi, ni munhu wa tinhlambha.

¹³Kambe ndzi tsetseleriwile hi tintswalo, hikuva a ndzi endla hi ku kohleka, ndzi nga si pfumela;

¹⁴kutani tintswalo ta Hosi ya hina ti ndzi tele hi ku tlurisisa, Swin'we ni ku pfumela, ni rirhandzu leri nga ka Yesu Kriste.

¹⁵Rito leri ri tiyile, ri fanele ku amukeriwa hi ku kholwa hinkwako, leswaku Yesu Kriste u tile emisaveni ku ponisa vadyohi, lava ndzi nga lowo rhanga exikarhi ka vona.

¹⁶Kambe ndzi tsetseleriwile leswaku Yesu Kriste a ta kombisa ha mina lowo rhanga xivindzi xa yena hinkwaxo, yi ta va mitila ya hinkwavo lava nga ta pfumela eka yena, leswaku va va ni vutomi lebyi nga heriki.

¹⁷Eka Hosi ya mikarhi, leyi nga riki na ku bola ni ku voniwa, eka Xikwembu xi ri xin'we xa vunene, a ku ve ku chaviwa, ni ku twala hi mikarhi ni mikarhi! Amen!

¹⁸Timotiya, n'wananga, leswi ndzi ku khongotelaka swona, hileswaku, hilaha ku nga bvumbhiwa hakona eku sunguleni ehenhla ka wena, u lwa hakona ku lwa loko saseka,

¹⁹u ri karhi u hlayisa ku pfumela ni ripfalo lerinene, leri van'wana va ri lahleke; ku pfumela ka vona ku halakile kukotisa byatso;

²⁰exikarhi ka vona, ku na Himenayo na Aleksandro, lavo ndzi va nyiketeke Satana, va ta dyondza ku tshika ku sandza.