Read tsonga 1 Timotiya 2 Bible Online

1 Timotiya 2 - tsonga bible

1 Timotiya 2

¹Hikwalaho, ndza mi khongotela emahlweni ka hinkwaswo, leswaku ku khongela ni ku kombela, ni ku khongelela, ni ku khensa, swi endleriwa vanhu hinkwavo,

²ni tihosi, ni hinkwavo lava nga ni vukulukumba, leswaku hi tihanyela hi ku rhula ni ku tsaka, hi vukhongeri hinkwabyo, ni xichavo.

³Hikuva i xilo lexo saseka lexi amukelekaka emahlweni ya Xikwembu, Mulondzovoti wa hina,

⁴la rhandzaka leswaku vanhu hinkwavo va hlayiseka, va fika eku tiveni ka ntiyiso;

⁵hikuva Xikwembu i xin'we ntsena, ni Muhlanganisi i un'we ntsena exikarhi ka vanhu ni Xikwembu, a nga Yesu Kriste, munhu

⁶la tinyiketeke ku kutsula hinkwavo; hi byona vumbhoni lebyi vekiweke hi nkarhi lowu fanekeleke,

⁷lebyi ndzi vekiweke muvulavuri ni muapostola hikwalaho ka byona (ndzi vulavula hi ku tiyisa, a ndzi hembi), ndzi mufundhisi wa vamatiko eku pfumeleni ni le ntiyisweni.

⁸Hikwalaho ndzi rhandza leswaku vavanuna va khongela hinkwako va ri karhi va tlakusa mavoko layo basa, ku nga ri na ku kariha ni ku kanetana.

⁹Hi sweswo na vona vavasati, a va ambale tinguvu leti fanekelaka, va tisasekisa hi xichavo, ni ku rhula; ku nga ri hi misisi leyi horhiweke ngopfu, ni nsuku, hambi byi ri vuhlalu, ni tinguvu ta vubombi,

¹⁰kambe ku va hi mitirho leyo saseka, hilaha swi lulamelaka hakona vavasati lava tivulaka leswaku va dzunisa Xikwembu.

¹¹Wansati a a dyondze a timiyelela eku yingiseni hinkwako;

¹²hikuva a ndzi pfumeleri wansati ku dyondzisa, hambi ku ri ku lerisa nuna, kambe u fanele ku tshama a miyerile.

¹³Hikuva Adamu u rhange a vumbiwa, kutani ndzhaku ku vumbiwa Evha;

¹⁴na swona a hi Adamu la kanganyisiweke, kambe i wansati, kuteloko a kanganyisiwile, a wela eku dyoheni.

¹⁵Hambiswiritano, u ta ponisiwa hi ku veleka vana, loko a tshama eku pfumeleni, ni le rirhandzwini, ni le ku kwetsimeni, a ri ni ku chava.