Read tsonga 1 Timotiya 4 Bible Online

1 Timotiya 4 - tsonga bible

1 Timotiya 4

¹Kambe Moya wu vurisile leswaku emikarhini ya le ndzhaku, van'wanyana va ta tlhela eku pfumeleni, va namarhela mimoya leyi kanganyisaka, ni tidyondzo ta mademona,

²hi ku ya hi ku kanganyisa ka vafundhisi lavo hemba, lava mapfalo ya vona ma feke, lava nga ta sivela vanhu ku tekana;

³va ku: A ku tshikiwe swakudya leswi Xikwembu xi swi vumbeleke lava pfumeleke ni lava tivaka ntiyiso, leswaku va xi amukela hi ku khensa;

⁴hikuva hinkwaswo leswi vumbiweke hi Xikwembu swi sasekile, kambe a ku na nchumu lowu faneleke ku cukumetiwa loko wu amukeriwa hi ku khensa;

⁵hikuva hinkwaswo swi kwetsimisiwile hi rito ra Xikwembu ni xikhongelo.

⁶Loko u hlamusela timhaka leti, u ta va nandza lonene wa Yesu Kriste, ni la kurisiweke hi marito ya ku pfumela, ni dyondzo leyinene, leyi u yi landzeleleke swinene.

⁷Kambe u ala timhaka ta swahava, ni mitsheketo ya swidyuhati, u titiyisa evukhongerini.

⁸Hikuva ku titiyisa emirini swa pfunanyana; kambe vukhongeri byi pfuna hinkwako, byi ni ku tshembisa ka vutomi bya sweswi ni ka lebyi nga ta ta.

⁹Mhaka leyi yi tiyile, yi fanele ku amukeriwa swinene.

¹⁰Hikuva, hikwalaho ka yona, a hi chavi mikarhalo ni ku sandziwa, hikuva hi langutele Xikwembu lexi hanyaka, a nga Mulondzovoti wa vanhu hinkwavo, ngopfu wa lava pfumelaka.

¹¹Letela vanhu timhaka leti, u va dyondzisa tona.

¹²Ku nga tshuki ku va ni la tsan'waka vuntshwa bya wena, kambe u va wena xikombiso xa vapfumeri, eku vulavuleni, ni le ku tihanyeleni, ni le rirhandzwini, ni le ku pfumeleni, ni le ku tengeni.

¹³U tinyiketa ku hlaya, ni ku khongotela, ni ku dyondzisa, ndzi ko ndzi ta.

¹⁴U nga rivali nyiko leyi u nga na yona, leyi u yi nyikiweke hi ku bvumbha, hi ku tlhandleka ka mavoko ya nhlengeletano ya vakulukumba.

¹⁵Anakanya timhaka leti, u va eka tona, leswaku ku ya emahlweni ka wena ku voniwa hi vanhu hinkwavo.

¹⁶U tilangutela, wena, ni ku dyondzisa ka wena, kutani u tiya kona, hikuva loko u endlisa sweswo, u ta tihanyisa; u ta hanyisa ni lava ku yingisaka.