Read tsonga 2 Timotiya 3 Bible Online

2 Timotiya 3 - tsonga bible

2 Timotiya 3

¹U nga tiva mhaka leyi, leswaku emasikwini ya makumu, ku ta humelela mikarhi yo nonon'hwa.

²Hikuva vanhu va ta va lava tirhandzelaka, lava rhandzaka mali, lava tibombisaka, lava tikurisaka, lava hlevaka, lava nga yingisiki vatswari va vona, va nga tivi ku khensa, vasandzi,

³lava pfumalaka rirhandzu, lava nga tshembekiki, valumbeti; lava nga tiviki ku tikhoma, lava nga tiviki musa, lava vengaka lavanene,

⁴vaxengi, vakarihi, lava tikurisaka, lava rhandzaka ku tsaka, xi nga ri Xikwembu,

⁵va ni nghohe ya vukhongeri, kambe va arile matimba ya byona. Na vona, u va fularhela.

⁶Exikarhi ka vona ku ni van'wana lava tinghenisaka etindlwini va titekela mimoya ya vavasati lava tikeriweke hi swidyoho, lava fambisiwaka hi ku navela ka tinxakaxaka,

⁷va dyondza hi masiku hinkwawo, kambe va nga swi koti ku fika eku tiveni ka ntiyiso.

⁸Hilaha Yani na Yambri va aleleke Muxe hakona, hi sweswo, na vona, va ala swa ntiyiso, va nga vanhu lava boleke eku anakanyeni ka vona va nga riki na ku khensiwa hitlhelo ra vupfumeri.

⁹Kambe va nga ka va nga engeti va ya emahlweni, hikuva vuphukuphuku bya vona byi ta vonaka emahlweni ka hinkwavo, kukotisa bya volavaya.

¹⁰Kambe loko u ri wena, u ndzi landzile eku dyondziseni, ni le ku hanyeni, ni le makungwini ni le ku pfumeleni, ni le ku yingiseleni, ni le rirhandzwini, ni le ku tiyiseleni,

¹¹ni le ku xanisekeni, ni le makhombyeni lama ndzi humeleleke eAntiyoka, ni le Ikoniya, ni le Listra; kunene ndzi rhwarile ku vaviseka loku, kutani Hosi yi ndzi lwele eka hinkwaswo.

¹²Kambe hinkwavo lava rhandzaka ku hanya hi vukhongeri lebyi nga eka Yesu Kriste, va ta xanisiwa.

¹³Kambe vanhu lavo biha ni vakanganyisi va ta hundzela emahlweni eku biheni, va ri karhi va kanganyisa, na vona va kanganyisiwa.

¹⁴Kambe wena, tiya etimhakeni leti u ti dyondzeke, leti u vekeriweke tona, u ri karhi u tiva loyi u ti dyondzeke eka yena;

¹⁵ku suka evutsongwaneni bya wena, u tiva Matsalwa layo kwetsima, wona ma nga ku nyika vutlhari bya ku kuma ku hlayiseka hi ku pfumela eka Yesu Kriste.

¹⁶Matsalwa hinkwawo lama huhutiweke hi Xikwembu, ma pfuna ku dyondzisa, ni ku khorwisa, ni ku ololoxa, ni ku kurisa eku lulameni;

¹⁷leswaku munhu wa Xikwembu a ta hetiseka, a ta lunghiseriwa ntirho wun'wana ni wun'wana lowunene.