Read tsonga Tito 1 Bible Online

Tito 1 - tsonga bible

Tito 1

¹Pawulo, nandza wa Xikwembu ni muapostola wa Yesu Kriste, hikwalaho ka ku pfumela ka vahlawuriwa va Xikwembu, ni ku tiva ntiyiso lowu nga ni vukhongeri,

²hi ku tshemba vutomi lebyi nga heriki, lebyi Xikwembu lexi nga hembiki xi byi tshembiseke ka hari mpfhuka misava yi nga si tumbuluka,

³kambe xi kombisile hi nkarhi lowu fanelaka rito ra xona hi ku dyondzisa loku ndzi ku lerisiweke hi ku lerisa ka Xikwembu, Mulondzovoti wa hina;

⁴Eka Tito, n'wananga wa xiviri eku pfumeleni loku hi nga na kona swin'we na wena; tintswalo, ni ku rhula, a swi ve na wena, swi huma eka Xikwembu Tatana, ni le ka Hosi Yesu Kriste, Mukutsuri wa hina.

⁵Mhaka leyi ndzi ku siyeleke yona eKreta, hileswaku u hetisela ku lunghisa timhaka leti nga siki lunghisiwaka, u veka vakulukumba emutini wun'wana ni wun'wana, hilaha ndzi ku leriseke hakona;

⁶loko u kuma munhu la nga riki na xisandzu, a ri nuna wa nsati, un'we, la nga ni vana lava pfumeleke, lava nga soriwiki hikwalaho ka mikhuva leyo biha, kumbe lava nga yingisiki.

⁷Hikuva swi fanele murisi leswaku a va munhu la nga riki na xisandzu, hikuva i mulaveleri wa Xikwembu; a nga tshuki a va la tirhandzaka, ni mukarihi, ni la pyopyiwaka hi vhinyo, ni la lavaka rifuwo hi ku dyelela;

⁸kambe a va munhu la amukelaka vaendzi, la rhandzaka vanhu lavanene, la tlhariheke, la lulameke, la kwetsimeke, la hanyaka hi ku tikhoma,

⁹la namarhelaka rito hilaha dyondzo yi kombaka hakona a ta lulamela ku khongotela hi dyondzo leyi hanyisaka, ni ku laya vakaneti.

¹⁰Hikuva lavo tala va kona, ngopfungopfu eka lava ku yimba, lava alaka ku yingisa, lava vulavulaka swahava, lava dyelelaka van'wana, valavo swi fanelaka ku va siva nomu,

¹¹lava hambukisaka vanhu hinkwavo va tindlu tin'wana, va dyondzisa leswi nga faneriki, hi ku tihlengeletela rifuwo ra ku homboloka.

¹²Un'wana wa vona, a nga muprofeta wa vona, u te: “Vakreta i vahembi hi masiku, swiharhi leswo biha, makhwiri yo loloha.”

¹³Loko a va vula sweswo, u vule swinene. Hikwalaho u va tshinya hi matimba, leswaku va pfumala xisandzu eku pfumeleni ka vona;

¹⁴va nga tshuki va namarhela mitsheketo ya Vayuda, ni ku lerisa ka vanhu lava fularhelaka ntiyiso.

¹⁵Hinkwaswo swi tengile eka lava tengeke; kambe a ku na lexi tengeke eka lava thyaka ni ka lava nga pfumeriki; va nyamisiwile timbilu ni mapfalo.

¹⁶Hi nomu va vula leswaku va tiva Xikwembu, kambe va xi landzula hi mitirho ya vona; i manyala, ni lava alaka ku yingisa, kutani va tsandzeka ku tirha mitirho leyo saseka, hambi wu ri wun'we.