Read tsonga Tito 2 Bible Online

Tito 2 - tsonga bible

Tito 2

¹Loko u ri wena, vula leswi lulameleke ku dyondzisa loku tengeke:

²Vavanuna lava kuleke va fanele ku tikhoma, va chava ku hlekiwa, va ve ni ku anakanya loku lulameke eku pfumeleni, ni le rirhandzwini, ni le ku yingiseleni.

³Na vona vavasati lava kuleke, a va ve ni ku famba loku lulamelaka ku kwetsima, va nga tshuki va hleva, va nga toloveli ku nwa vhinyo leyo tala; va dyondzisa leswo lulama;

⁴va ta tlharihisa lavantshwa va va dyondzisa ku rhandza vanuna va vona, ni ku rhandza vana;

⁵va ve ni ku titsongahata, ni ku tenga, ni ku titshamela emakaya ka vona; va ve lavanene, lava yingisaka vanuna va vona, leswaku rito ra Xikwembu ri nga tshuki ri sandziwa.

⁶Na vona vavanuna lavantshwa, u va khongotela ku va ni ku anakanya;

⁷eka hinkwaswo u tiendla ntila wa mitirho leyinene, hi ku dyondzisa loku tengeke, loku nga riki na xisandzu,

⁸marito ya wena a ma ve lama hanyisaka, lama nga solekiki, leswaku la kanetaka a va ni tingana hi ku pfumala leswo biha leswi a nga mi vulaka ha swona.

⁹Byela makhumbi leswaku va yingisa veni va vona, va va tsakisa etimhakeni hinkwato, va nga kanetani na vona,

¹⁰va nga yivi nchumu, kambe va endla hinkwaswo hi ku dzuneka lokunene va ta dzunisa etimhakeni hinkwato, dyondzo ya Xikwembu, Mukutsuri wa hina.

¹¹Hikuva tintswalo ta Xikwembu, leti nga hlayisaka vanhu hinkwavo, ti vonakarile,

¹²ti hi dyondzisa leswaku hi tshika ku sandza swa Xikwembu, ni ku navela ka misava, hi ta hanya emikarhini ya sweswi hi ku tikhoma, ni ku lulama, ni vukhongeri,

¹³hi ri karhi hi langutela ku tshemba loku nga ni ku kateka, ni ku humelela ka ku vonakala ka Xikwembu lexikulu, ni Mukutsuri wa hina, Yesu Kriste,

¹⁴la titshikeleke hina, a ta hi kutsula eku hombolokeni hinkwako, a va a hi hlantswa ku tiendla ha hina tiko leri nga ra yena hi xiviri, leri chivirikelaka emitirhweni leyinene.

¹⁵Vula timhaka leti, u khongotela, u tshinya hi matimba hinkwawo; munhu a nga tshuki a ku sandza.