Read tsonga Tito 3 Bible Online

Tito 3 - tsonga bible

Tito 3

¹U va tsundzuxa ku yingisa vuhosi ni tindhuna, ni ku ya hi nawu, ni ku tilunghisela mitirho hinkwayo leyo saseka;

²va nga tshuki va lumbeta munhu, va tshika timholovo, va tikhoma, va kombisa ku olova hinkwako eka vanhu hinkwavo.

³Hikuva, na hina, khale a hi hungukile, hi ri lava alaka ku yingisa, lava lahlekeke, lava fumiwaka hi ku navela, ni ku titsakisa loko tala; lava hanyaka emoneni ni le makwangeni, lava faneleke ku vengiwa, ni lava venganaka.

⁴Kambe siku ku vonakalaka vunene bya Xikwembu, Mulondzovoti wa hina, ni rirhandzu ra xona eka vanhu,

⁵u hi hanyisile, ku nga ri hi mitirho leyinene leyi tirhiweke hi hina, kambe hi tintswalo ta xona, hi ku hlantswa ka ku tswariwa ra vumbirhi, ni vuntshwa bya Moya lowo Kwetsima,

⁶lowu xi wu cheleke hi ku tala ehenhla ka hina ha Yesu Kriste, Mulondzovoti wa hina;

⁷leswaku, leswi hi nga hlayiwa lava lulameke hi tintswalo ta xona, hi ta va ni ku tshemba ku endliwa vadyandzhaka va vutomi lebyi nga heriki.

⁸Rito leri ri tiyile, kambe ndzi rhandza leswaku u tiyisa hi matimba timhaka leti, leswaku lava pfumeleke eka Xikwembu va tilangutela, va ta rhanga va chivirikela mitirho leyinene: Hi swona leswinene, leswi lulamelaka vanhu.

⁹Kambe chava ku kanetana ka vuhunguki, ni ka tinxaka, ni timhaka leti hambanaka, ni ku kanela ehenhla ka nawu, hikuva a swi pfuni nchumu, i swahava.

¹⁰Hambana ni munhu la dyondzisaka leswi hambanisaka loko u n'wi pfuxile kan'we kumbe kambirhi,

¹¹u nga tiva leswaku lowo tano u onhakile, i mudyohi, u tiavanyisile.

¹²Kutani loko ndzi ta va ndzi ku rhumele Artema, hambi a ri Tixiko, hatlisa u ta eka mina eNikopoli, hikuva ndzi anakanyile ku pindzuka vuxika kona.

¹³Longelela Zena, mudyondzisi wa nawu, na Apolosi, erendzweni ra vona, va nga tshuki va pfumala nchumu.

¹⁴Varikwerhu a va dyondze, na vona, eku chivirikela mitirho leyinene va ta pfuna emasikwini ya ku pfumala, va nga tshuki va pfumala mihandzu.

¹⁵Lava ndzi nga na vona va ku rungula hinkwavo. Rungula lava hi rhandzaka eku pfumeleni. Tintswalo a ti ve na n'wina hinkwenu!