Read tsonga Vaheveru 12 Bible Online

Vaheveru 12 - tsonga bible

Vaheveru 12

¹Hikwalaho-ke, na hina, leswi hi nga rhendzeriwa hi papa leronghasi ri timbhoni, a hi cukumeteni hinkwaswo leswi hi tikelaka, ni vudyoho lebyi hi namarhelaka hi ku hatlisa, hi tsutsuma hi ku tiyisela empfhukeni lowu hi wu vekeriweke,

²hi ri karhi hi languta eka Yesu, musunguri ni muhetisi wa ku pfumela, la nga tiyela xihambano hikwalaho ka ku tsaka loku a ku vekeriweke, a nga vulanga nchumu hi tingana, kutani u tshamisile exiluvelweni, evokweni ra xinene ra Xikwembu.

³Loko swi ri tano, tsundzukani la nga tiyela ku kaneta lokonghasi ka vadyohi, leswaku mi nga tshuki mi karhala, ni ku hela timbilu.

⁴A mi si tilwela, ngati yi ko yi huma, enyimpini leyi mi yi lwaka ni vudyoho.

⁵Kutani mi rivele mikhongotelo leyi vuriwaka eka n'wina kukota loko yi byeriwa vana, leswaku: “N'wananga, u nga soli ku layiwa hi Hosi, u nga heli mbilu loko u tshinyiwa hi yena;

⁶hikuva Hosi yi laya loyi yi n'wi rhandzaka, kutani yi ba n'wana un'wana ni un'wana loyi yi n'wi amukelaka ku va n'wana wa yona.”

⁷Kungakuloko mi yingisela ku layiwa, Xikwembu xi mi endla kukota vana va xona, hikuva hi wihi n'wana, tata wa yena a nga n'wi layiki xana?

⁸Loko mi nga ri na ku layiwa loku hinkwavo va nga ni ku averiwa kona, hi loko kumbe mi ri vana va vugangu mi nga ri vana va xiviri.

⁹Swi tsandza ni vatata wa hina va nyama, va hi layile kutani hi va chavile; xana ngopfungopfu hi nga ka hi nga tiveki ehansi ka loyi a nga Tata wa mimoya, kutani hi ta hanya xana?

¹⁰Kasi vona va hi layile hi mikarhi yi nga ri yingani, hilaha va nga ringanisa hakona; kambe yena u hi laya ku hi pfuna, leswaku hi va ni ku averiwa ka ku kwetsima ka yena.

¹¹Kambe ku laya kun'wana ni kun'wana, loko ku humelela, a ku ringanisiwi leswaku ku nga hi tsakisa, kambe ka hi ririsa; ntsena endzhaku, ku tlhela ku nyika lava dyondzisiweke hakona mihandzu leyo lulama, leyo tenga.

¹²Lulamisani hikwalaho, mavoko lama karheleke, ni matsolo lama khwanyaleke;

¹³mi endlela milenge ya n'wina tindlela leti lulameke, leswaku leswi khwitaka swi nga tshuki swi hambuka ndlela, kambe swi hola.

¹⁴Hisekelani ku va ni ku rhula ni hinkwavo, ni ku kwetsima, loku, kungakuloko munhu a ku pfumala, a nga ka a nga voni Hosi;

¹⁵mi tilangutela leswaku ku nga tshuki ku va na un'we la titsonaka tintswalo ta Xikwembu, rimitsu ro bava ri nga tshuki ri mi hlukela, ri mi pfilunganya, kutani lavo tala va onhaka ha rona.

¹⁶Ku nga tshuki ku va na un'wana wa muoswi, hambi a ri musandzi, kukota Esawu, la nga xava swakudyanyana hi vuhosi bya yena.

¹⁷Hikuva ma swi tiva leswaku endzhaku, loko a rhandzile ku nyikiwa ndzhaka yo kateka, u nyenyiwile, hikuva a nga kumanga nkarhi wa ku hundzuka, hambi a ku lavile hi mihloti.

¹⁸Hikuva a mi tshinelelangi ntshava leyi khumbiwaka hi voko, hambi wu ri ndzilo lowu hisaka, hambi wu ri munyama, hambi xi ri xidzedze,

¹⁹hambi wu ri mpfumawulo wa nanga, hambi ri ri rito leri vulavulaka leri lava nga ri twa, va nga khongela leswaku ku nga ha vulavuriwi na vona;

²⁰hikuva a va tikeriwa hi ku lerisa loku nge: “Swi tsandza ni xifuwo, kungakuloko xi khumba ntshava, xi ta dlawa hi maribye.”

²¹Kutani hikwalaho ka ku chavisa ka lexi vonakaka, na yena Muxe u te: “Ndzi tshukile ngopfu, ndza rhurhumela.”

²²Kambe mi tile entshaveni ya Siyoni, emutini wa Xikwembu lexi hanyaka, eYerusalema, wa le tilweni, ni le madzaneni ya madzana ya tintsumi,

²³ni le nhlengeletanweni ya hinkwavo ni le kerekeni ya mativula lama tsariweke ematilweni ni le ka Xikwembu, muavanyisi wa hinkwavo, ni le ka mimoya ya lava lulameke lava nga hetiseka;

²⁴ni le ka Yesu, mulamuri wa ntwanano lowuntshwa, ni le ka ngati leyi ku xuviwaka ha yona, leyi vulaka timhaka leti tlulaka ta ngati ya Avele hi ku saseka.

²⁵Tilanguteleni leswaku mi nga tshuki mi alela la vulavulaka; hikuva leswi lava aleleke la nga vulavula na vona a ha ri emisaveni, va nga ponangiki, ngopfungopfu hina hi nga ponisa ku yini, loko hi fularhela la vulavulaka na hina a ri ematilweni;

²⁶loyi rito ra yena ri nga tsekatsekisa misava khale, kutani sweswi, wa hi tshembisa, a ku: “Hi nkarhi wun'wana ndza ha ta tsekatsekisa, yi nga ri misava ntsena, kambe na rona tilo.”

²⁷Kutani loko a ku: “Hi nkarhi wun'wana,” hi ku ringanisa ku susa ka leswi tsekatsekaka, hikuva swi endliwile, leswaku ku ta sala leswi nga tsekatsekiki.

²⁸Hikwalaho, leswi hi nga amukela ku fuma loku nga tsekatsekiki, a hi hlayiseni tintswalo leswaku hi tirhela Xikwembu ha tona hi mukhuva lowu xi tsakisaka, hi mafundza ni xichavo.

²⁹Hikuva Xikwembu xa hina, na xona, i ndzilo lowu hisaka.