Read tsonga Vaheveru 4 Bible Online

Vaheveru 4 - tsonga bible

Vaheveru 4

¹A hi chaveni kwalaho leswaku hambi ku tshembisa ka ku nghena eku wiseni ka xona ku vekeriwe hina, un'wana wa n'wina a nga ti kumiwa a sele endzhaku.

²Hikuva na hina hi byeriwile Evhangeli kukotisa vona; kambe valavo, rito leri va ri yingiseke a ri va pfunanga nchumu, hikuva a ri pfangananga ni ku pfumela etimbilwini ta lava yingiseke.

³Hikuva hi ta nghena eku wiseni, hina lava pfumeleke, hilaha xi nga te: “Hi leswi ndzi hlambanyeke evukarini bya mina leswaku va nga ti nghena eku wiseni ka mina,” hambi mitirho yi tirhiwile ku sukela eku vumbiweni ka misava.

⁴Hikuva ku vuriwile kun'wana ehenhla ka siku ra ntlhanu na mambirhi leswaku: “Kutani Xikwembu xi phyuphya hi siku ra ntlhanu na mambirhi emitirhweni hinkwayo ya xona.”

⁵Na swona kambe: “A va nga ngheni eku wiseni ka mina.”

⁶Hikwalaho, leswi mhaka leyi, yi tiyeke, leswaku van'wana va nghena kona, kasi lava dyondzisiweke eku sunguleni, a va nghenanga hikwalaho ka ku tiarisa ka vona,

⁷xi tlhela xi veka rin'wana siku, xi ku: “Namuntlha” loko xi vulavule eka Davhida, ku hundzile nkarhi lowo leha, xi engeta xi ku kukotisa eku sunguleni: “Namuntlha loko mi twa rito ra yena mi nga tshuki mi nonon'hwisa timbilu ta n'wina.”

⁸Hikuva loko ngi Yoxuwa a va nyikile ku wisa, a xi nga ti vula rin'wana siku endzhaku ka sweswo.

⁹Loko swi ri tano, ku wisa ka ha ri kona loku siyeriweke vanhu va Xikwembu.

¹⁰Hikuva la ngheneke eku wiseni ka Xikwembu, na yena u phyuphya emitirhweni ya yena, a kota xona Xikwembu xi phyuphyaka emitirhweni ya xona.

¹¹Hikwalaho, a hi chivirikeni ku ya nghena eku wiseni kuloko, leswaku ku nga ti va na un'we la khunguvanyekaka hi ku tiarisa loko tano.

¹²Hikuva rito ra Xikwembu i rito leri hanyaka, leri tirhaka, leri karihaka ku tlula tlhari leri nga ni vukari hi matlhelo mambirhi, ri ya fika emahlanganweni ya mbilu ni moya, ni ka misiha ni mongo, kambe hi rona leri avanyisaka mianakanyo ni makungu ya timbilu.

¹³Kutani a ku na xivumbiwa lexi nga vonakiki emahlweni ka xona, kambe hinkwaswo swi tshama ntsena swi ri erivaleni emahlweni ka loyi hi nga ni mhaka na yena.

¹⁴Hikwalaho, leswi hi nga ni muprista lonkulu ngopfu, la tsemakanyeke matilo, a nga Yesu, N'wana wa Xikwembu, a hi tiyiseleni eka lexi hi tivuleke xona.

¹⁵Hikuva muprista lonkulu, loyi hi nga na yena, a hi loyi a nga tsandzekaka ku hi twela vusiwana emikarhalweni ya hina, kambe hi loyi a ringiweke ematlhelweni hinkwawo, a kotisa hina, kambe a nga vanga na xidyoho.

¹⁶Hikwalaho, a hi tshineleleni hi ku tshemba xiluvelo xa tintswalo, leswaku hi ta tweriwa vusiwana, hi kuma tintswalo, hi ta pfuniwa enkarhini lowu lulameke.