Read tsonga Vaheveru 6 Bible Online

Vaheveru 6 - tsonga bible

Vaheveru 6

¹Hikwalaho, a hi tshikeni tidyondzo ta masungulo ta rito ra Kriste, hi kongoma eku hetisekeni, hi nga tlheli hi veka kambe masungulo ya ku tshika mitirho leyi feke, ni ya ku pfumela eka Xikwembu,

²ni ya dyondzo ya ku khuvula, ni ya ku tlhandleka ka mavoko, ni ya ku pfuka ka lava feke, ni ku avanyisa loku nga heriki.

³Kambe hi ta endlisa sweswo loko Xikwembu xi hi pfumelela.

⁴Hikuva swi nga ka swi nga endleki leswaku lava nga voningiwa kan'we, lava nantsweke ku ha ka le tilweni, lava averiweke Moya lowo Kwetsima,

⁵lava engeteke va nantswa rito lerinene ra Xikwembu, ni matimba ya mikarhi leyi nga ta ta,

⁶kutani va khunguvanyeka, swi nga ka swi nga endleki leswaku va nga tlhela va hundzuka hikuva va engeta va tivambela n'wana wa Xikwembu, va ri karhi va n'wi endla xisandzu.

⁷Hikuva misava leyi nwaka mati ya mpfula leyi yi yi nelaka kanyingi, yi tlhela yi mirisa swo mila leswinene, leswi pfunaka lava tirimelaka, yona yi kuma ku katekisiwa hi Xikwembu;

⁸kambe loko yi ri leyi humesaka mitwa ni mahlwehlwe, yi tshinyiwa, yi va yi ri ekusuhi ni ku rhukaniwa, kutani yi ta hela hi ku tshwa.

⁹Kambe, loko mi ri n'wina, vamakwerhu, hambi hi vulavula sweswo, hi tshemba leswi tlulaka swoleswo hi ku saseka, leswi pfunaka ku hlayiseka ka n'wina.

¹⁰Hikuva Xikwembu a xi hombolokanga; xi nga ka xi nga rivali ntirho wa n'wina, ni rirhandzu leri mi ri kombiseke hikwalaho ka vito ra xona, loko mi pfunile vakwetsimi, ni sweswi, ma ha va pfuna.

¹¹Kambe hi navela leswaku un'wana ni un'wana wa n'wina a kombisa ku chivirika kuloko leswaku ku tshemba ku ta tiya ku ya fika makumu;

¹²leswaku mi nga ti hundzuka lava lolohaka, kambe mi va valandzeri va lava kumaka ndzhaka ya ku tshembisiwa, hi ku pfumela ni ku leha ka mbilu.

¹³Hikuva Xikwembu, siku xi tshembiseke Abrahama leswi a nga riki kona loyi a xi tlulaka leswaku xi ta hlambanya ha yena, xi hlambanyile hi xiviri xa xona,

¹⁴xi ku: “Kunene, loko ku ri ku katekisa, ndzi ta ku katekisa, loko ku ri ku andzisa, ndzi ta ku andzisisa!”

¹⁵Kutani, kuteloko a langutele hi mbilu leyo leha, a kuma leswi a nga tshembisiwa swona.

¹⁶Hikuva loko va ri vanhu, va hlambanya hi loyi a va tlulaka hi vukulukumba, kutani ku kanetana hinkwako ka vona ku hela eku hlambanyeni loku tiyisaka timhaka.

¹⁷Hi sweswo ni Xikwembu, loko xi rhandza ku kombisisa vadyandzhaka va ku tshembisa ku tiya ka makungu ya xona, xi nghenisa ku hlambanya,

¹⁸leswaku hi timhaka timbirhi leti tiyeke leti Xikwembu xi nga kalaka ku hemba ha tona, hi kuma ku chaveleriwa loku tiyaka, hina hi chaveleke hi ku khoma leswi hi swi tshembaka, leswi vekeriweke emahlweni ka hina,

¹⁹leswi hi titiyisaka ha swona, kukotisa nsoma leyi tiyaka ya moya, yi nga tsekatseki, yi nghenaka ehase ka xisirhelelo,

²⁰laha Yesu a ngheneke hikwalaho ka hina, a ri murhangeri wa hina, a va a vekiwa muprista lonkulu hilaha ku nga heriki, hi mukhuva wa Melkisedeke.