Read tsonga Vaheveru 9 Bible Online

Vaheveru 9 - tsonga bible

Vaheveru 9

¹Ntwanano lowo rhanga, na wona a wu ri ni milawu ya ku tirhela Xikwembu, ni vukwetsimelo bya la emisaveni.

²Hikuva tabernakela yo rhanga yi akiwile, leyi vuriwaka vukwetsimelo, laha ngi ku ri ni kandelari, ni tafula, ni swinkwa leswi vekeriwaka Yehovha,

³kutani endzhaku ka xisirhelelo xa vumbirhi a yi ri tabernakela leyi vuriwaka xikwetsimisiso,

⁴leyi a yi ri ni mbita ya nsuku ya mirhi ya risuna, ni areka ya ntwanano leyi namekiweke hinkwako hi nsuku; endzeni ka yona, a ku ri ni mbita ya nsuku leyi ngi yi ri ni manna ni nhonga ya Aroni leyi balekeke swiluva, ni maribye ya ntwanano.

⁵Kutani ehenhla ka areka a ku ri ni tikerubu to kwetsima leto wungameleke vukhongelelo; kambe sweswi a hi nkarhi wa ku vula swilo leswi ha xin'we.

⁶Kutani leswi swilo leswo swi nga lunghisiwa xisweswo, vaprista va nghena hi masiku hinkwawo etabernakeleni leyo rhanga, va tirha ntirho wa Xikwembu;

⁷kambe loko ku ri etabernakeleni ya vumbirhi, ku nghena eka yona muprista lonkulu ntsena, a nghena kan'we hi lembe, kambe a nga ngheni loko a nga ri na ngati leyi a yi humesaka hikwalaho ka yena, ni ka ku dyoha ka tiko.

⁸Moya lowo Kwetsima wu ri karhi wu hi kombisa hi sweswo leswaku ndlela ya xikwetsimisiso a yi nga si pfuriwa loko tabernakela yo rhanga ya ha yimile,

⁹xi nga xifaniso lexi endleriweke mikarhi ya sweswi, leyi ka ha humesiwaka ha yona mihlengo ni magandzelo lama tsandzekaka ku hetisisa hitlhelo ra ripfalo ra loyi a tirhaka ntirho;

¹⁰yi nga milawu ya misava ntsena, leyi lerisaka swakudya, ni swakunwa, ni swa ku hlantswa leswo tala, ku ko ku fika nkarhi wa ku pfuxeta hinkwaswo.

¹¹Kambe Kriste loko a humelele, a ri muprista lonkulu wa swilo swo saseka leswi nga ta ta, u tsemakanyile tabernakela leyi tlurisaka hi vukulu ni ku hetiseka, leyi nga endliwangiki hi mavoko, hileswaku leyi nga riki ya misava leyi,

¹²u nghenile kan'we exikwetsimisweni, ku nga ri hi ngati ya swiphongo ni ya marhole, kambe hi ngati ya yena hi xiviri; kutani u kumile ku kutsula loku nga heriki.

¹³Hikuva leswi ngati ya tinkunzi, ni ya swiphongo, ni nkuma wa rhole, lowu ku hungiwaka ha wona lava nga ni thyaka, yi tivaka ku hlantswa hitlhelo ra nyama,

¹⁴ngopfungopfu ngati ya Kriste la tihumeseke eka Xikwembu hi Moya lowu nga heriki, a ri mhamba leyi nga riki na xivati, yi ta hlantswa mapfalo ya n'wina emitirhweni leyi feke, leswaku mi tirhela Xikwembu lexi hanyaka!

¹⁵Hikwalaho Kriste mulamuri wa ntwanano lowuntshwa, leswaku rifu ra yena, kuteloko ri humelele ku ta kutsula lava tluleke nawu hi nkarhi wa ntwanano lowo sungula, lava vitaniweke va nyikiwa ndzhaka leyi nga heriki, leyi va yi tshembisiweke.

¹⁶Hikuva laha papila ra ndzhaka ri nga kona, swa fanela leswaku rifu ra n'wini wa ndzhaka ri vuriwa.

¹⁷Hikuva papila ra ndzhaka ri tiyisiwa hi ku fa, leswi ri nga riki na matimba loko loyi a ri endleke a ha ri kona.

¹⁸Hikwalaho ntwanano lowo rhanga, na wona, a wu sunguriwanga wu nga ri na ngati.

¹⁹Hikuva Muxe, kuteloko a byerile tiko hinkwaro ku lerisa hinkwako ka nawu, u teke ngati ya marhole ni ya swiphongo, yi nga ni mati, ni voya lebyo tshwuka, ni hisopa, a xuva yona buku, ni tiko hinkwaro, a ku:

²⁰“Hi leyi ngati ya ntwanano lowu Xikwembu xi nga mi lerisa wona.”

²¹Kutani hi mukhuva wolowo, a xuva, na yona tabernakela hi ngati, ni swibya hinkwaswo swa ntirho.

²²Kutani hi nawu, swilo leswi hlantswiwaka hi ngati, swi lave ku va swilo hinkwaswo; kambe loko ngati yi nga halatiwanga, a ku na ku rivaleriwa ka swidyoho.

²³Kunene a swi fanekela leswaku swilo leswi fanisaka swa le tilweni swi hlantswiwa hi mukhuva wolowo, kambe loko swi ri swa le tilweni, a swi fanela ku hlantswiwa hi magandzelo lama tlurisaka walawo.

²⁴Hikuva Kriste a nga nghenanga evukwetsimelweni lebyi nga endliwa hi mavoko, lexi nga xifaniso xa lebyinene, kambe u nghenile etilweni ra xiviri, ku ya humelela emikarhini leyi emahlweni ka Xikwembu hikwalaho ka hina;

²⁵swi nga ri leswaku a tiendla kangani mhamba kukotisa muprista lonkulu, loko a nghena evukwetsimelweni hi lembe rin'wana ni rin'wana, a tamele ngati leyi nga riki ya yena,

²⁶hikuva loko a swi nga ri tano, a a fanele ku twa ku vaviseka kanyingi, ka hari mpfhuka misava yi tumbuluka; kambe sweswi, kuteloko mikarhi yi hetisekile, u humelele kan'we ku herisa ku dyoha hi ku tiendla gandzelo.

²⁷Kutani kukotisa loko ku lerisiwe leswaku vanhu hinkwavo va fa kan'we, endzhaku ka swona ku va ku avanyisiwa;

²⁸hi mukhuva wolowo, na yena Kriste, kuteloko a tiendlile mhamba kan'we ku susa ku dyoha ka lavo tala, a ta humelela ra vumbirhi a nga ha ri na swidyoho, eka lava n'wi languteleke leswaku a va hanyisa.