Read tsonga Yakobo 4 Bible Online

Yakobo 4 - tsonga bible

Yakobo 4

¹Ku lwa ku huma kwihi exikarhi ka n'wina, ni ku hambana ku huma kwihi xana? Xana a ku humi eku naveleni ka n'wina loku lwaka eswirhweni swa n'wina?

²Ma navela, kambe a mi na nchumu; ma dlaya, mi ni mona, kambe a mi swi koti ku kuma nchumu; mi ni ku hambana ni ku lwa, kambe a mi na nchumu, hikuva a mi komberi;

³ma kombela, kambe a mi nyikiwi, hikuva mi kombela hi mukhuva lowo biha, leswaku mi ta kuma swa ku korwisa ku navela ka n'wina.

⁴Vavanuna ni vavasati va vuoswi, xana a mi swi tivi leswaku ku rhandza ka misava i ku venga Xikwembu xana? Hikwalaho, mani na mani la tinyiketaka eku rhandzeni ka misava u tiendla nala wa Xikwembu.

⁵Xana mi ringanisa leswaku Matsalwa ma vula swahava xana? Moya lowu akeke eka hina, xana wu ni ku navela loku yisaka eku kalaleni xana?

⁶Kasi wu hi engetela tintswalo hikwalaho wu nge: “Xikwembu xi alela lava tikurisaka, kambe xi tsetselela lava titsongahataka.”

⁷Hikwalaho, tivekani ehansi ka Xikwembu; alelani Diyavulosi, kutani u ta suka eka n'wina.

⁸Tshinelelani Xikwembu, kutani xi ta mi tshinelela. Hlambani mandla, n'wina vadyohi; na n'wina va timbilu timbirhi hlantswani timbilu ta n'wina.

⁹Mi va ni nhlomulo, mi rila, mi kolola; mahleko ya n'wina a ma hundzuke swirilo, ni ku tsaka ka n'wina a ku hundzuke gome.

¹⁰Titsongahateni emahlweni ka Hosi, kutani yi ta mi tlakusa.

¹¹Mi nga tshuki mi hlevana, vamakwerhu; la hlevaka makwavo, kumbe la avanyisaka makwavo, u hleva nawu, kambe u avanyisa nawu; kutani loko u avanyisa nawu, a ku muhlayisi wa nawu, kambe u muavanyisi wa wona.

¹²Ku ni un'we a nga muveki wa nawu ni muavanyisi; hi yena la nga ni matimba ya ku hlayisa ni ku lovisa. Wena-ke, u mani la avanyisaka van'wana xana?

¹³Sweswi, ndzi ta eka n'wina lava nge: “Namuntlha, kumbe mundzuku, hi ta famba hi ya emutini wo karhi, hi ya pindzuka lembe kona, hi bindzula, hi kuma xuma”;

¹⁴n'wina vanhu lava nga ti tiviki swa mundzuku; hikuva vutomi bya n'wina i yini-ke? I hunguva leyi vonakaka hi nkarhi wu nga ri wungani, kutani yi hangalaka.

¹⁵Kasi mi fanele ku vulavula, mi ku: “Loko Hosi yi swi rhandza, loko ha ha hanya, hi ta endla swo karhi ni swo karhi.”

¹⁶Kambe sweswi, ma tidzunisa hi ku tikukumuxa ka n'wina: Ku tidzunisa loko tano ku bihile hinkwako.

¹⁷Loko swi ri tano, la tivaka ku endla leswo saseka, kambe a nga swi endli, u ni vudyoho. Ku tshinyiwa vafuwi lava nga lulamangiki.