Read tsonga 1 Petro 2 Bible Online

1 Petro 2 - tsonga bible

1 Petro 2

¹Hikwalaho, tshikani lunya hinkwaro, ni ku xisa hinkwako, ni ku kanganyisa, ni mona, ni ku lumbeta hinkwako,

²kutani mi lava ngopfu, kukota vana lava ha ku tswariwaka, ntswamba lowunene wa Rito, leswaku mi kula ha wona eku hlayisekeni;

³loko kunene mi nantswile vunene bya Hosi.

⁴Hi yena loyi, loko mi n'wi tshinelele, ri nga ribye leri hanyaka, leri nga cukumetiwa hi vanhu, kambe eka Xikwembu, ri nga leri hlawuriweke, leri pfumariwaka;

⁵na n'wina, kukota maribye lama hanyaka, ma akiwa, mi va yindlu ya moya leswaku mi ta va vaprista lavo kwetsima ku ta humesa magandzelo ya moya lama tsakisaka Xikwembu ha Yesu Kriste.

⁶Hikwalaho, ku tsariwile Matsalweni leswaku: “Vonani, ndzi yimisa eSiyoni ribye ra yinhla, leri hlawuriweke, leri pfumariwaka; la pfumelaka eka rona, a nga ka a nga khomiwi hi tingana.”

⁷Kunene ku ta va ku dzunisa ka n'wina lava pfumeleke, “kambe lava tiarisaka, ribye leri cukumetiweke hi vaaki, ri va hundzukele ribye lerikulu ra yinhla,” ni “ribye leri va khunguvanyekaka ha rona”;

⁸va nga lava khunguvanyekaka hi Rito, va tiarisa, kutani hi swona leswi va swi averiweke.

⁹Kambe loko mi ri n'wina, mi rixaka leri hlawuriweke, mi vaprista va Hosi, mi tiko lero kwetsima, tiko leri xaviweke, leswaku mi twarisa matimba ya la mi vitaneke ku huma emunyameni, mi ya nghena eku vonakaleni ka yena loku hlamarisaka;

¹⁰n'wina lava khale a mi nga ri tiko, kambe sweswi, mi tiko ra Xikwembu; n'wina lava nga tsetseleriwangiki, kambe sweswi, mi tsetseleriwile.

¹¹Varhandziwa, ndza mi khongotela hi laha mi nga vaendzi ni valuveri, ndzi ku: Alelani ku navela ka nyama loku lwaka ni moya,

¹²mi va ni mikhuva yo saseka exikarhi ka matiko, leswaku timhaka leti va mi hlevaka ha tona kukota loko ngi mi ri vadyohi, va ta tiva ku dzunisa Xikwembu ha tona, siku xi nga ta va endzela, hikwalaho ka mitirho leyo saseka leyi va nga ta va va yi vonile eka n'wina.

¹³Loko swi ri tano, hikwalaho ka Hosi, tivekeni ehansi ka hinkwavo lava vekiweke eku fumeni, exikarhi ka vanhu; hambi yi ri hosi, hikuva hi yona leyi nga ehenhla ka van'wana;

¹⁴hambi ti ri tindhuna, hikuva hi tona leti rhumiwaka hi yona ku ta avanyisa lava endlaka swo biha ni ku dzunisa lava endlaka swinene.

¹⁵Hikuva hi kona ku rhandza ka Xikwembu, leswaku hi ku endla leswinene, mi miyeta vuphukuphuku bya vanhu lava nga tiviki nchumu;

¹⁶mi nga lava tshunxiweke, kambe ku tshunxeka ka n'wina ku nga tshuki ku va xisirhelelo xa ku endla swo biha, kambe mi va makhumbi ya Xikwembu.

¹⁷Mi va ni xichavo eka vanhu hinkwavo; rhandzani vamakwenu; chavani Xikwembu; mi va ni xichavo eka hosi ya tiko.

¹⁸Vatirhi, yingisani veni va n'wina hi xichavo hinkwaxo, va nga ri lavanene ni lavo olova ntsena, kambe ni lavo nonon'hwa.

¹⁹Hikuva i mhaka ya ku khensa loko munhu, hikwalaho ka ripfalo leri nga eka Xikwembu, a yingisela mahlomulo, a ri karhi a vaviseka, a nga ri na nandzu.

²⁰Hikuva ku dzunisiwa ku kwihi xana, loko mi tiyisela ku phakatiweni, mi va lava dyoheke? Kambe loko mi endlile swinene, kutani mi twa ku vaviseka hi ku tiyisela, hi yona mhaka leyi khensekaka emahlweni ka Xikwembu.

²¹Kambe hi leswi mi vitaneriweke swona, hikuva Kriste, na yena, u twisiwe ku vaviseka hikwalaho ka n'wina, a ri karhi a mi siyela xikombiso leswaku mi ta landza mitila ya yena;

²²yena la nga dyohangiki, loyi kambe mavunwa ma nga kumiwangiki enon'wini wa yena;

²³ni loko a rhukaniwa, a nga tlhelangiki a rhukana, hambi a twisiwa ku vaviseka, a nga xungetangiki, kambe a tinyiketa la avanyisaka hi ku lulama;

²⁴hi yena la rhwaleke swidyoho swa hina emirini wa yena exihambanweni, leswaku hi fa hitlhelo ra swidyoho kambe hi hanyela ku lulama; loyi kambe mi horisiweke hi matshimbi ya yena.

²⁵Hikuva a mi fana ni tinyimpfu leti lahlekeke, kambe sweswi, mi tlhele mi hundzukela eka murisi ni mulanguteri wa mimoya ya n'wina.