Read tsonga 1 Petro 3 Bible Online

1 Petro 3 - tsonga bible

1 Petro 3

¹Hi mukhuva wolowo, na n'wina, vavasati, yingisani vanuna va n'wina, leswaku hambi van'wana va nga va kona lava nga yingisiki rito, va ta kokiwa hi mikhuva ya vasati va vona ku nga ri hi rito,

²loko va ta va va vonile mikhuva ya n'wina leyi tengeke, leyi nga ni xichavo.

³Ku tibombisa ka n'wina ku nga tshuki ku va ka le handle, hi misisi leyi horhiweke, ni swibombiso swa nsuku kumbe ku tibombisa hi tinguvu;

⁴kambe a ku ve hi munhu wa xihundla xa mbilu, la nga onhakiki, a nga ni moya wa ku olova ni ku rhula lowo pfumariwaka ngopfu emahlweni ka Xikwembu.

⁵Hikuva khale vavasati lavo kwetsima, lava tshembeke Xikwembu, na vona, a va tibombisisa xi sweswo, va ri karhi va yingisa vanuna va vona,

⁶kukotisa Sara la nga yingisa Abrahama, a n'wi vula hosi ya yena, loyi mi nga vana va yena, loko mi endla swinene, mi nga tshukisiwi ha nchumu.

⁷Hi mukhuva wolowo, na n'wina vavanuna, tshamani ni vasati va n'wina hi mukhuva lowu sasekeke, mi tiva leswaku va kotisa swibya leswi nga tiyangiki, mi va ni xichavo, hikuva na vona, swin'we na n'wina, va ta dya ndzhaka ya tintswalo ta vutomi, leswaku ku khongela ka n'wina ku nga ti tsandzekisiwa.

⁸Sweswi, mi va ni ku anakanya ku ri kun'we, mi tsetselelana, mi rhandzana ni vanakuloni, mi va ni tintswalo ni musa.

⁹Mi nga tlheriseli swo biha hi swo biha hambi ku ri ku rhukana hi ku rhukana, kambe mi katekisa, hikuva mi vitaneriwe swona, leswaku mi ta dya ndzhaka ya ku kateka.

¹⁰Hikuva “la rhandzaka ku hanya ni ku vona masiku ya ku tsaka, a a tshimbise ririmi ra yena ku vula swo biha, ni milomu ya yena ku vulavula hi ku kanganyisa;

¹¹a a fularhele leswo biha, a endla leswinene, a lava ku rhula, a ku lavisisa.

¹²Hikuva mahlo ya Hosi ma languta lava lulameke, ni tindleve ta yona ti yingisela ku khongela ka vona; kambe mombo wa Hosi wu karihela lava endlaka leswo biha.”

¹³Kutani i mani la nga ta mi endla leswo biha loko mi lavisisa leswinene?

¹⁴Hikuva hambi, na swona, mi nga twisiwa ku va viseka hikwalaho ka ku lulama, mi katekile; mi nga tshukisiwi hi ku va chava, mi nga pfilunganyiwi;

¹⁵kambe mi hlawula Hosi, a nga Kriste, etimbilwini ta n'wina, mi tilunghisa hi masiku ku tihlamulela hi musa ni xichavo eka hinkwavo lava mi vutisaka ku tshemba ka n'wina;

¹⁶mi va ni ripfalo lerinene, leswaku timhaka leti va mi lumbetaka ha tona kukotisa loko ngi mi ri swidyohi, va khomiwa hi tingana eka tona, lava hlevaka mikhuva ya n'wina leyi nga eka Kriste.

¹⁷Hikuva loko ku ri ku rhandza ka Xikwembu leswaku mi twisiwa ku vava, swi nga tlula hi loko mi ku yingisela mi ri karhi mi endla swinene ku nga ri ku endla swo biha.

¹⁸Hikuva na yena Kriste, u twisiwile ku vava kan'we hikwalaho ka swidyoho, yena la lulameke ematshan'weni ya lavo homboloka, leswaku a tiva ku hi tisa eka Xikwembu; a nga yena la dlayiweke hitlhelo ra nyama, kambe u hanyisiwile hi Moya;

¹⁹lowu a engeteke a famba ha wona ku ya vitana mimoya leyi ingi a yi ri ekhotsweni,

²⁰leyi ingi yi tiarisa khale loko Xikwembu xa ha langutele hi ku leha ka mbilu emikarhini ya Nowa, areka yi ri karhi yi akiwa, leyi vanhu va nga ri vangani, va ntlhanu na vanharhu va ponisiweke ha yona ematini;

²¹kutani wa hi ponisa ni namuntlha hi ku khuvula, yi nga mhaka leyi nga fanisiwa khale, ku nga ri hi ku hlantswa thyaka ra miri, kambe ku ri ku tiboha hi ripfalo lerinene eka Xikwembu, hi ku pfuka ka Yesu Kriste,

²²la nga ya etikweni, la nga evokweni ra xinene ra Xikwembu; tintsumi, ni tihosi, ni ku fuma swi ri karhi swi vekiwa ehansi ka yena.