Read tsonga 1 Yohane 2 Bible Online

1 Yohane 2 - tsonga bible

1 Yohane 2

¹Vana vanga, ndzi mi tsalele timhaka leti, leswaku mi nga tshuki mi dyoha; kambe kungakuloko munhu a dyohile, hi ni Muyimeri eka Tatana, a nga Yesu Kriste la lulameke.

²Kutani hi yena, hi xiviri xa yena, a nga mhamba ya swidyoho swa hina; swi nga ri swa hina ntsena, kambe ni swa vanhu hinkwavo.

³Kutani laha hi tivaka leswaku ha n'wi tiva, hi loko hi hlayisa milawu ya yena.

⁴La nge: “Ndza n'wi tiva,” kasi a nga hlayisi milawu ya yena wa hemba, kutani ntiyiso a wu kona eka yena.

⁵Kambe, kungakuloko munhu a hlayisa rito ra yena, rirhandzu ra Xikwembu ri hetisekile eka yena swinene; hikwalaho hi tivaka leswaku hi le ka yena.

⁶La vulaka leswaku u tshame eka yena, u fanele ku famba hi mukhuva lowu na yena a fambeke ha wona.

⁷Vamakwerhu, a ndzi mi tsaleri ku lerisa lokuntshwa, kambe i ku lerisa ka khale loku ngi mi ri na kona eku sunguleni; ku lerisa kuloko ka khale i rito leri mi ri tweke.

⁸Hambiswiritano, ndzi mi tsalela ku lerisa lokuntshwa, wu nga ntiyiso eka yena ni ka n'wina, hikuva munyama wu hundzile, kutani ku vonakala ka xiviri ku humelele.

⁹La vulaka leswaku u le ku vonakaleni, kasi a ri karhi a venga makwavo, wa ha ri emunyameni, ni sweswi.

¹⁰La rhandzaka makwavo u tshame eku vonakaleni, kutani ku khunguvanyisa ku hava eka yena.

¹¹Kambe la vengaka makwavo u le munyameni, na swona u famba emunyameni, kutani a nga tivi laha a yaka kona, hikuva munyama wu dlele mahlo ya yena.

¹²Vana lavatsongo, ndza mi tsalela hikuva mi rivaleriwile swidyoho hikwalaho ka vito ra yena.

¹³Vatatana, ndza mi tsalela, hikuva mi tivile la nga kona kaharhi eku sunguleni. Lavantshwa, ndza mi tsalela, hikuva mi hlurile lowo biha. Vana, ndzi mi tsalele, hikuva mi tiva Tatana.

¹⁴Vatatana, ndzi mi tsalela, hikuva mi tivile la nga kona ka ha ri eku sunguleni. Lavantshwa, ndzi mi tsalela, hikuva mi ni matimba, kutani rito ra Xikwembu ri tshame eka n'wina, kambe mi hlurile lowo biha.

¹⁵Mi nga rhandzeni misava, hambi swi ri leswi nga emisaveni; kungakuloko munhu a rhandza misava, rirhandzu ra Tatana a ri kona eka yena.

¹⁶Hikuva hinkwaswo swa la emisaveni, ku navela ka nyama, ni ku navela ka mahlo ni ku tidzunisa ka vutomi, a swi humi eka Tatana, kambe swi huma emisaveni.

¹⁷Kambe misava ya hundza, ni ku navela ka yona; kambe la endlaka ku rhandza ka Xikwembu, u tshama hilaha ku nga heriki.

¹⁸Vana, i nkarhi wa makumu kutani kukota leswi mi swi tweke leswaku Antikriste u ta ta, ni sweswi va Antikriste lavo tala va kona; hikwalaho hi tivaka leswaku i nkarhi wa makumu.

¹⁹Va humile exikarhi ka hina, kambe a va nga ri va ka hina, hikuva loko ngi va ri va ka hina, ingi va tshamile na hina; kambe ku humelerile sweswo leswaku swi ta vonaka leswaku hinkwavo a hi va ka hina.

²⁰Loko mi ri n'wina, mi amukerile ku cheriwa hi la kwetsimeke, kutani mi tiva hinkwaswo.

²¹Ndzi mi tsalele swi nga ri hi leswi mi nga tiviki ntiyiso kambe hi leswi mi wu tivaka, kutani a ku na vunwa lebyi humaka entiyisweni.

²²Wa mavunwa i mani, loko a nga ri la landzulaka leswaku Yesu i Kriste. La nga Antikriste hi loyi a landzulaka Tatana ni N'wana.

²³Un'wana ni un'wana la landzulaka N'wana, a nga na Tatana, kambe la pfumelaka eka N'wana, u na yena Tatana.

²⁴Loko mi ri n'wina, lexi mi xi tweke ka ha ri eku sunguleni, a xi tshame eka n'wina, na n'wina mi ta tshama eka N'wana ni le ka Tatana.

²⁵Kutani ku tshembisa loku a hi nyikeke kona, i vutomi lebyi nga heriki.

²⁶Ndzi mi tsalela timhaka leti, hikwalaho ka lava mi xisaka.

²⁷Kambe loko mi ri n'wina, ku cheleriwa loku mi ku amukeleke eka yena ku tshame eka n'wina, kutani a swi mi faneri ku dyondzisiwa hi munhu, kambe hilaha ku cheleriwa kuloko ku mi dyondzisaka hinkwaswo leswi nga ntiyiso, ma nga ri mavunwa, mi ta tshama eka yena hilaha ku mi dyondziseke.

²⁸Kutani sweswi, vana, tshamani eka yena, leswaku siku a humelelaka, hi ta va ni ku tshemba loku tiyeke, hi nga tshuki hi khomiwa hi tingana emahlweni ka yena, eku humeleleni ka yena.

²⁹Loko mi tiva leswaku u lulamile, tivani leswaku un'wana ni un'wana la endlaka leswi lulameke, u tswariwe hi yena.