Read tsonga 1 Yohane 4 Bible Online

1 Yohane 4 - tsonga bible

1 Yohane 4

¹Varhandziwa, mi nga tshuki mi pfumela mimoya hinkwayo, kambe mi ringeta mimoya ku tiva xana yi huma eka Xikwembu, hikuva vaprofeta va mavunwa va tile emisaveni, va tele.

²Tivani Moya wa Xikwembu hakona: Moya wun'wana ni wun'wana lowu vulaka leswaku Yesu Kriste u tile enyameni, i wa Xikwembu.

³Kambe moya wun'wana ni wun'wana lowo nga vuriki leswaku Yesu Kriste u tile enyameni a hi wa Xikwembu; hi wona moya wa Antikriste, loyi mi n'wi twaka leswaku wa ta, kambe, ni sweswi, wu kona emisaveni.

⁴Loko mi ri n'wina, vana vanga, mi va Xikwembu, kutani mi va hlurile hikuva la nga na n'wina, u tlula hi vukulu la nga emisaveni.

⁵Vona i va misava; hikwalaho va vulavulaka hi swa misava; kutani misava ya va yingisa.

⁶Hina hi va Xikwembu; la tivaka Xikwembu wa hi yingisa; la nga riki wa Xikwembu a nga hi yingisi; hikwalaho hi tivaka moya lowu nga wa ntiyiso, ni moya lowu nga wa mavunwa.

⁷Varhandziwa, a hi rhandzaneni, hikuva rirhandzu ri huma eka Xikwembu kutani un'wana ni un'wana la nga ni rirhandzu, u tswariwe hi Xikwembu, na swona u tiva Xikwembu.

⁸La nga rhandziki, a nga tivi Xikwembu; hikuva Xikwembu i rirhandzu.

⁹Rirhandzu ra Xikwembu eka hina ri vonakile hakona; hi leswi Xikwembu xi rhumeke N'wana wa xona, la nga tswariwa a ri swakwe emisaveni, leswaku hi hanya ha yena.

¹⁰Laha rirhandzu ri nga rona, hi leswi ku nga riki hina lava rhandzeke Xikwembu, kambe hi xona xi hi rhandzeke, kutani xi rhumile N'wana wa xona, leswaku yi va mhamba ya swidyoho swa hina.

¹¹Varhandziwa, loko Xikwembu xi hi rhandzile swonghasi, na hina, hi fanele ku rhandzana.

¹²A ku na munhu la tshamaka a vona Xikwembu, ni siku ni rin'we; loko hi rhandzana, Xikwembu xi tshama eka hina, kutani rirhandzu ra xona ri hetisekile eka hina.

¹³Leswi hi tivaka ha swona leswaku hi tshama eka xona, na xona eka hina, hi loko xi hi nyikile moya wa xona.

¹⁴Kutani, na hina, hi swi vonile, hi va hi tiyisa leswaku Tatana u rhumile N'wana leswaku a va Mulondzovoti wa misava.

¹⁵Un'wana ni un'wana la vulaka leswaku Yesu i N'wana wa Xikwembu, Xikwembu xi tshama eka yena, na yena u tshama eka Xikwembu.

¹⁶Kutani na hina hi swi tivile, hi va hi pfumela rirhandzu leri Xikwembu xi hi rhandzeke ha rona. Xikwembu xi ni rirhandzu, kutani la tshamaka erirhandzwini, u tshama eka Xikwembu, na xona Xikwembu xi tshama eka yena.

¹⁷Laha rirhandzu ri hetisekeke hakona eka hina leswaku hi va ni ku tshemba loku tiyeke hi siku ra ku avanyisa, hileswaku lexi xi nga xona, na hina hi va xona emisaveni leyi.

¹⁸A ku na nchavo erirhandzwini, kambe rirhandzu leri hetisekeke ri susa ku chava; hikuva ku chava ku ni ku biwa, kutani la chavaka a nga hetisekanga erirhandzwini.

¹⁹Loko hi ri hina ha xi rhandza, hikuva hi xona xi rhangeke xi hi rhandza.

²⁰Kungakuloko un'wana a ku: “Ndzi rhandza Xikwembu,” kasi a venga makwavo, u ni vunwa; hikuva la nga rhandziki makwavo loyi a n'wi vonaka, a nga swi tivisa ku yini ku rhandza Xikwembu lexi a nga xi voniki?

²¹Kutani ku lerisa loku hi ku nyikiweke hi xona, hileswaku: “La rhandzaka Xikwembu, u rhandza ni makwavo.”