Read tsonga Vaavanyisi 12 Bible Online

Vaavanyisi 12 - tsonga bible

Vaavanyisi 12

¹Kutani vavanuna va Efrayimi va hlengeletana va hundzela tlhelo ra le n'walungwini, va ta, va ku eka Yefta: “Siku u yeke ku ya lwa ni vana va Amoni, a ku hi vitananga ha vini, leswaku hi famba na wena? Sweswi hi ta ku hisela endlwini ya wena.”

²Yefta a ku eka vona: “Mina ni vanhu va mina a hi ri ni ku kanetana lokukulu ni vana va Amoni, ndzi mi vitanile kambe a mi ndzi lamulelanga emavokweni ya vona.

³Kuteloko ndzi vona leswaku a mi ndzi lamuleli, a ndzi vulanga nchumu hi ku hanya ka mina, ndzi yile emahlweni ka vana va Amoni, kutani Yehovha a va nyiketa emavokweni ya mina. Mi tele yini, namuntlha, ku ta lwa na mina?”

⁴Kutani Yefta a hlengeleta vavanuna hinkwavo, Vagiliyadi, a lwa ni Vaefrayimi, vavanuna Vagiliyadi va hlula Vaefrayimi hikuva a va te: “N'wina Vagiliyadi mi vahlongoriwa Vaefrayimi, mi tshamile exikarhi ka Efrayimi na Manase.”

⁵Kutani Vagiliyadi va hlongorisa Vaefrayimi, va ya yima emahlalukweni ya Yordani loko munhu un'wana wa ka Efrayimi la balekaka, a ku: “Ndza ha pela,” vavanuna va Giliyadi va n'wi vutisa, va ku: “Xana u Muefrayimi, xana?” Yeloyi loko a ku: “E-e,”

⁶va ku eka yena: “Vula Xibolete,” yena a ku: “Sibolete,” hikuva a a nga xiyi ku vulavula swinene; kutani va n'wi khoma, va n'wi dlaya emahlalukweni ya Yordani. Enkarhini wolowo, ku dlayiwa Vaefrayimi va 42 000.

⁷Yefta a avanyisela Israele hi malembe ya ntlhanu na rin'we. Kutani Yefta, Mugiliyadi, a fa, a lahliwa emutini wun'wana wa Giliyadi.

⁸Endzhaku ka yena, Ibisani, wa Betlehema, a avanyisela Israele.

⁹A a ri ni vana va xinuna va 30; a tekisa vana va yena vanhwana va 30, kambe a lavela vana va yena va xinuna vanhwana va 30 ehandle.

¹⁰A avanyisela Israele hi malembe ya ntlhanu na mambirhi; kutani Ibisani a fa, a lahliwa eBetlehema.

¹¹Endzhaku ka yena, Elone, wa Zebuloni, a avanyisela Israele. A avanyisela Israele hi malembe ya khume.

¹²Kutani Elone, wa Zebuloni, a fa, a lahliwa eAyaloni, etikweni ra Zebuloni.

¹³Endzhaku ka yena, Abidoni, n'wana Hilele, wa Piratoni, a avanyisela Israele.

¹⁴A a ri ni vana va xinuna va 40 ni vatukulu va 30; lava khandziyaka timbhongolo ta 70. A avanyisela Israele hi malembe ya ntlhanu na manharhu.

¹⁵Kutani Abidoni, n'wana Hilele, wa Piratoni, a fa, a lahliwa ePiratoni, etikweni ra Efrayimi, entshaveni ya Vaamaleke.