Read tsonga Vaavanyisi 2 Bible Online

Vaavanyisi 2 - tsonga bible

Vaavanyisi 2

¹Kutani ntsumi ya Yehovha yi suka eGiligala yi tlhandlukela eBokimi, yi ku: “Ndzi te ndzi ta mi humesa eEgipta, ndzi mi tisa etikweni leri ndzi hlambanyeke leswaku ndzi ta ri nyika vatata wa n'wina; a ndzi te, ndzi nga ka ndzi nga onhi ni siku ni rin'we ntwanano wa mina lowu ndzi wu endleke na n'wina.

²A ndzi ku: ‘Na n'wina mi nga ka mi nga endli ntwanano ni lava akeke etikweni leri, kambe mi mbundzuxa tialitari ta vona.’ Kambe a mi yingisangi rito ra mina. Mi endlele yini sweswo xana?

³Loko swi ri tano, ndzi te: ‘Ndzi nga ka ndzi nga va hlongorisi emahlweni ka n'wina; va ta kotisa mitwa ematlhelweni ya n'wina, ni swikwembu swa vona swi ta va mitlhamu eka n'wina.’ ”

⁴Kakuloko ntsumi ya Yehovha ya ha vulavula timhaka teto eka vana va Israele hinkwavo, tiko ri kolola hi ku rila.

⁵Hikwalaho, va thya xivandla xexo vito ra Bokimi (varili), kutani va humesela Yehovha magandzelo kona.

⁶Yoxuwa, kuteloko a tlherisile tiko, vana va Israele va muka, un'wana ni un'wana endzhakeni ya yena ku fuma tiko.

⁷Kutani tiko ri tirhela Yehovha hi masiku hinkwawo ya Yoxuwa, ni masiku hinkwawo lawa vakulukumba va nga hanya ha wona endzhaku ka Yoxuwa, va ri lava voneke mitirho hinkwayo leyikulu leyi Yehovha a yi endleleke vana va Israele.

⁸Kutani Yoxuwa, n'wana Nuni, nandza wa Yehovha, a fa a ri ni malembe ya dzana ni khume.

⁹A lahliwa etikweni ra ndzhaka ya yena, eTiminata-Heresi, entshaveni ya Efrayimi, hitlhelo ra n'walungu ka ntshava ya Gaaxi.

¹⁰Na vona vanhu va nkarhi lowuya hinkwavo, va tlhelela eka vatata wa vona, kutani ku humelela vanhu va nkarhi lowu, lava nga tivangiki Yehovha, hambi yi ri mitirho leyi a yi endleleke Israele.

¹¹Kutani Vaisraele va endla leswo biha emahlweni ka Yehovha, va tirhela Baali.

¹²Va fularhela Yehovha, Xikwembu xa vatata wa vona, la nga va humesa etikweni ra Egipta; va landzela swikwembu swin'wana, swi nga swikwembu swa matiko lawa ma va rhendzeleke, va swi khinsamela va karihisa Yehovha.

¹³Va fularhela Yehovha, va tirhela Baali ni va Astarte.

¹⁴Kutani ku kariha ka Yehovha ku pfurhela Vaisraele, a va nyiketa emavokweni ya vaonhi lava va onhaka, kutani a va nyiketa emavokweni ya valala va vona lava va va rhendzeleke; va tsandzeka ku yima emahlweni ka valala va vona.

¹⁵Hinkwako laha va yaka kona, voko ra Yehovha a ri lwa na vona, hilaha Yehovha a nga vula hakona, ni hilaha Yehovha a va hlambanyeleke hakona, kutani va va ekhombyeni lerikulu.

¹⁶Hambiswiritano, Yehovha a va humesela vaavanyisi, va va lamulela emavokweni ya lava va va onhaka.

¹⁷Na swona a va yingisangi vaavanyisi va vona, kambe va tinyiketa eka swikwembu swin'wana, va swi khinsamela, kutani va hatlisa ku hambuka endleleni leyi vatata wa vona va nga famba ha yona, loko va ri karhi va yingisa milawu ya Yehovha, kambe vona a va endlanga swona.

¹⁸Kakuloko Yehovha a a va humesela vaavanyisi, Yehovha a a ri ni muavanyisi, a a va lamulela emavokweni ya valala va vona hi masiku hinkwawo ya muavanyisi, hikuva Yehovha a a hundzuka hi ku twa swirilo swa vona loko va ririsiwa hi lava va va xanisaka ni lava va va karhataka.

¹⁹Loko muavanyisi a file, a va engeta va tionha va tlula vatata wa vona hi ku landzelela swikwembu swin'wana, leswaku va swi tirhela ni ku khinsama emahlweni ka swona, va nga hunguti nchumu eka mitirho ya vona ni mikhuva ya vona leyo nonon'hwa.

²⁰Kutani ku kariha ka Yehovha ku pfurhela Vaisraele, a ku: “Leswi tiko leri ri onheke ntwanano lowu ndzi wu endleke ni vatata wa vona ri nga yingisanga rito ra mina,

²¹na mina ndzi nga ka ndzi nga hlongorisi munhu ni un'we wa matiko lama siyiweke hi Yoxuwa siku a faka.

²²Ndzi ta ringa Vaisraele ha wona, ndzi ta vona loko kumbe va ta hlayisa ndlela ya Yehovha ku famba ha yona, kukotisa leswi vatata wa vona va nga yi hlayisa, kumbe a swi nga vi tano.”

²³Hikwalaho Yehovha a siya matiko lawa, a nga hatlisi ku ma hlongorisa, hikuva a nga ma nyiketanga emavokweni ya Yoxuwa.