Read tsonga Vaavanyisi 3 Bible Online

Vaavanyisi 3 - tsonga bible

Vaavanyisi 3

¹Hi wona matiko lawa Yehovha a nga ma siya ku ringa ha wona Vaisraele, va nga hinkwavo lava nga vonangiki tinyimpi hinkwato ta Kanana,

²leswaku tinyimba ta vana va Israele ti ta tiva ku dyondza nyimpi, ti ri leti nga tivangiki tinyimpi to sungula:

³I tihosi ta ntlhanu ta Vafilista, ni Vakanana hinkwavo, ni Vasidoni ni Vahivhi, lava akeke entshaveni ya Lebanoni, ku sukela entshaveni ya Baala-Hermoni ku yisa eHamata.

⁴Matiko lawa ma va kona ku ringa Vaisraele, hileswaku ku ta tiviwa loko kumbe va ta yingisa milawu leyi Yehovha a nga yi lerisa vatata wa vona ha Muxe.

⁵Loko swi ri tano, vana va Israele va sala va akile exikarhi ka Vakanana, ni Vahiti, ni Vaamori, ni Vaperesi, ni Vahivhi, ni Vayebusi.

⁶Kutani va tekana ni vana va vamatiko wolawa, va nyiketa ni vana va vona leswaku na vona va va teka, kutani va tirhela swikwembu swa vamatiko.

⁷Kutani vana va Israele va endla leswo biha emahlweni ka Yehovha, va rivala Yehovha, Xikwembu xa vona, va tirhela Baali na Axera.

⁸Ku kariha ka Yehovha ku pfurhela Vaisraele, kutani a va nyiketa emavokweni ya Kuxani-Rixitayimi, hosi ya Mesopotamiya; vana va Israele va fumiwa hi Kuxani-Rixitayimi hi malembe ya ntlhanu na manharhu.

⁹Kutani vana va Israele va huwelela eka Yehovha; Yehovha a humesela vana va Israele mulamuleri loyi a va lamulelaka, a nga Otiniele, n'wana Kenazi, ndzisana ya Kalebe.

¹⁰Moya wa Yehovha wu va eka yena; a avanyisa ta Israele, a huma nyimpi; kutani Yehovha a nyiketa Kuxani-Rixitayimi hosi ya Mesopotamiya emavokweni ya yena. Kutani voko ra yena ri hlula Kuxani-Rixitayimi.

¹¹Kutani tiko ri etlela hi malembe ya mune wa makume. Kutani Otiniele, n'wana Kenazi, a fa.

¹²Kutani vana va Israele va vuyela kambe va endla leswo biha emahlweni ka Yehovha; Yehovha a pfuxa Egiloni, hosi ya Mowabu, leswaku a lwa ni Vaisraele hikuva va endlile leswo biha emahlweni ka Yehovha.

¹³Kutani Egiloni a tihlengeletela vana Vaamoni, ni Vaamaleke, a ya hlula Vaisraele, a teka muti wa micindzu.

¹⁴Kutani vana va Israele va fumiwa hi Egiloni, hosi ya Mowabu, hi malembe ya 18.

¹⁵Kutani vana Vaisraele va huwelela eka Yehovha; Yehovha a va humesela mulamuleri, Ehudi, n'wana Gera, wa Benjamini, wanuna wa ximatsi. Kutani vana va Israele va rhumela ha yena ndzuvo eka Egiloni hosi ya Mowabu.

¹⁶Kutani Ehudi a tiendlela banga leri nga ni vukari hi matlhelo mambirhi, ku leha ka rona xi ri xisungunhu xin'we kutani a ri boha endzhumbini wa yena wa xinene ehansi ka nkhancu wa yena.

¹⁷Kutani a tisela Egiloni, hosi ya Mowabu, ndzuvo. Egiloni a a ri munhu la noneke ngopfu.

¹⁸Kuteloko Ehudi a hetile ku nyika Egiloni ndzuvo, a tlherisa vanhu lava teke ni ndzuvo.

¹⁹Loko a ri yena a tlhela hi le Pesilimi ekusuhi na Giligala, a ku: “Ndzi ni mhaka ya xihundla na wena hosi.” Kutani Egiloni a ku: “Miyelani!” Kutani vanhu hinkwavo lava ngi va ri kona eka yena, va suka eka yena.

²⁰Kutani Ehudi a n'wi tshinelela endlwini ya yena laha ku titimelaka, yi ri ya yena swakwe, kutani Ehudi a ku eka yena: “Ndzi ku tiserile mhaka ya Xikwembu.” Kwalaho Egiloni a suka exitshan'weni xa yena.

²¹Kutani Ehudi a yisa voko ra yena ra ximatsi, a khoma banga endzhumbini wa xinene wa yena, a n'wi tlhava ekhwirini.

²²Ni xitamelo xi nghena endzhaku ka nsimbhi, mafurha va manya nsimbhi, hikuva a nga humesanga banga ekhwirini ra yena kambe ri boxa ri humela hala.

²³Ehudi a huma hi rikupakupa, a pfalela hosi endlwini leyi nga ehenhla, a tiyisa rivanti hi mpfungura.

²⁴Kuteloko a humile, malandza ya Egiloni ma ta ta languta kutani ma vona timbanti ta yindlu leyi nga ehenhla ti pfariwe hi mpfungura; va ku: “Kumbe u tifunengetile milenge endlwini ya yena laha ku titimelaka.”

²⁵Va langutela sweswo, va ko va va ni tingana kutani leswi a nga pfuliki timbanti ta yindlu leyi nga ehenhla, va teka mpfungura, kuteloko, va pfurile va kuma n'wini wa vona a wile ehansi, a file.

²⁶Ehudi a baleka loko va ri karhi va rhendzelekarhendzeleka, a hundza emahlweni ka Pesilimi, a balekela eSeyira.

²⁷Kuteloko a fikile kona, a yimba nanga entshaveni ya Efrayimi, vana va Israele va ngirimela na yena entshaveni, a va rhangela emahlweni.

²⁸Kutani a ku eka vona: “Ndzi landzeni, hikuva Yehovha u nyiketile Vamowabu, valala va n'wina, emavokweni ya n'wina.” Kutani va ngirimela va n'wi landza, va ya yimelela emahlalukweni ya Yordani, ku lavana na Mowabu, va nga pfumeleri munhu ku pela.

²⁹Enkarhini wolowo, va dlaya Vamowabu lava laveke ku va 10 000, hinkwavo, va ri va matimba ni tinhenha; ku nga poni ni un'we.

³⁰Enkarhini wolowo, Vamowabu va tsongahatiwa hi Vaisraele, kutani tiko ri etlela hi malembe ya 80.

³¹Endzhaku ka Ehudi a ku ri na Xamgari, n'wana Anati, la nga dlaya Vafilista va 600 hi mbhingo wa tihavi; na yena a lamulela Israele.