Read tsonga Vaavanyisi 7 Bible Online

Vaavanyisi 7 - tsonga bible

Vaavanyisi 7

¹Kutani Yerubaali, la nga Gidiyoni a pfuka nimpundzu, ni vanhu hinkwavo lava ngi va ri na yena, va ya gova exihlobyeni xa Haroda, Mixaxa ya Vamidiyani, yona, a yi ri etlhelo ra en'walungwini ka Gidiyoni, kusuhi ni xitsunga xa More, enkoveni.

²Yehovha a ku eka Gidiyoni: “Vanhu lava u nga na vona va tele ngopfu, ndzi nga ka ndzi nga nyiketi Vamidiyani emavokweni ya vona, Vaisraele va nga ti tshuka va tidzunisa ematshan'weni ya ku dzunisa mina, va ku: ‘Hi tilamulerile hi mavoko ya hina.’

³Yana sweswi u ya byela vanhu, u ku: ‘La chavaka, ni la karheleke, a a tlhele, a a suke entshaveni ya Giliyadi.’ ” Hikwalaho-ke ku tlhela vanhu va 22 000, ku sala vanhu va 10 000.

⁴Yehovha a engeta a ku eka Gidiyoni: “Vanhu va ha tele ku tlurisa; u va yisa ematini, ndzi ta ku hlawulela kona lava nga ta famba na wena. Loyi ndzi nga ta ku byela, ndzi ku: ‘Loyi u ta famba na wena,’ u ta famba na yena, kutani un'wana ni un'wana loyi ndzi nga ta ku byela, ndzi ku: ‘Loyi a nga ka a nga fambi na wena,’ a nga ka a nga yi.”

⁵Kutani Gidiyoni a ngirimerisa vanhu ematini; Yehovha a ku eka Gidiyoni: “Un'wana ni un'wana la nga ta kapitela mati hi ririmi kukotisa mbyana, u n'wi veka etlhelo; u ta veka hitlhelo rin'wana, un'wana ni un'wana la nga ta khinsama hi matsolo ku orhovela.”

⁶Kutani ntsengo wa lava kapiteleke mati hi mavoko enon'wini, ma va madzana manharhu ya vavanuna, van'wana hinkwavo, va khinsama hi matsolo ku orhovela mati.

⁷Kutani Yehovha a ku eka Gidiyoni: “Ndzi ta mi lamulela hi vanhu lava va kapiteleke va madzana manharhu, ndzi ta nyiketa Vamidiyani emavokweni ya wena ha vona; van'wana hinkwavo a va titlhelele, un'wana ni un'wana ekaya ka yena.”

⁸Kutani lava madzana manharhu, va teka timbuva ta vona emavokweni ya vona, ni tinanga ta vona; Vaisraele van'wana hinkwavo Gidiyoni a va tlherisa, un'wana ni un'wana entsongeni wa yena; kambe ku sala vavanuna va madzana manharhu. Loko yi ri mixaxa ya Vamidiyani, a yi ri ehansi ka Yena enkoveni.

⁹Hi vusiku byebyo, Yehovha a ku eka yena: “Yima, u ngirimela emixaxeni, hikuva ndzi yi nyiketile emavokweni ya wena.

¹⁰Loko u chava ku ngirimela kona u ta ngirimela emixaxeni, u ri na Pura, nandza wa wena.

¹¹U ta twa leswi vulavuriwaka kona, mavoko ya wena ma ta tiyisiwa, kutani u ta ngirimela emixaxeni.” Kutani a ngirimela kona, a ri na Pura, nandza wa yena a ya laha ku nga ni valanguteri lava hlomeke emixaxeni.

¹²Kambe Vamidiyani ni Vaamaleke, ni vana va le vuxeni hinkwavo, a va hangalakile hinkwako enkoveni, va fana ni tinjiya, ni tikamela ta vona ti nga hlayiwi, ti fana ni sava leri nga eribuwini ra lwandle.

¹³Kakuloko Gidiyoni a fika kona, maswivo, a ku ri ni munhu un'wana a byelaka nakulobye wa yena norho a ku: “Vona, ndzi lorhile norho; ndzi vonile xilo lexi fanaka ni ximbundzu xa barley xi vumbulukela emixaxeni ya Vamidiyani, xi ko xi fika entsongeni xi wu ba, xi wu wisela ehansi; wu ku mpfuta.”

¹⁴Nakulobye wa yena a hlamula, a ku: “Norho lowu, a wu vuri nchumu, loko ri nga ri tlhari ra Gidiyoni n'wana Yowasi wanuna wa Israele. Xikwembu xi nyiketile Vamidiyani ni mixaxa hinkwayo emavokweni ya yena.”

¹⁵Kuteloko Gidiyoni a twile timhaka ta norho ni nhlamuselo ya wona, a khinsama, a tlhelela emixaxeni ya Vaisraele, a ku: “Yimani, hikuva Yehovha u nyiketile mixaxa ya Vamidiyani emavokweni ya n'wina.”

¹⁶Kutani a avanyisa lava madzana manharhu hi mitlawa minharhu, a nyika un'wana ni un'wana nanga evokweni ra yena, ni timbita leti nga hava nchumu, leti nga ni swisa endzeni ka tona.

¹⁷A ku eka vona: “Langutani mina, mi endla kukotisa mina, vonani, kutakuloko ndzi fika emixaxeni, mi ta endla kukotisa leswi ndzi nga ta swi endla.

¹⁸Kutakuloko ndzi yimba nanga, mina ni hinkwavo lava ndzi nga na vona, na n'wina mi ta yimba tinanga hi matlhelo hinkwawo ya mixaxa, mi ku: ‘Fumu ra Yehovha ni ra Gidiyoni!’ ”

¹⁹Kavaloko Gidiyoni a famba ni vanhu va dzana lava ingi a ri na vona, va fika emakun'wini ya mixaxa, ka ha ku sungula ku langutela ka vusiku lebyikulu, ka ha ku vekiwa valanguteri. Kutani va yimba tinanga, va faya timbita leti nga emavokweni ya vona.

²⁰Kutani mitlawa leyi minharhu yi yimba tinanga, va faya timbita, va tamela un'wana ni un'wana xisa hi voko ra ximatsi, ni tinanga hi voko ra xinene ku ririsa, va ba huwa, va ku: “Tlhari ra Yehovha ni ra Gidiyoni!”

²¹Kutani va yima un'wana ni un'wana endhawini ya yena, va rhendzele mixaxa exikarhi kutani hinkwavo lava nga emixaxeni; va sungula ku tsutsumela hala ni hala, va ba huwa, va baleka.

²²Kambe va madzana manharhu va karhi va yimba tinanga; Yehovha a endla leswaku un'wana ni un'wana wa Vamidiyani a tlhava warikwavo hi tlhari ra yena emixaxeni hinkwayo, hinkwavo lava ngi va ri emixaxeni va baleka ku ya fika eBeta-Xita, tlhelo ra Serera, ku ya fika endzilakaneni wa Avele-Mehola, tlhelo ra Tabata.

²³Kutani vavanuna va Israele, ni va Neftali, ni va Asere, ni hinkwavo, va Manase va hlengeletana, va hlongorisa Vamidiyani.

²⁴Gidiyoni a rhumerile tintsumi eka hinkwavo lava nga entshaveni ya Efrayimi, a ku: “Ngirimelani ku ya hlangana ni Vamidiyani, mi yima emahlalukweni ku ya fika eBeta-Bara, na Yordani.” Hikwalaho vavanuna hinkwavo va Israele va hlengeletana, va yima emahlalukweni ku ya fika eBeta-Bara na Yordani.

²⁵Kutani va khoma tihosi timbirhi ta Vamidiyani, Orebe na Zeba; va dlaya Orebe eribyeni ra Orebe, Zeba yena, va n'wi dlayela exikhuvutelweni xa Zeba; kutani va hlongorisa Vamidiyani. Tinhloko ta Orebe na Zeba va ti neha eka Gidiyoni, ehase ka Yordani.