Read tsonga 3 Yohane 1 Bible Online

3 Yohane 1 - tsonga bible

3 Yohane 1

¹Nkulukumba, eka murhandziwa Gayo, loyi ndzi n'wi rhandzaka entiyisweni.

²Murhandziwa, ndzi rhandza leswaku u kateka etimhakeni hinkwato, u tsaka emirini wa wena, kukotisa leswi moya wa wena wu tsakeke.

³Hikuva ndzi tsakile ngopfu loko vamakwerhu lava fikeke halenu va vurile vumbhoni lebyinene ehenhla ka wena hilaha u fambaka entiyisweni.

⁴A ndzi na ku tsaka loku tlulaka loku ndzi nga na kona, loko ndzi twa leswaku vana va mina va famba entiyisweni.

⁵Murhandziwa, u landza ku pfumela emitirhweni hinkwayo leyi u tirhelaka ha yona vamakwerhu, va nga vaendzi.

⁶Hi vona lava nga endla vumbhoni bya rirhandzu ra wena emahlweni ka kereke; volavo kambe, u ta endla swinene loko u va longisa erendzweni ra vona, hi mukhuva lowu fanelaka Xikwembu.

⁷Hikuva va fambile hikwalaho ka vito ra xona, va nga amukelanga nchumu eka vamatiko.

⁸Hikwalaho hina hi fanele ku amukela lavo tano, leswaku hi tirhela ntiyiso swin'we na vona.

⁹Ndzi tsalerile kereke; kambe Diyotrefo la rhandzaka ku tiendla nkulukumba wa vona, a nga hi amukeri.

¹⁰Hikwalaho, kungakuloko ndzi ta, ndzi ta n'wi tsundzuxa mitirho leyi a yi endlaka loko a hi hleva hi timhaka to biha; kutani a nga kolwi ha swona, kambe na swona a nga amukeri vamakwerhu, a engeta a sivela ni lava rhandzaka ku va amukela, a va hlongola ni le kerekeni.

¹¹Murhandziwa, u nga etisi swo biha, kambe u etisa leswinene. La endlaka swinene, i wa Xikwembu, kambe la endlaka swo biha, a nga vonanga Xikwembu.

¹²Demetriyo u kumile vumbhoni lebyinene eka hinkwavo, na kona ka ntiyiso; kambe na hina hi timbhoni ta yena; kutani ma swi tiva leswaku vumbhoni bya hina hi lebyi tiyeke.

¹³A ndzi ri ni timhaka to tala ta ku ku tsalela, kambe a ndzi rhandzi ku ti tsala hi peni ni inki;

¹⁴kambe ndza tshemba leswaku ndzi ta hatla ndzi ku vona, hi kona hi nga ta vulavula swin'we hi milomu.

¹⁵Ku rhula a ku ve na wena. Vanakulorhi va ku rungula. Rungula vanakulorhi hi mavito ya vona.