Read tsonga Nhlavutelo 1 Bible Online

Nhlavutelo 1 - tsonga bible

Nhlavutelo 1

¹Ku hlavutela ka Yesu Kriste loku a ku nyikiweke hi Xikwembu, a ta tivisa malandza ya yena timhaka leti fanelaka ku humelela sweswi, leti a ti rhumeke hi ntsumi ya yena, a va a ti kombisa Yohane, nandza wa yena,

²la nga tiyisa Rito ra Xikwembu ni vumbhoni bya Yesu Kriste, swi nga hinkwaswo leswi a swi voneke.

³Ku katekile la hlayaka ni lava yingisaka timhaka ta vuprofeta lebyi, lava hlayisaka leswi tsariweke kona, hikuva nkarhi wu kusuhi.

⁴Yohane eka tikereke ta ntlhanu na timbirhi leti nga eAsiya: Tintswalo ni ku rhula a swi ve na n'wina, swi huma eka Loyi a nga kona, Loyi a a ri kona, Loyi a taka, ni ka mimoya ya ntlhanu na mimbirhi leyi nga emahlweni ka xiluvelo xa yena,

⁵ni ka Yesu Kriste, mbhoni leyi tshembekaka, ni mativula exikarhi ka vafi, ni Hosi ya tihosi ta misava!

⁶Eka loyi a hi rhandzeke, la nga hlantswa swidyoho swa hina hi ngati ya yena a va a endla tiko ha hina ni vaprista va Xikwembu, Tata wa yena eka yena a ku ve ku kwetsima ni matimba, hi masiku ni masiku Amen!

⁷Vonani, wa ta hi mapapa; mahlo hinkwawo ma ta n'wi vona, na vona lava n'wi tlhaveke, kutani tinxaka hinkwato ta misava ti ta tiba swifuva hikwalaho ka yena. Ina, Amen!

⁸“Hi mina Alfa na Omega” (ku sungula ni ku hela), ku vula Hosi Xikwembu, Loyi a nga kona, Loyi a a ri kona, Loyi a taka, La nga ni matimba hinkwawo.

⁹Mina Yohane, makwenu, ni la averiweke swin'we na n'wina maxangu, ni ku fuma, ni ku tiyisela loku nga eka Yesu, a ndzi ri exihlaleni lexi vuriwaka Patmosi, hikwalaho ka Rito ra Xikwembu, ni hikwalaho ka vumbhoni bya Yesu.

¹⁰A ndzi tekiwile emoyeni hi siku ra Hosi, kutani ndzi twa endzhaku ka mina rito lerikulu kukotisa ra nanga,

¹¹ri ku: “Leswi u swi vonaka, swi tsale ebukwini, u swi rhumela tikereke ta ntlhanu na timbirhi leti nga eAsiya, le Efesa, ni le Smirna, ni le Pergamo, ni le Tiyatira, ni le Sarda, ni le Filadelfiya, ni le Lawodikiya.”

¹²Kutani ndzi rhendzeleka ku vona loyi rito ra yena ri vulavulaka na mina; kuteloko ndzi rhendzelekile, ndzi vona tikandelari ta ntlhanu na timbirhi ta nsuku;

¹³kutani exikarhi ka tikandelari, ndzi vona un'wana la fanaka ni N'wana wa Munhu, a ambele nguvu leyo leha, a tibohile xifuva hi vamba ra nsuku.

¹⁴Nhloko ya yena ni misisi ya yena a yi basile kukota voya bya nyimpfu leyo basa, ni kukota gamboko; mahlo ya yena a ma fana ni malangavi ya ndzilo;

¹⁵milenge ya yena a yi fana ni koporo leyi vangamaka, kukotisa loko yi hisiwile ehondweni; rito ra yena a ri fana ni mpfumawulo wa mati layo tala.

¹⁶A a khomile tinyeleti ta ntlhanu na timbirhi evokweni ra yena ra xinene; enon'wini wa yena a ku huma tlhari leri karihaka hi matlhelo mambirhi, mombo wa yena a wu fana ni dyambu loko ri kwetsima hi matimba ya rona.

¹⁷Kuteloko ndzi n'wi vonile, ndzi wela emilengeni ya yena wongi hi loko ndzi file, kutani a veka voko ra yena ra xinene ehenhla ka mina, a ku: “U nga chavi, ndzi Lowo rhanga ni Lowa makumu,

¹⁸ni Loyi a hanyaka; a ndzi file, kutani sweswi, ndza hanya hi masiku ni masiku; ndzi ni mimpfungura ya xivandla xa vafi ni ya rifu.

¹⁹Sweswi tsala timhaka leti u ti voneke ni leti nga kona sweswi, ni leti fanelaka ku ta endzhaku ka leti;

²⁰xihundla xa tinyeleti ta ntlhanu na timbirhi leti u ti voneke evokweni ra mina ra xinene, ni xa tikandelari ta nsuku, hi xo lexi: Tinyeleti ta ntlhanu na timbirhi, i tintsumi ta tikereke ta ntlhanu na timbirhi; kutani tikandelari ta ntlhanu na timbirhi, i tikereke ta ntlhanu na timbirhi.