Read tsonga Nhlavutelo 12 Bible Online

Nhlavutelo 12 - tsonga bible

Nhlavutelo 12

¹Kutani ku humelela singita lerikulu etilweni: I wansati la ambaleke dyambu, n'weti wu ri hansi ka milenge ya yena, kutani a rhwele enhlokweni harhi ya tinyeleti ta khume na timbirhi.

²A a tikile, kutani a huwelela, a ri karhi a twa ku vaviseka ni ku lumiwa eku velekeni ka yena.

³Kambe ku humelela singita rin'wana etilweni: I dragona leyikulu leyo tshwuka, yi nga ni tinhloko ta ntlhanu na timbirhi ni timhondzo ta khume; etinhlokweni ta yona a ku ri ni tihari ta ntlhanu na timbirhi.

⁴Ncila wa yona a wu koka ku avanyisa ka vunharhu ka tinyeleti ta le tilweni kutani yi ti hoxa emisaveni. Kavaloko dragona yi yima emahlweni ka wansati loyi a laveke ku veleka leswaku yi ta dya n'wana wa yena loko a velekile.

⁵Kutani a veleka n'wana wa wanuna, loyi a nga ta fuma matiko hinkwawo hi nhonga ya nsimbhi, kambe n'wana wa yena a tekeriwa eka Xikwembu ni le ka xiluvelo xa xona.

⁶Kutani wansati a balekela emananga, laha a lunghiseriweke vutshamo hi Xikwembu, leswaku a phameriwa kona hi masiku ya 1 260.

⁷Kutani ku lwa ku va kona etilweni; Mikaele ni tintsumi ta yena va lwa ni dragona; yona dragona, yi lwa yi ri ni tintsumi ta yona.

⁸Kambe a yi hlulanga; kutani a ka ha kumiwanga xivandla xa yona etilweni.

⁹Kutani dragona leyikulu, yi nga nyoka ya khale, leyi vuriwaka Diyavulosi na Satana, leyi xisaka misava hinkwayo, yi cukumetiwa emisaveni ni tintsumi ta yona ti cukumetiwa na yona.

¹⁰Kutani ndzi twa rito lerikulu etilweni, ri ku: “Sweswi, ku fikile ku hlayiseka, ni matimba, ni ku fuma ka Xikwembu xa hina; ni matimba ya Kriste wa xona; hikuva muhehli wa vamakwerhu, loyi a nga va hehla emahlweni ka Xikwembu xa hina vusiku ni nhlekanhi, u cukumetiwile.

¹¹Va n'wi hlurile hi ngati ya Xinyimpfana, ni rito ra vumbhoni bya vona, kutani a va rhandzangi vutomi bya vona, ku yisa eku feni.

¹²Tsakani hakona, n'wina matilo, na n'wina lava akeke kona! Mi ni khombo n'wina lava akeke emisaveni ni le lwandle, hikuva Diyavulosi u xikele eka n'wina a karihile ngopfu hi ku tiva leswaku nkarhi wa yena a wa ha ri wungani.”

¹³Kuteloko dragona yi vonile leswaku yi cukumetiwile emisaveni, yi ya hlongorisa wansati la nga veleka n'wana wa wanuna.

¹⁴Kutani wansati a nyikiwa timpapa timbirhi ta gama lerikulu, leswaku a hahela emananga exivandleni xa yena, laha a phameriwaka kona hi nkarhi wun'we, ni mikarhi mimbirhi, ni hafu ya nkarhi, a ri ekule ni nyoka.

¹⁵Kutani nyoka yi humesa enon'wini wa yona mati kukotisa nambu endzhaku ka wansati, leswaku a tekiwa hi wona.

¹⁶Kambe misava yi pfuna wansati: misava yi ahlamisa nomu wa yona, yi mita nambu lowu dragona yi wu humeseke enon'wini wa yona.

¹⁷Kutani dragona yi karihela wansati, yi suka yi ya lwa ni leswi seleke swa vana va yena, lava hlayisaka milawu ya Xikwembu, lava nga ni vumbhoni bya Yesu Kriste.

¹⁸Kutani ndzi yima esaveni ra lwandle.