Read tsonga Nhlavutelo 16 Bible Online

Nhlavutelo 16 - tsonga bible

Nhlavutelo 16

¹Kutani ndzi twa rito lerikulu leri humaka etempeleni, ri ku eka tintsumi leta ntlhanu na timbirhi: “Yanani, mi ya chululela emisaveni swimbitana swa ntlhanu na swimbirhi swa vukari bya Xikwembu.”

²Kutani ntsumi yo rhanga yi ya chulula ximbitana xa yona emisaveni; kutani lava ngi va ri ni mfungho wa ti xivandza, ni lava khongelaka xifaniso xa xona, va huma swilondza leswo biha, leswi vavisaka ngopfu.

³Ntsumi ya vumbirhi yi ya chulula ximbitana xa yona elwandle; kutani ri hundzuka ngati leyi fanaka ni ya mufi; kutani leswi hanyaka elwandle swi fa hinkwaswo.

⁴Ntsumi ya vunharhu yi chulula ximbitana xa yona emilambyeni ni le swihlobyeni swa mati; kutani swi hundzuka ngati.

⁵Kavaloko ndzi twa ntsumi ya mati yi ku: “U lulamile, wena la kwetsimaka loyi a nga kona, loyi a a ri kona, loko u avanyisise xisweswo.

⁶Hikuva leswi va nga halata ngati ya vakwetsimi ni ya vaprofeta, u va nyikile ngati ku nwa; va lulamele hi yona.”

⁷Kutani ndzi twa alitari yi vulavula, yi ku: “Kunene Hosi Xikwembu xa matimba hinkwawo, ku avanyisa ka wena ku lulamile, i ka ntiyiso.”

⁸Ntsumi ya vumune yi chulula ximbitana xa yona edyambyini; kutani ri nyikiwa matimba ya ku hisa vanhu hi ndzilo.

⁹Kutani vanhu va hisiwa hi mumu lowukulu kutani va sandza vito ra Xikwembu lexi nga ni matimba ehenhla ka makhombo walawo; kambe a va hundzukanga leswaku va xi dzunisa.

¹⁰Ntsumi ya vuntlhanu yi chulula ximbitana xa yona ehenhla ka xiluvelo xa xivandza; kutani ku fuma ka xona ku hundzuka munyama, vanhu va tiluma tindzimi hi ku vaviseka.

¹¹Kutani va sandza Xikwembu xa le henhla hikwalaho ka ku vaviseka ka vona, ni ka swilondza swa vona, kambe a va hundzukanga eku endleni ka vona.

¹²Ntsumi ya ntlhanu na yin'we yi chulula ximbitana xa yona enambyeni lowukulu wa Yufrata; kutani mati ya wona ma phya, leswaku ku lunghisiwa ndlela ya tihosi ta le vuxeni.

¹³Kutani ndzi vona ku huma enon'wini wa dragona, ni le non'wini wa xivandza, ni le non'wini wa muprofeta wa mavunwa, mimoya minharhu ya thyaka leyi fanaka ni mitlambya.

¹⁴Hi yona mimoya ya mademona leyi endlaka mahlori, leyi yaka eka tihosi ta misava hinkwayo ku ta ti hlengeletela ku lwa ka siku lerikulu ra Xikwembu xa matimba hinkwawo.

¹⁵[“Maswivo, ndza ta kukotisa khamba, ku katekile la hitekaka, la hlayisaka tinguvu ta yena, leswaku a nga tshuki a famba ntsena, tingana ta yena ti nga ti tshuka ti vonaka.”]

¹⁶Kutani yi ta hlengeleta exivandleni lexi vuriwaka Armagedoni hi Xiheveru.

¹⁷Ntsumi ya ntlhanu na timbirhi yi chulula ximbitana xa yona empfhukeni; kutani ku huma etempeleni rito lerikulu leri humaka exiluvelweni, leri nge: “Swi herile!”

¹⁸Kutani ku humelela marito, ni ku pfuma, ni ku hatima; kutani ku tsekatseka loku chavisaka ku va kona; ka ha ri mpfhuka vanhu va va kona emisaveni, ku tsekatseka loko tano a ku si va kona.

¹⁹Muti lowukulu wu avanyisiwa hi matlhelo manharhu; kutani miti ya matiko yi hirimuka; kambe Xikwembu xi anakanya Babilona lowukulu ku wu nwisa xinwelo xa vhinyo ya vukari lebyi hisaka bya xona.

²⁰Swihlale hinkwaswo swi baleka, ni tintshava a ti nga ha kumiwi.

²¹Kutani xihangu lexikulu lexi nga ni ku tika ka talenta, xi na hi le tilweni, xi wela ehenhla ka vanhu; kambe vanhu va sandza Xikwembu hikwalaho ka khombo ra xihangu, hikuva i khombo lerikulu ngopfu.