Read tsonga Nhlavutelo 19 Bible Online

Nhlavutelo 19 - tsonga bible

Nhlavutelo 19

¹Endzhaku ka sweswo, ndzi twa etilweni kukotisa rito lerikulu ra vunyingi lebyikulu ngopfu bya vanhu lava nge: “Aleluya! Ku hlayiseka, ni ku kwetsima, ni matimba, i swa Xikwembu xa hina,

²hikuva ku avanyisa ka xona i ka ntiyiso, ku lulamile, hikuva xi avanyisile muoswi lonkulu loyi a nga borisa misava hi vuoswi bya yena, xi n'wi rihisele ngati ya malandza ya xona evokweni ra yena.”

³Kutani va engeta va ku ra vumbirhi: “Aleluya! Musi wa wona wu tlhandluka hi masiku lama nga heriki.”

⁴Kutani vakulukumba va makume mambirhi na mune, ni swivumbiwa leswi hanyaka swa mune va wa hi mimombo, va gandzela Xikwembu lexi tshamaka exiluvelweni, va ku: “Amen, Aleluya!”

⁵Kutani rito ri huma exiluvelweni, ri ku: “Khensani Xikwembu xa hina, n'wina hinkwenu malandza ya xona, na n'wina lava xi chavaka, lavakulu ni lavatsongo!”

⁶Kutani ndzi twa rito leri fanaka ni ra vunyingi lebyikulu, ri kotisa mpfumawulo wa mati layo tala, ni leswo ngi i rito ra tindlati leto pfuma ngopfu, ri ku: “Aleluya! Hikuva ku fuma Hosi Xikwembu xa hina xa matimba hinkwawo.

⁷A hi tsakeni, hi tsakisisa, hi xi dzunisa, hikuva vukati bya Xinyimpfana byi fikile, nsati wa xona u tilunghisile,

⁸u nyikiwile ku funengela ntsembyana lowo vevuka, lowo vangama, lowu tengeke,” hikuva ntsembyana lowo vevuka, i ku lulama ka vakwetsimi.

⁹Kutani ntsumi yi ku eka mina: “Tsala: Ku katekile lava rhambiweke enkhubyeni wa vukati bya Xinyimpfana.” Yi engeta yi ku eka mina: “Hi wona marito ya xiviri ya Xikwembu.”

¹⁰Kutani ndzi wela emilengeni ya yona ku yi gandzela, kambe yi ku eka mina: “U nga tshuki u endlisa sweswo; ndzi nakuloni entirhweni, ni wa vamakwenu lava nga ni vumbhoni bya Yesu, gandzela Xikwembu.” Hikuva vumbhoni bya Yesu i moya wa vuprofeta.

¹¹Kutani ndzi vona tilo ri pfuriwile, kavaloko ku humelela hanci leyo basa, la yi khandziyeke a vitaniwa Mutshembeki ni Wantiyiso; wa avanyisa ni ku lwa hi ku lulama.

¹²Mahlo ya yena a ma fana ni langavi ra ndzilo; enhlokweni ya yena a rhwele tihari leto tala, a ri ni vito leri tsariweke ri nga tiviwi hi munhu, loko a nga ri yena ntsena.

¹³A ambele nguvu leyi totiweke hi ngati, kutani vito ra yona, i Rito ra Xikwembu.

¹⁴Mavandla ya le tilweni a ma n'wi landzelela, va khandziyile tihanci to basa, va ambele ntsembyana lowo vevuka lowo basa, lowu tengeke.

¹⁵Enon'wini wa yena ku hume tlhari lero kariha, a ta ba matiko ha rona; hi yena la nga ta ma risa hi nhonga ya nhumbu; kambe hi yena la nga ta khuvuta exikhuvutweni xa vhinyo ya ku leva, ni ya vukari bya Xikwembu xa matimba hinkwawo.

¹⁶Kutani u ni vito leri tsariweke engubyeni ni le ndzhumbini wa yena, ri nge: Hosi ya tihosi, ni Mufumi wa vafumi.

¹⁷Kutani ndzi vona ntsumi yi yimile edyambyini, yi huwelela hi rito leri tlakukeke eka tinyanyana leti hahaka empfhukeni wa tilo, yi ku: “Tanani mi hlengeletanela nkhuvo lowukulu wa Xikwembu;

¹⁸mi ta dya tinyama ta tihosi, ni tinyama ta tindhuna, ni tinyama ta vamatimba ni tinyama ta tihanci ni ta lava ti khandziyeke, ni tinyama ta hinkwavo lava nga fuyiwangiki ni ta lava fuyiweke, ta lavatsongo ni lavakulu!”

¹⁹Kutani ndzi vona xivandza, ni tihosi ta misava ni mavandla ya tona, va hlengeletene ku ta lwa ni loyi a khandziyeke mangwa ni mavandla ya yena.

²⁰Kutani xivandza xi khomiwa swin'we ni muprofeta wa mavunwa, loyi a nga endla emahlweni ka xona mahlori lawa a hambukiseke ha wona lava nga amukela mfungho wa xivandza, ni lava gandzeleke xifaniso xa xona havambirhi va cukumetiwa va ha hanya etiveni leri pfurhaka ra ndzilo ni xivavula.

²¹Loko va ri lava seleke, va dlawa hi tlhari leri humaka enon'wini wa la khandziyeke hanci; kutani tinyanyana ti xurha hi tinyama ta vona.