Read tsonga Nhlavutelo 2 Bible Online

Nhlavutelo 2 - tsonga bible

Nhlavutelo 2

¹“Tsalela ntsumi ya kereke ya Efesa, u ku: “ ‘Loyi a tamelaka tinyeleti ta ntlhanu na timbirhi evokweni ra yena ra xinene, la fambaka exikarhi ka tikandelari ta ntlhanu na timbirhi ta nsuku, u vulavula sweswo, u ri:

²Ndzi tiva mitirho ya wena ni nyuku wa wena ni ku tiyisela ka wena ni leswaku a ku swi koti ku twanana ni lavo biha; u ringile na vona lava tivulaka vaapostola, kasi a hi vona, kutani u swi vonile leswaku va hemba;

³kutani a wu ri ni ku yingisela, u twile ku vaviseka hikwalaho ka vito ra mina kutani a ku karhalanga.

⁴Kambe ndzi ni mhaka ehenhla ka wena hikuva u lahlile rirhandzu ra wena lero sungula.

⁵Loko swi ri tano, anakanya laha u nga wa u ri kona, u va u hundzuka, u tlhela u tirha mitirho ya wena ya ku sungula; loko swi nga ri tano, ndzi ta ta eka wena, ndzi susa kandelari ya wena ematshan'weni ya yona, loko u nga hundzuki.

⁶Kambe u ni mhaka yin'we, hileswaku u venga mitirho ya Vanikolayiti leyi na mina ndzi yi vengaka.

⁷“ ‘La nga ni tindleve a a yingise leswi Moya wu swi byelaka tikereke: Loyi a nga ta hlula ndzi ta n'wi nyika ku dya murhi wa ku hanya, lowu nga exikarhi ka Paradeyisi ya Xikwembu.’

⁸“Tsalela ni ntsumi ya kereke ya Smirna, u ku: “ ‘Lowo rhanga ni wa le ndzhaku, loyi a nga fa a tlhela a hanya, u vulavula sweswo, u ri:

⁹Ndzi tiva nhlomulo wa wena, ni vusiwana bya wena (hambi u ri mufuwi), ni ku sandza ka lava tivulaka Vayuda, kasi a hi vona, kambe i sinagoga ya Satana.

¹⁰U nga chavi nchumu eka leswi u nga ta xanisiwa ha swona. Vona, Diyavulosi u ta nghenisa van'wana va n'wina ekhotsweni leswaku mi ringiwa kutani mi ta va ni nhlomulo wa masiku ya khume. U va u tshembeka ku yisa eku feni, kutani ndzi ta ku nyika harhi ya vutomi.

¹¹“ ‘La nga ni tindleve a a yingise leswi Moya wu swi byelaka tikereke: Loyi a nga ta hlula, a nga ka a nga vavisiwi hi rifu ra vumbirhi.’

¹²“Tsalela ni ntsumi ya kereke ya Pergamo, u ku: “ ‘La nga ni tlhari leri karihaka hi matlhelo mambirhi, u vulavula sweswo u ri:

¹³Ndzi tiva laha u akeke kona, laha ku nga ni xiluvelo xa Satana, ni leswaku u hlayisa vito ra mina; kutani a ku landzulanga ku pfumela eka mina, hambi ku ri hi siku Antipasi mbhoni ya mina leyi tshembekaka, a nga dlawa exikarhi ka n'wina laha Satana a akeke kona.

¹⁴Kambe ndzi ni timhaka ti nga ri tingani ehenhla ka wena: Kwalaho, u ni lava khomeke dyondzo ya Balaama, a nga dyondzisa Balaka ku veka xikhunguvanyiso emahlweni ka vana va Israele, va ta dya leswi nga tlhaveriwa swifaniso swa swikwembu, ni ku endla vuoswi;

¹⁵hi mukhuva wolowo, na wena, u ni lava khomeke dyondzo ya Vanikolayiti.

¹⁶Hundzuka-ke; loko u nga hundzuki, ndzi ta hatlisa ndzi ta eka wena, ndzi lwa na vona hi tlhari ra nomu wa mina.

¹⁷“ ‘La nga ni tindleve a a yingise leswi Moya wu swi byelaka tikereke: Loyi a nga ta hlula, ndzi ta n'wi nyika manna laya fihliweke; ndzi n'wi nyika ni ribye lero basa, leri ku tsariweke eka rona, vito lerintshwa leri nga tiviwiki hi munhu, loko a nga ri loyi a ri amukelaka.’

¹⁸“Tsalela ni ntsumi ya kereke ya Tiyatira, u ku: “ ‘Hi leti vuriwaka hi N'wana wa Xikwembu loyi mahlo ya yena ma fanaka ni langavi ra ndzilo, ni milenge ya yena yi kotisaka koporo leyi vangamaka.

¹⁹Ndzi tiva mitirho ya wena, ni rirhandzu ra wena, ni ku pfumela ka wena, ni ku tirha ka wena ni ku tiyisela ka wena, ni leswaku mitirho ya wena ya le ndzhaku yi tlula leyo rhanga.

²⁰Kambe ndzi ni mhaka ehenhla ka wena: U pfumelela Yezabele, nsati loyi a tivulaka muprofeta, ku dyondzisa ni ku hambukisa malandza ya mina, leswaku va endla vuoswi, va dya ni leswi nga tlhaveriwa swifaniso swa swikwembu.

²¹Ndzi n'wi nyikile nkarhi wa ku hundzuka, kambe a nga swi rhandzi ku hundzuka evuoswini bya yena.

²²Vona, ndzi ta n'wi wisela esangwini, kutani lava oswaneke na yena, ndzi ta va nghenisa ekhombyeni lerikulu, loko va nga hundzuki ku endleni ka vona;

²³ndzi ta dlaya hi rifu, vana va yena, kutani tikereke hinkwato ti ta tiva leswaku hi mina la kambelaka swifungha ni timbilu, ndzi va ndzi hakela un'wana ni un'wana wa n'wina hi leswi ringanaka mitirho ya yena.

²⁴Loko mi ri n'wina ni van'wana va Tiyatira lava nga landzangiki dyondzo leyi, ni lava nga tivangiki ku enta ka Satana, hilaha va vulaka ha kona; ndza mi byela leswaku ndzi nga ka ndzi nga mi rhwexi ndzhwalo wun'wana.

²⁵Ntsena mi tiyisa leswi mi nga na swona ndzi ko ndzi fika.

²⁶“ ‘La nga ta hlula, a tiyisela ku tirha mitirho ya mina ku yisa emakumu, ndzi ta n'wi nyika ku fuma ehenhla ka matiko.

²⁷U ta ma fuma, a ma risa hi nhonga ya nsimbhi, kutani ma ta fayeteriwa kukota timbita ta vumba, hilaha na mina ndzi nga nyikiwa hakona hi Tatana.

²⁸Ndzi ta n'wi nyika ni nyeleti ya mixo.

²⁹La nga ni tindleve a a yingise leswi Moya wu swi byelaka tikereke.’