Read tsonga Nhlavutelo 3 Bible Online

Nhlavutelo 3 - tsonga bible

Nhlavutelo 3

¹“Tsalela ni ntsumi ya kereke ya Sarda, u ku: “ ‘Loyi a nga ni mimoya leya ntlhanu na mimbirhi ya Xikwembu, ni tinyeleti ta ntlhanu na timbirhi, u vulavula sweswo, u ri: Ndzi tiva mitirho ya wena, ni leswaku u ni mpfumawulo wa ku hanya, kasi u file.

²Hiteka-ke, u tiyisa leswa ha seleke ku ya fa, hikuva a ndzi kumanga mitirho ya wena yi hetisekile emahlweni ka Xikwembu xa mina.

³Loko swi ri tano, anakanya leswi u swi nyikiweke ni leswi u swi tweke, u swi hlayisa, kutani u tisola. Kungakuloko u nga hiteki, ndzi ta ta eka wena kukotisa khamba, kutani u nga ka u nga tivi nkarhi lowu ndzi nga ta ta ha wona eka wena.

⁴Kambe u ni van'wana va nga ri vangani eSarda, lava nga nyamisangiki tinguvu ta vona; va ta famba na mina va ambele swo basa, hikuva va lulameriwe hi swona.

⁵“ ‘La nga ta hlula, u ta ambala tinguvu leto basa, kutani ndzi nga ka ndzi nga hlanguri vito ra yena ebukwini ya vutomi, kambe ndzi ta vula vito ra yena emahlweni ka Tatana, ni le mahlweni ka tintsumi ta yena.

⁶La nga ni tindleve; a a yingise leswi Moya wu swi byelaka tikereke.’

⁷“Tsalela ni ntsumi ya kereke ya Filadelfiya, u ku: “ ‘La kwetsimeke, Lowa ntiyiso, La nga ni mpfungura wa Davhida, La pfulaka, ku nga pfari munhu; La pfalaka, ku nga pfuri munhu, u vulavula sweswo, u ri:

⁸Ndzi tiva mitirho ya wena; waswivo, ndzi pfurile nyangwa emahlweni ka wena, kutani a ku na munhu la yi pfalaka; hikuva u ni matimbanyana, u hlayisile rito ra mina, na swona a ku landzulanga vito ra mina.

⁹Vona, ndzi ta ku tisela van'wana va sinagoga ya Satana, lava tivulaka Vayuda, kasi a hi vona, kambe va hemba; ndzi ta va tisa leswaku va khinsama emilengeni ya wena, va ta tiva leswaku ndzi ku rhandzile.

¹⁰Leswi u hlayiseke Rito ra ku tiyisela ka mina, na mina ndzi ta ku hlayisa enkarhini wa ndzingo lowu nga ta humelela emisaveni hinkwayo ku ta ringa lava akeke emisaveni.

¹¹Waswivo, ndzi hatlisa ndzi ta; tiyisa leswi u nga na swona, un'wana a nga ti tshuka a teka harhi ya wena.

¹²“ ‘La nga ta hlula, ndzi ta n'wi endla xiphandze etempeleni ya Xikwembu xa mina, kutani a nga ka a nga humi kona kambe ndzi ta tsala ehenhla ka yena vito ra Xikwembu xanga, ni vito ra muti wa Xikwembu xanga, wu nga Yerusalema lowuntshwa, lowu xikaka hi le tilweni eka Xikwembu xa mina, na rona vito ra mina lerintshwa.

¹³La nga ni tindleve, a a yingise leswi Moya wu swi byelaka tikereke.’

¹⁴“Tsalela ni ntsumi ya kereke ya Lawodikiya, u ku: “ ‘Hi leti ti vuriwaka hi loyi a nga Amen, mbhoni leyi tshembekeke, ya ntiyiso, nhloko ya swivumbiwa swa Xikwembu:

¹⁵Ndzi tiva mitirho ya wena: A ku titimeri, a ku hisi; a swi ta saseka loko ngi u titimela kumbe u hisa.

¹⁶Kambe sweswi, leswi u kufumelaka, u nga titimeri, u nga hisi, ndzi ta ku hlanta enon'wini wa mina.

¹⁷Leswi u nge: Ndzi mufuwi, ndzi tifuwisile, a ndzi pfumari nchumu, kasi a ku tivi leswaku u ni khombo, u xisiwana, u mupfumari, u file mahlo, a ku ambalanga nchumu:

¹⁸Ndza ku khongotela leswaku u tixavela eka mina nsuku lowu ringiweke hi ndzilo, leswaku u ta fuwa, ni tinguvu leto basa u ta ambala, kutani tingana ta vusweti bya wena ti nga tshuki ti vonaka; ni murhi wa mahlo, u tota mahlo ya wena ha wona, leswaku u vona.

¹⁹Ndzi tshinya ni ku laya hinkwavo lava ndzi va rhandzaka; hikwalaho-ke, u va ni ku chivirika, u tisola.

²⁰Waswivo, ndzi yimile enyangweni, ndza gongondza; kungakuloko un'wana a yingisa rito ra mina, a pfula nyangwa, ndzi ta nghena eka yena, ndzi lalela na yena, na yena a dya na mina.

²¹“ ‘Loyi a nga ta hlula, ndzi ta n'wi nyika ku tshama na mina exiluvelweni xa mina, kukotisa loko na mina ndzi hlurile, kutani ndzi tshamile na Tatana exiluvelweni xa yena.

²²La nga ni tindleve, a a yingise leswi Moya wu swi byelaka tikereke.’ ”