Read tsonga Nhlavutelo 7 Bible Online

Nhlavutelo 7 - tsonga bible

Nhlavutelo 7

¹Endzhaku ka swona, ndzi vona tintsumi ta mune ti yimile ematlhelweni ya mune ya misava ti sivela mimoya ya mune ya misava leswaku moya ni wun'we, wu nga tshuki wu hungela emisaveni ni le lwandle, hambi ku ri emurhini wu ri wun'we.

²Kutani ndzi vona ntsumi yin'wana yi huma evuxeni, yi tamele mfungho wa Xikwembu lexi hanyaka; kutani yi tlakusa rito, yi huwelela eka tintsumi ta mune leti nyikiweke matimba ya ku onha misava ni lwandle,

³yi ku: “Mi nga tshuki mi onha misava, hambi ri ri lwandle, hambi yi ri mirhi, hi nga si fungha malandza ya Xikwembu emimombyeni ya vona.”

⁴Kutani ndzi twa vunyingi bya lava funghiweke va ri 144 000 lava funghiweke eka tinxaka hinkwato ta vana va Israele:

⁵Va rixaka ra Yuda, lava funghiweke va ri 12 000; va rixaka ra Rhuveni, 12 000, va rixaka ra Gadi, 12 000,

⁶va rixaka ra Asere, 12 000; va rixaka ra Neftali, 12 000, va rixaka ra Manase, 12 000;

⁷va rixaka ra Simiyoni, 12 000; va rixaka ra Levhi, 12 000; va rixaka ra Isakara, 12 000:

⁸va rixaka ra Zebuloni, 12 000: va rixaka ra Yosefa, 12 000; va rixaka ra Benjamini, va ri 12 000 lava funghiweke.

⁹Endzhaku ka sweswo, ndzi languta, kutani ndzi vona vunyingi lebyikulu bya vanhu lava ku nga riki na munhu la kotaka ku va hlaya, va matiko hinkwawo, ni va tinxaka hinkwato, ni va swivongo hinkwaswo, ni va tindzimi hihinkwato, va yimile emahlweni ka xiluvelo, ni le mahlweni ka Xinyimpfana, va ambele tinguvu leto basa, va khomile micindzu emavokweni ya vona.

¹⁰Kutani va huwelela hi marito lama tlakukeke va ku: “Ku hlayiseka i ka Xikwembu xa hina lexi tshameke exiluvelweni, ni ka Xinyimpfana.”

¹¹Kutani tintsumi hinkwato a ti yimile, ti rhendzele xiluvelo, ni vakulukumba, ni swivumbiwa leswi hanyaka leswa mune kutani va khinsama emahlweni ka xiluvelo va gandzela Xikwembu,

¹²va ku: “Amen! Ku dzuneka, ni ku kwetsima, ni vutlhari, ni ku khensa, ni xichavo, ni vuhosi, ni matimba, a swi ve eka Xikwembu xa hina hi masiku ni masiku! Amen!”

¹³Kutani un'wana wa vakulukumba a vulavula, a ku eka mina: “Lava ambaleke tinguvu leto basa i va mani xana, va huma kwihi?”

¹⁴Kutani ndzi ku eka yena: “Swo tiva hi wena, Hosi yanga!” A ku eka mina: “Hi lava humeke enhlomulweni lowukulu, va hlantswile tinguvu ta vona va ti basisile hi ngati ya Xinyimpfana.

¹⁵Hikwalaho va nga emahlweni ka xiluvelo xa Xikwembu, va xi tirhela nhlekanhi ni vusiku etempeleni ya xona; kutani la tshamaka exiluvelweni u ta aka na vona, a va sirheleta.

¹⁶Va nga ka va nga ha twi ndlala, hambi ku ri ku khomiwa hi torha; va nga ka va nga ha hisiwi hi dyambu, hambi ku ri ku hisa kun'wana,

¹⁷hikuva Xinyimpfana lexi nga exikarhi ka xiluvelo xi ta va risa, xi va yisa eswihlobyeni swa mati ya vutomi, kutani Xikwembu xi ta hlangula mihloti hinkwayo emahlweni ya vona.”