Read tsonga I Samuwele 1 Bible Online

I Samuwele 1 - tsonga bible

I Samuwele 1

¹A ku ri ni munhu wa Ramatayimi-Sofimi, entshaveni ya Efrayimi, vito ra yena a a ri Elikana. A a ri n'wana Yerohama, n'wana Elihu, n'wana Tohu, n'wana Sufu, wa Efrayimi.

²A a ri ni vasati vambirhi, vito ra lowo rhanga a a ri Hana, ra lowa vumbirhi a a ri Penina; Penina a a ri ni vana, kambe Hana a a nga ri na vana.

³Lembe rin'wana ni rin'wana munhu loyi a a suka emutini wa yena, a tlhandluka ku ya khinsama emahlweni ka Yehovha wa mavandla, ni ku n'wi humesela mihlengo eXilo. Vana vambirhi va Heli a va ri kona, Hofini na Finiyasi, va ri vaprista va Yehovha.

⁴Kuteloko siku ri fikile, Elikana a humesa gandzelo, kutani a nyika Penina nsati wa yena, ni vana va yena hinkwavo swipandzwa.

⁵Kambe a nyika Hana swipandzwa swimbirhi hikuva a a rhandza Hana. Ntsena Yehovha a a n'wi endlile mhika.

⁶Penina a a ri ni vukwele hikwalaho ka yena, kutani a n'wi pfuka ni ku n'wi khomisa tingana leswaku a n'wi vilerisa, hikuva Yehovha a a n'wi endlile mhika.

⁷A swi ri tano hi malembe hinkwawo. Mikarhi hinkwayo loko Hana a tlhandlukela endlwini ya Yehovha, Penina a tshama a n'wi endlela sweswo kutani Hana a tshama a rila, a nga dyi nchumu.

⁸Nuna wa yena Elikana a ku eka yena: “Hana, u rilela yini? A ku dyi ha yini? Mbilu ya wena yi vavisekela yini xana? A ndzi tluli khume ra vana eka wena-ke?”

⁹Kuteloko va dyile, ni loko va nwile eXilo, Hana a pfuka (Heli muprista a a tshamile exitulwini, a seketele erimbeni ra nyangwa ya yindlu ya Xikwembu);

¹⁰kambe Hana a a ri ni gome emoyeni wa yena, kutani a khongela Yehovha, a rila ngopfu, a ku:

¹¹“Yehovha wa mavandla, loko u languta masangu ya nandza wa wena, ni loko u ndzi tsundzuka u nga rivali nandza wa wena, kutani u nyika nandza wa wena n'wana wa wanuna, ndzi ta n'wi nyika Yehovha, a va wa yena masiku hinkwawo ya vutomi bya yena, kutani rikari ri nga ka ri nga hundzi enhlokweni ya yena.”

¹²Kakuloko a chivirika a khongela emahlweni ka Yehovha, Heli a langutisa nomu wa yena.

¹³Kambe Hana a a vulavula embilwini ya yena, milomu ya yena yi vendzavendza ntsena, kambe rito ra yena ri nga twakali.

¹⁴Heli a ehleketa leswaku u pyopyiwile, kutani Heli a ku eka yena: “U ta pyopya ku yisa kwihi-ke? Famba u ya xalamuka.”

¹⁵Hana a hlamula a ku: “E-e, hosi yanga. Ndzi wansati la twaka ku vaviseka emoyeni wa mina. A ndzi nwangi vhinyo, hambi byi ri byalwa, kambe ndzi halatile moya wa mina emahlweni ka Yehovha.

¹⁶U nga hlayi nandza wa wena exikarhi ka vanhwanyana va Beliyali; hikuva ndzi vulavurile ku fika sweswi evukulwini bya ku vilela ka mina, ni bya ku vaviseka ka mina.”

¹⁷Heli a hlamula, a ku: “Famba hi ku rhula, Xikwembu xa Israele a xi ku nyike lexi u xi kombeleke.”

¹⁸Kutani a ku: “Nandza wa wena a a kume tintswalo emahlweni ka wena.” Kavaloko wansati loyi a famba hi ndlela ya yena, a dya, kutani mombo wa yena wu hundzuka.

¹⁹Kutani va pfuka nimixo, va ya khinsama emahlweni ka Yehovha; va tlhela va famba ekaya ka vona eRhama.

²⁰Kutani Elikana a tiva Hana, nsati wa yena, kutani Yehovha a n'wi tsundzuka. Hi lembe rolero, Hana a tika nyimba, kutani a veleka n'wana wa wanuna. A n'wi thya vito ra Samiele hikuva a ku: “Ndzi n'wi komberile eka Yehovha.”

²¹Nuna wa yena, Elikana, a tlhandluka, a ri ni yindlu ya yena hinkwayo, ku ya humesela Yehovha magandzelo ya lembe rin'wana ni rin'wana, ni ku ya endla lexi a xi tiyiseke hi ku hlambanya.

²²Kambe Hana a nga tlhandlukanga, hikuva a ku eka nuna wa yena: “Loko wandzisanyana a lumukile, ndzi ta n'wi yisa, u ta kombisiwa emahlweni ka Yehovha, kutani u ta tshama kona masiku hinkwawo.”

²³Elikana, nuna wa yena, a ku eka yena: “Endla hi ku twisisa ka wena; tshama u ko u n'wi lumula. Ntsena Yehovha a a endlise rito ra yena!” Kutani wansati a tshama a an'wisa n'wana wa yena a ko a n'wi lumula.

²⁴Kuteloko a n'wi lumurile, a n'wi tlhandlukisa na yena, a a ri ni tinkunzi tinharhu, ni efa ya mapa, ni nkwama wa vhinyo; kutani a n'wi heleketa endlwini ya Yehovha, eXilo, kambe wandzisanyana a a ri lontsongo ngopfu.

²⁵Va tlhava nkunzi, kutani va yisa wandzisanyana eka Heli.

²⁶Kavaloko wansati a ku: “Ha! Hosi yanga, hi lahla moya wa wena wu hanyaka hakona, hi mina wansati loyi ingi a yimile kwala emahlweni ka wena, a khongela Yehovha.

²⁷Ndzi komberile n'wana loyi eka Yehovha, kutani u ndzi nyikile lexi ndzi xi kombeleke.

²⁸Hikwalaho, ndzi n'wi nyikile Yehovha: u nyikiwile Yehovha hi masiku hinkwawo ya vutomi bya yena.” Kutani a khinsama emahlweni ka Yehovha.