Read tsonga I Samuwele 11 Bible Online

I Samuwele 11 - tsonga bible

I Samuwele 11

¹Kutani Nahaxi, wa ka Amoni, a ya dzima mixaxa kusuhi na Yabexe wa Giliyadi ku ya hlasela; kutani vanhu hinkwavo va Yabexe va ku eka Nahaxi: “Endla xinakulobye na hina, hi ta ku tirhela.”

²Nahaxi, wa ka Amoni, a va hlamula, a ku: “Ndzi ta endla xinakulobye na n'wina hi mukhuva lowu: Ndzi ta boxa tihlo ra xinene ra n'wina hinkwenu; hi kona ndzi nga ta veka xisandzu ehenhla ka Vaisraele hinkwavo.”

³Vakulukumba va Yabexe va ku eka yena: “Hi nyike masiku ya ntlhanu na mambirhi, hi ta rhuma tintsumi etikweni hinkwaro ra Israele, kutani loko hi nga kutsuriwi hi munhu, hi ta tinyiketa ka wena.”

⁴Tintsumi ti ya Gibeya wa Sawulo, ti tivisa tiko marito lawa; kutani tiko hinkwaro ri tlakusa rito ri rila.

⁵Kambe Sawulo a a vuya emasin'wini a landza tihomu ta yena, kutani a ku: “Tiko leri ri rilela yini hi mukhuva lowu xana?” Kutani va n'wi ambela timhaka leti nga vuriwa hi va Yabexe.

⁶Kutani Moya wa Xikwembu wu n'wi khoma loko a twile marito lawa; vukari bya yena byi pfurha ngopfu;

⁷kutani a tlhava tihomu timbirhi a xindla tinyama ta tona, a endla mihluvi, kutani a yi rhumela hi vanhu etikweni hinkwaro ra Israele; a ku: “Un'wana ni un'wana loyi a nga tiki huma ku landza Sawulo na Samiele tihomu ta yena ti ta xindliwa hi mukhuva wolowo.” Kutani nchavo wa Yehovha wu khoma tiko, vanhu va huma kukota munhu un'we.

⁸Sawulo a va hlaya eBezeki: kutani vana va Israele a va ri 300 000, ni vanhu va Yuda a va ri 30 000.

⁹Va ku eka tintsumi leti nga fika: “Mi ta va byela sweswo va Yabexe wa Giliyadi, mi ku: ‘Mundzuku, loko dyambu ri hisa hi matimba, mi ta ponisiwa.’ ” Kutani tintsumi ti tlhela, ti ya byela timhaka leti eka va Yabexe, kutani va tsaka.

¹⁰Va Yabexe va ku eka Vaamoni: “Mundzuku hi ta tinyiketa ka n'wina kutani mi ta endla ha hina hinkwaswo leswi mi swi rhandzaka.”

¹¹Siku leri tlhandlamaka, Sawulo a avanyisa tiko hi mavandla manharhu, kutani va nghena emixaxeni ya valala hi nkarhi wa ku langutela ka mixo kutani va lwa ni Vaamoni ri ko ri hisa; lava seleke va hangalasiwa; a ka ha salanga vambirhi va ri swin'we.

¹²Kutani tiko ri ku eka Samiele: “I mani la nga ku: ‘Xana Sawulo u ta hi fuma xana?’ Hi nyikeni vanhu lava hi va dlaya.”

¹³Kambe Sawulo a ku: “Ku nga ka ku nga dlayiwi munhu siku leri, hikuva namuntlha Yehovha u tirhile ku hlayiseka eIsraeleni.”

¹⁴Kutani Samiele a ku eka tiko: “Tanani, a hi yeni Giligala, hi ta tiyisa vuhosi kona.”

¹⁵Kavaloko tiko hinkwaro ri ya Giligala, kutani va veka kona Sawulo, a va hosi emahlweni ka Yehovha eGiligala; kutani va tlhava kona magandzelo ya ku khensa emahlweni ka Yehovha; kutani Sawulo ni vanhu hinkwavo va Israele va tsaka ngopfu.