Read tsonga I Samuwele 14 Bible Online

I Samuwele 14 - tsonga bible

I Samuwele 14

¹Siku rin'wana Yonatani, n'wana Sawulo, a ku eka jaha leri ngi ri tamele matlhari ya yena a ku: “Tana, a hi yeni ekhokholweni ra Vafilista leri nge hase.” Kambe a nga byelanga nchumu eka tata wa yena.

²Sawulo a a tshamile emakun'weni ya Gibeya, ehansi ka murhi wa girenada lowu nga eMigirono; kutani vanhu lava ngi va ri na yena a va ri 600.

³Ahiya, n'wana Ahituba, makwa Ikabodo, n'wana Finiyasi, n'wana Heli, muprista wa Yehovha eXilo, a ambele Efodi, kambe tiko a ri tivanga leswaku Yonatani a fambile.

⁴Exikarhi ka tindlela leto khuma leti Yonatani a ringetaka ku famba ha tona ku ya ekhokholweni ra Vafilista hakona, a ku ri ni ribye ro leha hitlhelo rin'wana, ni ribye ro leha hitlhelo rin'wana vito ra rin'wana a va ku i Bosesi ra rin'wana, Sene.

⁵Ribye rin'wana a ri yimile en'walungwini, ri langutene na Mikamaxa, rin'wana ri ri edzongeni, ri langutene na Geba.

⁶Yonatani a ku eka jaha leri ngi ri tamele matlhari ya yena a ku: “Tana, a hi ye, hi ya fika ekhokholweni ra lava nga yimbangiki, kumbe Yehovha u ta hi lwela, hikuva a ku na xilo lexi sivelaka Yehovha ku ponisa, hambi vanhu va tele, hambi va nga ri vangani.”

⁷Mutameri wa matlhari ya yena a ku eka yena: “Endla hinkwaswo leswi nga embilwini ya wena; yana laha u swi rhandzaka kona; ndzi ta ku landza laha mbilu ya wena yi nga ta ku fambisa kona.”

⁸Yonatani a ku: “Hi ta ya eka vanhu lava, hi tikombisa eka vona;

⁹loko va hi byela, va ku: ‘Yimani la, hi ko hi ta eka n'wina!’ Hi ta yima kona, kutani hi nga tlhandlukeli eka vona.

¹⁰Kambe loko va ku: ‘Tanani ka hina!’ Hi ta tlhandluka, hikuva Yehovha u va nyiketile emavokweni ya hina; hi xona xikombiso xa hina.”

¹¹Kavaloko va tikombisa havambirhi ekhokholweni ra Vafilista, kutani Vafilista va ku: “Vaheveru hi lava, va huma emakheleni lawa va tumbeleke eka wona.”

¹²Kutani vanhu va khokholo va vulavula na Yonatani ni mutameri wa matlhari ya yena, va ku: “Tanani ka hina, hi ta mi tivisa timhaka.” Kutani Yonatani a ku eka mutameri wa matlhari ya yena: “Tlhandluka endzhaku ka mina, hikuva Yehovha u va nyiketile emavokweni ya Israele.”

¹³Kavaloko Yonatani a tlhandluka, a tipfuna hi mavoko ni milenge, a landziwa hi mutameri wa matlhari ya yena. Kutani Vafilista va wa emahlweni ka Yonatani, va dlawa hi mutameri wa matlhari endzhaku ka yena.

¹⁴Eku dlayiweni loko sungula loku, Yonatani ni mutameri wa matlhari ya yena va dlaye vanhu lava lavaka ku va makume mambirhi, endhawini leyi ringanaka ni hafu ya ndzima.

¹⁵Kutani nchavo wu va kona emixaxeni ni le tikweni ni le xikarhi ka vanhu hinkwavo va tiko; vanhu va khokholo ni lava fambeke ku ya phanga, va khomiwa hi ku chava na vona; kutani tiko ri tsekatseka; a ku ri ku chava ka Xikwembu.

¹⁶Valanguteri va Sawulo lava ngi va ri eGibeya wa Benjamini, va vona vunyingi loko byi hangalaka, byi tsutsuma hinkwako.

¹⁷Kutani Sawulo a ku eka vanhu lava ngi va ri na yena: “Hlayani, mi ta vona xana i mani la sukeke eka hina!” Va hlaya, kutani maswivo, Yonatani ni mutameri wa matlhari ya yena a va pfumaleka.

¹⁸Sawulo a ku eka Ahiya: “Tshineta areka ya Xikwembu!” Hikuva areka ya Xikwembu a yi ri kona siku lero ni vana va Israele.

¹⁹Kakuloko Sawulo a ha vulavula ni muprista, nkitsikitsi a wu ri karhi wu kula emixaxeni ya Vafilista. Kutani Sawulo a ku eka muprista: “Tlherisa voko ra wena!”

²⁰Kavaloko Sawulo ni tiko hinkwaro leri ngi ri ri na yena va hlengeletana va ya laha va waka kona, kutani maswivo, Vafilista a va tlhavana hi matlhari, kambe nkitsikitsi a wu ri lowukulu ngopfu.

²¹Vaheveru lava ngi va ri na Vafilista emixaxeni ya vona, va hundzuka va ya yima etlhelweni ra Vaisraele lava ngi va ri na Sawulo na Yonatani.

²²Kutani vanhu va Israele lava tumbeleke entshaveni ya Efrayimi, loko va twa leswaku Vafilista va chavile, va chivirika na vona ku va hlongorisa va ri karhi va lwa.

²³Yehovha a ponisa Israele siku lero; kutani nyimpi yi ya fika eBeta-Avene.

²⁴Vanhu va Israele a va karhele ngopfu siku leri, hikuva Sawulo a a hlambanyisile tiko, a ku: “A ku rhuketeriwe munhu la nga ta dya swakudya ku fikela nimadyambu, ndzi nga si tirihisela eka valala va mina!” Kutani a ku vanga na munhu la nantseke swakudya.

²⁵Kasi vunyingi hinkwabyo a byi nghena exihlahleni, laha ku nga ni vulombe ehansi.

²⁶Kuteloko tiko ri nghenile exihlahleni, ri vona vulombe lebyi tshonelaka ehansi, kambe a ku vanga na munhu la yisaka voko ra yena enon'wini, hikuva tiko a ri chava ku hlambanya.

²⁷Yonatani a a nga swi twanga loko tata wa yena a hlambanyisa tiko, kutani a tshineta yinhla ya nhonga ya yena, a yi peta exihlengeni xa vulombe, a yisa enon'wini, kutani mahlo ya yena ma pfuleka.

²⁸Kambe un'wana wa tiko a vulavula na yena, a ku: “Tata wa wena u hlambanyisile tiko, a ku: ‘A ku rhuketeriwe munhu la nga ta dya swakudya namuntlha!’ ” Kambe tiko a ri herile matimba.

²⁹Kutani Yonatani a ku: “Tatana u pfilunganyisa tiko; langutani mahlo ya mina hilaha ma nga pfuleka hakona hikuva ndzi nantswile vulombenyana lebyi.

³⁰Ingi loko tiko ri dyile namuntlha, ri pambule eka leswi ri swi phangeke eka valala va rona, xana ku biwa ka Vafilista a ku nga vanga lokukulu ku tlurisa xana?”

³¹Siku leri va hlasela Vafilista ku suka eMikamaxa, ku ya fika eAyaloni, kambe vanhu a va herile matimba ngopfu.

³²Kutani tiko ri tsutsumela leswi phangiweke, ri teka tinyimpfu ni tihomu ni marhole; va swi tlhava ehansi va dya nyama yi ri ni ngati.

³³Kambe va ya byela Sawulo, va ku: “Waswivo, tiko ri dyohele Yehovha hi ku dya nyama ni ngati.” Kutani Sawulo a ku: “Mi dyohile. Sweswi, vumbuluxelani ribye lerikulu eka mina!”

³⁴Kambe Sawulo a ku: “Hangalakani exikarhi ka tiko, mi ku eka vona: ‘Ndzi tiseleni un'wana ni un'wana homu ya yena kumbe nyimpfu ya yena, mi yi tlhava kwala! Mi ta dya mi nga dyoheli Yehovha hi ku dya ni ngati.’ ” Kavaloko tiko hinkwaro ri tisa nivusiku swifuwo leswi ri swi tameleke va swi tlhava kona.

³⁵Kutani Sawulo a akela Yehovha alitari: yi va alitari leyo rhanga leyi a yi akeleke Yehovha.

³⁶Kutani Sawulo a ku: “A hi ngirimeleni, hi landza Vafilista nivusiku, hi va hlasela ku fikela nimixo, hi nga va siyeli munhu.” Kutani va ku: “Endla hinkwaswo leswi u swi rhandzaka.” Kambe muprista a ku: “A hi tshineleni ka Xikwembu kwala!”

³⁷Kavaloko Sawulo a vutisa Xikwembu, a ku: “Xana ndzi ta ngirimela ku landza Vafilista xana? U ta va nyiketa emavokweni ya Vaisraele-ke?” Kambe Xikwembu a xi n'wi hlamulanga nchumu siku leri.

³⁸Kutani Sawulo a ku: “Tshinelani, n'wina vakulukumba hinkwenu va tiko! Lavisisani mi ta yona xana xidyoho i xihi lexi nga endliwa namuntlha!

³⁹Hikuva Yehovha la ponisaka Israele wa hanya! Hambi nandzu wu ri wa Yonatani; n'wananga, u ta fa.” Kambe exikarhi ka tiko hinkwaro a ku hlamulanga munhu.

⁴⁰Kutani a ku eka Vaisraele hinkwavo: “Yimani hitlhelo, mina ni n'wananga, Yonatani, hi ta yima hitlhelo.” Tiko ri ku eka Sawulo: “Endla leswi u swi rhandzaka!”

⁴¹Kutani Sawulo a ku eka Yehovha: “Oho! Xikwembu xa Israele! Hi kombise timhaka!” Kutani ku khomiwa Yonatani na Sawulo, kambe tiko ri tshunxiwa.

⁴²Sawulo a engeta, a ku: “Hlahluvani hi vuhlolotwana exikarhi ka mina na Yonatani, n'wananga.” Kutani Yonatani a khomiwa.

⁴³Sawulo a ku eka Yonatani: “Ndzi byele lexi u xi endleke.” Kutani Yonatani a n'wi byela, a ku: “Ndzi nantswile vulombenyana hi yinhla ya nhonga leyi ndzi yi tameleke, hi mina loyi, ndzi ta fa!”

⁴⁴Sawulo a ku: “Xikwembu a xi endle hi matimba loko u nga fi Yonatani!”

⁴⁵Kambe tiko ri ku eka Sawulo: “Yonatani u ta fa xana, yena la nga ponisa Israele swonghasi-ke? A hi swona! Yehovha wa hanya: ku nga ka ku nga wi ehansi nsisi ni wun'we enhlokweni ya yena, hikuva u tirhile na Xikwembu namuntlha!” Sweswo tiko ri kutsula Yonatani, kutani a nga fanga.

⁴⁶Sawulo a tlhela eku hlongoriseni ka Vafilista, kutani Vafilista va famba eka rikwavo.

⁴⁷Sawulo, kuteloko a nghenile evuhosini bya Israele a hlasela valala hinkwavo lava ngi va n'wi rhendzele, va ri Vamowabu, ni vana va Amoni, na Edomu, ni tihosi ta Soba, ni Vafilista; kutani hinkwako laha ingi a kongoma kona, a a ri muhluri.

⁴⁸A endla hi matimba, kutani a hlula Amaleke, a va a kutsula Israele emavokweni ya lava n'wi hlaselaka.

⁴⁹Vana va vavanuna va Sawulo a a ri Yonatani, na Ixivhi na Maliki-Xuwaka. Mavito ya vanhwanyana vambirhi va yena hi lawa: ra lowa hosi i Meraba, ni ra ndzisana ya yena i Mikala.

⁵⁰Vito ra nsati wa Sawulo a a ri Ahinowama, n'wana Ahimaasi, ni vito ra ndhuna ya nyimpi ya yena a a ri Abinere, n'wana Neri, makwa tata wa Sawulo.

⁵¹Hikuva Kixi, tata wa Sawulo, na Neri, tata wa Abinere, a va ri vana va Abiele.

⁵²Masiku hinkwawo ya ku hanya ka Sawulo, a ku lwiwa hi matimba ni Vafilista; kutani, kakuloko Sawulo a vona wanuna lowo tiya ni wa vunhenha, a n'wi hlawula a famba na yena.