Read tsonga I Samuwele 18 Bible Online

I Samuwele 18 - tsonga bible

I Samuwele 18

¹Kuteloko Davhida a hetile ku vulavula na Sawulo, moya wa Yonatani wu namarhela moya wa Davhida, kutani Yonatani a n'wi rhandza kukota moya wa yena.

²Siku rolero Sawulo a n'wi teka eka yena, a nga n'wi pfumelelanga ku tlhelela ekaya ka tata wa yena.

³Kutani Yonatani a endla xinakulobye na Davhida, hikuva a a n'wi rhandza kukota moya wa yena.

⁴Kavaloko Yonatani a hluvula nkhancu lowu a wu ambaleke, a wu nyika Davhida swin'we ni tinguvu ta yena, hambi ri ri banga, ni vurha, ni vamba ra yena.

⁵Kutani Davhida a huma a famba hinkwako laha Sawulo a n'wi rhumaka kona; kambe a a tlharihile; kutani Sawulo a n'wi veka ndhuna ya vanhu va nyimpi; kutani a a tsakisa tiko hinkwaro, hambi ma ri malandza ya Sawulo.

⁶Kakuloko va nghena loko Davhida a dlayile Mufilista, vavasati va huma emitini hinkwayo ya Israele va ri karhi va yimbalela, va cina emahlweni ka hosi Sawulo, va ri ni madzandzana ni tintlhama, va huwelela hi ku tsaka;

⁷vavasati a va cina va ri karhi va hlamulana, va ku: “Sawulo u dlele khume ra madzana, Kambe Davhida u dlele dzana ra madzana!”

⁸Kutani Sawulo a kariha ngopfu; rito leri a ri biha emahlweni ka yena kutani a ku va nyika Davhida dzana ra madzana, kambe va ndzi nyika khume ra madzana ntsena, a pfumala vuhosi ntsena.

⁹Ku sungula siku lero ni ku ya emahlweni, Sawulo a languta Davhida hi tihlo lero biha.

¹⁰Hi siku leri tlhandlamaka, moya lowo biha lowu rhumiwaka hi Xikwembu wu khoma Sawulo, kutani a bvumbha a ri endlwini ya yena, Davhida yena a a yimba haripa kukotisa siku rin'wana ni rin'wana, kambe Sawulo a a tamele tlhari evokweni ra yena.

¹¹Kutani Sawulo a tlakusa tlhari, a ku: “Ndzi ta tlhava Davhida ni khumbi.” Kambe Davhida a bvutama kambirhi emahlweni ka yena.

¹²Kutani Sawulo a chava Davhida, hikuva Yehovha a a ri na Davhida, kambe a sukile eka yena.

¹³Kavaloko Sawulo a n'wi rhuma ekule na yena, a n'wi endla ndhuna ya vanhu va khume ra madzana; kutani Davhida a tshama a huma a nghena, a ri emahlweni ka tiko;

¹⁴Davhida a a endla hi vutlhari etimhakeni hinkwato, kutani Yehovha a a ri na yena.

¹⁵Sawulo a vona leswaku a tlharihile ngopfu, kutani a n'wi chava.

¹⁶Kambe Vaisraele hinkwavo ni va Yuda hinkwavo a va rhandza Davhida hikuva a a tshama a nghena ni ku huma emahlweni ka vona.

¹⁷Sawulo a ku eka Davhida: “Meraba, n'wananga wa mativula hi loyi; ndzi ta ku nyika yena, a va nsati wa wena, ntsena u va nhenha ya mina u lwa mivango ya Yehovha.” Kambe Sawulo a anakanya, a ku: “Voko ra mina ri nga ka ri nga vi ehenhla ka yena, kambe voko ra Vafilista a ri ve ehenhla ka yena!”

¹⁸Davhida a ku eka Sawulo: “Ndzi mani xana, ni ku hanya ka mina i yini, ni yindlu ya tatana i yini eIsraeleni xana, leswaku ndzi va mukon'wana wa Sawulo?”

¹⁹Kutakuloko Meraba, n'wana Sawulo, a fanekele ku nyikiwa Davhida, a nyikiwa Adriele wa Mehola, a va nsati wa yena.

²⁰Kambe Mikala n'wana Sawulo a a rhandza Davhida, kutani va ya byela Sawulo, kutani swi n'wi tsakisa.

²¹Sawulo a ku: “Ndzi ta n'wi nyika yena, wu ta va ntlhamu eka yena leswaku voko ra Vafilista ri va ehenhla ka yena.” Sawulo a ku eka Davhida ra vumbirhi: “Namuntlha u ta va mukon'wana wa mina.”

²²Kutani Sawulo a lerisa malandza ya yena, a ku: “Vulavulani hi vutlhari na Davhida, mi ku eka yena: ‘Waswivo, hosi ya ku rhandza, ni malandza hinkwawo ya yena ma ku rhandza; sweswi, u va mukon'wana wa hosi.’ ”

²³Malandza ya Sawulo ma ya byela Davhida marito lawa; kutani Davhida a ku: “Xana i xilo lexitsongo emahlweni ka n'wina ku va mukon'wana wa hosi xana? Loko ndzi ri mina, ndzi munhu wa xisiwana, ni wa matimba lamatsongo.”

²⁴Kutani malandza ya Sawulo ma n'wi byela, ma ku: “Davhida u vurile swo karhi.”

²⁵Sawulo a ku: “Mi ta byela Davhida, mi ku: ‘Hosi a yi lavi ndzovolo, kambe yi lava dzana ra misuvu ya Vafilista hosi yi ta tirihisela ha yona eka valala va yena.’ ” Kasi Sawulo a a ehleketa ku lovisa Davhida hi mavoko ya Vafilista.

²⁶Kutani malandza ya yena ma ya byela Davhida marito lawa, kutani a swi tsakisa Davhida ku va mukon'wana wa hosi; kambe masiku a ma nga si hela.

²⁷Kavaloko Davhida a pfuka, a famba ni vanhu va yena, a dlaya vavanuna va madzana mambirhi exikarhi ka Vafilista, kutani Davhida a tisa misuvu ya vona, va ya nyika hosi ntsengo hinkwawo wa yona, leswaku a va mukon'wana wa hosi. Kutani Sawulo a n'wi nyika Mikala, n'wana wa yena, a va nsati wa yena.

²⁸Sawulo a vona ni ku tiva leswaku Yehovha a a ri na Davhida; kambe yena Mikala, n'wana Sawulo, a a n'wi rhandza.

²⁹Sawulo a engeta a chava Davhida ku tlurisisa, a va nala wa yena hi masiku.

³⁰Kakuloko tihosi ta Vafilista ti huma ku ya hlasela, emikarhini hinkwayo loko ti huma, Davhida a a tlula hi vutlhari malandza hinkwawo ya Sawulo; kutani vito ra yena ri dzunisiwa ngopfu.