Read tsonga I Samuwele 20 Bible Online

I Samuwele 20 - tsonga bible

I Samuwele 20

¹Kutani Davhida a suka eNayoto wa Rhama; a ya humelela eka Yonatani, a ku eka yena: “Ndzi endle yini xana? Nandzu wa mina hi wihi, kambe ndzi dyohele tata wa wena hi yini, leswi a lavaka vutomi bya mina?”

²Yonatani a ku: “A hi swona! U nga ka u nga fi! Waswivo, tatana a nga endli nchumu, hambi xi ri lexikulu hambi lexitsongo, a nga ndzi tivisanga; xana tatana a nga ndzi fihlelela yini mhaka leyi? A swi tano.”

³Kutani Davhida a hlambanya kambe, a ku: “Tata wa wena wa swi tiva swinene leswaku ndzi kumile tintswalo emahlweni ka wena, kutani u te: ‘Yonatani a nga tshuki a swi tiva, leswaku swi nga n'wi dyisi mbitsi!’ Kambe Yehovha wa hanya, ni moya wa wena wa hanya: ku ni nkondzo wun'we ntsena exikarhi ka mina ni ku fa.”

⁴Yonatani a ku eka Davhida: “Mbilu ya wena yi ri yini? Ndzi ta ku endlela swona.”

⁵Davhida a ku eka Yonatani: “N'weti yi ta vonaka mundzuku, ndzi ta fanela ku tshamisa eku dyeni ni hosi; ndzi tshike ndzi famba, ndzi ya tumbela emasin'wini ku fika siku ra vunharhu nimadyambu.

⁶Kungakuloko tata wa wena a vutisa ta ku pfumariwa ka mina, u ta ku eka yena: ‘Davhida u ndzi kombele ngopfu ku pfumeleriwa ku tsutsuma eBetlehema, emutini wa yena, hikuva ku ni xitlhavelo xa lembe rin'wana ni rin'wana xa yindlu hinkwayo ya yena.’

⁷Loko a ku: ‘Hi swona!’ Ku ni ku rhula eka nandza wa wena; kambe loko a kariha ngopfu, tiva leswaku ku biha loku, ku kaneriwile hi yena.

⁸Wa nga kombisa nandza wa wena tintswalo ta wena leswi u endleke vunakulobye hi vito ra Yehovha ni nandza wa wena. Ni loko ku ni nandzu wun'wana eka mina, ndzi dlaye u ri wena, u ta ndzi yisela yini eka tata wa wena?”

⁹Yonatani a ku eka yena: “U nga vurisi sweswo! Kasi loko ndzi nga tiva kunene leswaku tatana u kanerile ku ku lovisa, ndzi nga ka ndzi nga ku tivisi xana?”

¹⁰Davhida a ku eka Yonatani: “I mani la nga ta ndzi tivisa timhaka leti, kumbe ku hlamula loko biha ka tata wa wena xana?”

¹¹Yonatani a ku eka Davhida: “Tana, hi ya emasin'wini!” Kutani va ya havambirhi emasin'wini.

¹²Kutani Yonatani a ku eka Davhida: “Yehovha i Xikwembu xa Israele! Kutakuloko ndzi vutisisile tatana, mundzuku kumbe mundlwana enkarhini wolowo, kutani timhaka ta yena ti lulamela Davhida, loko ndzi nga ku rhumeli munhu ku ku tivisa tona,

¹³Yehovha a endle hi matimba eka Yonatani, ni ku n'wi engetelela! Kambe loko tatana a rhandza ku ku endla leswo biha, ndzi ta ku tivisa, ndzi ku balekisa, u tifambela hi ku tsaka; ntsena Yehovha a ve na wena, kukotisa loko ingi a ri na tatana!

¹⁴Kutani loko ndza ha hanya, wa nga ndzi endlela hi vunene bya Yehovha leswaku ndzi nga fi.

¹⁵Kambe u nga tlherisi vunene bya wena endlwini ya mina hi masiku, hambiloko Yehovha a pulukanya valala va Davhida hinkwavo emisaveni.”

¹⁶Kutani Yonatani a endla xinakulobye ni yindlu ya Davhida, a ku: “Yehovha a a tirihisele eka valala va Davhida!”

¹⁷Yonatani a hlambanyisa kambe Davhida hi rirhandzu leri a n'wi rhandzeke ha rona; hikuva a a n'wi rhandza kukota moya wa yena.

¹⁸Yonatani a ku: “Mundzuku n'weti wu ta vonaka, swi ta vonaka leswaku a u nga vi kona, hikuva xitshamo xa wena xi ta pfumala n'wini wa xona.

¹⁹U ta tshama masiku manharhu, kutani u ta ngirimela hi ku hatlisa, u ta ta endhawini leyi u tumbeleke eka yona siku ra mhaka; u tshama ekusuhi ni ribye ra Ezele.

²⁰Loko ndzi ri mina, ndzi ta hoxa miseve minharhu etlhelo leri, kukotisa loko ngi ndzi komba pakana.

²¹Kutani ndzi ta rhumela wandzisanyana, ndzi ku eka yena: ‘Famba u lava miseve.’ Kutakuloko ndzi ku eka wandzisanyana: ‘Languta, miseve yi haleno ka wena, yi teke,’ u ta vuya, hikuva hinkwaswo swi ku lulamele, a ku na ku chava nchumu; Yehovha wa hanya.

²²Kambe loko ndzi ku eka wandzisanyana: ‘Languta, miseve yi le mahlweni ka wena!’ Hi kona u nga ta famba, hikuva Yehovha a ku balekisa.

²³Loko ri ri rito leri hi ri vuleke, mina na wena, waswivo, Yehovha u le xikarhi ka mina na wena hilaha ku nga heriki.”

²⁴Kavaloko Davhida a tumbela emasin'wini, kutani ku vonaka n'weti, kutani hosi yi tshamisa etafuleni ku dya swakudya.

²⁵Hosi yi tshamisa hi laha yi toloveleke hakona exitshan'weni xa yona, exitshan'weni lexi nga ekhumbini, kutani Yonatani a yima, kambe Abinere a tshamisa ekusuhi na Sawulo; kambe xitshamo xa Davhida a xi nga ri na munhu.

²⁶Sawulo a nga vulangi nchumu siku lero hikuva a a ku: “A humelele hi nchumu, a nga tengangi; kunene a nga tengangi.”

²⁷Kutani siku leri tlhandlamaka, ri nga ra vumbirhi ra n'weti leyintshwa, xitshamo xa Davhida a xi nga ri na munhu; Sawulo a ku eka Yonatani, n'wana wa yena: “Hi ku yini leswi n'wana Yese a nga tangi eswakudyeni tolo, hambi ku ri namuntlha?”

²⁸Yonatani a hlamula, a ku eka Sawulo: “Davhida u ndzi komberile ku pfumeleriwa ku ya eBetlehema.

²⁹U te: ‘Wa nga ndzi tshika ndzi famba, hikuva ku ni xitlhavelo xa yindlu ya hina emutini, kutani makwerhu u ndzi lerisile ku ya kona; sweswi, loko ndzi kumile tintswalo emahlweni ka wena, ndzi ta hatlisa ndzi ya kona ndzi ta vonana ni vamakwerhu.’ Hikwalaho ka swona a nga tangi etafuleni ra hosi.”

³⁰Kavaloko Sawulo a karihela Yonatani a ku eka yena: “N'wana wa lunya ni wa nsele, xana a ndzi swi tivi leswaku u twanana ni n'wana Yese swi va tingana ta wena ni tingana ta vuhava bya mana wa wena?

³¹Hikuva hi mikarhi hinkwayo leyi n'wana Yese a nga ta hanya la emisaveni, u nga ka u nga tiyisiwi, hambi u ri wena, hambi byi ri vuhosi bya wena. Sweswi, rhuma vanhu va ya n'wi khoma va n'wi tisa eka mina, hikuva u fanekele hi rifu.”

³²Yonatani a hlamula a ku eka Sawulo, tata wa yena: “U ta fela yini-ke? U endle yini xana?”

³³Kutani Sawulo a tlakusa tlhari ra yena ku n'wi tlhava ha rona; sweswi Yonatani a tiva leswaku mhaka yi tiyile eka tata wa yena ku dlaya Davhida.

³⁴Kutani Yonatani a huma etafuleni hi ku kariha ngopfu, a nga dyanga swakudya siku ra vumbirhi ra n'weti le yintshwa, hi ku va a twa ku vaviseka hikwalaho ka Davhida, hi ku va tata wa yena a n'wi sandzile ngopfu.

³⁵Ni mixo, Yonatani a huma ku ya emasin'wini laha a twananeke na Davhida; kambe wandzisanyana a a ri na yena.

³⁶Kutani a ku eka wandzisanyana: “Tsutsuma, u ya lava miseve leyi ndzi nga ta yi copa.” Wandzisanyana a tsutsuma, kutani a hoxa nseve wu n'wi tlula;

³⁷wandzisanyana a fika laha ku nga ni nseve lowu Yonatani a wu copeke, kutani Yonatani a huwelela eka wandzisanyana a ku: “Xana nseve a wu kona emahlweni ka wena-ke?”

³⁸Kutani Yonatani a huwelela eka wandzisanyana, a ku: “Angwetla, u nga yimi!” Kutani wandzisanyana wa Yonatani a rhola nseve a vuya eka hosi ya yena.

³⁹Kambe wandzisanyana a a nga tivi nchumu; a a ri Yonatani na Davhida ntsena lava nga tiva mhaka.

⁴⁰Kavaloko Yonatani a neha matlhari ya yena eka wandzisanyana la ngi a ri na yena, a ku eka yena: “Famba u swi yisa emutini!”

⁴¹Kuteloko wandzisanyana a sukile, Davhida a yima a languta edzongeni, a tiwisa ehansi emombyeni, a khinsama kanharhu. Kutani va ntswontswana va rila swin'we; Davhida a rila ngopfu ku tlurisa.

⁴²Kutani Yonatani a ku eka Davhida: “Famba hi ku tsaka leswi hi nga hlambanyelana hi vito ra Yehovha, hi te: ‘Yehovha a a ve exikarhi ka mina na wena, ni le xikarhi ka vana va mina ni vana va wena hi masiku!’ ”

⁴³Kutani Davhida a suka a famba, kambe Yonatani a tlhela a nghena emutini.