Read tsonga I Samuwele 21 Bible Online

I Samuwele 21 - tsonga bible

I Samuwele 21

¹Kutani Davhida a ya eNobo eka Ahimeleke, muprista. Ahimeleke a ya hlangana na Davhida hi ku rhurhumela, a ku eka yena: “Xana u ri swaku ha yini, a ku na munhu na wena ha yini-ke?”

²Davhida a hlamula, a ku eka Ahimeleke, muprista: “Hosi yi ndzi lerisele mhaka, yi te: ‘Ku nga tshuki ku va na munhu la tivaka mhaka leyi ndzi ku rhumelaka yona, ni ku lerisa loku ndzi ku leriseke.’ Loko va ri vanhu va mina, ndzi va kombisile kun'wana ni kun'wana.

³Sweswi, u na yini emavokweni ya wena? Ndzi nyike swinkwa swa ntlhanu, hambi swi ri leswi u nga ta swi kuma.”

⁴Muprista a hlamula, a ku eka Davhida: “A ndzi na vuswa bya masiku, kambe ku ni swinkwa leswi hlawuriweke; loko ntsena vanhu va wena va avanile ni vavasati.”

⁵Davhida a hlamula a ku eka muprista: “Ku ni masiku manharhu leswi hi nga riki na vavasati, loko swi ri swibya swa vanhu va mina swi basile; kutani, hambi ndlela leyi yi nga basanga, yi ta kwetsimisiwa namuntlha hi swibya.”

⁶Kavaloko muprista a n'wi nyika swinkwa leswi hlawuriweke, hikuva a ku nga ri na vuswa byin'wana loko swi nga ri swinkwa swa xikombiso leswi va swi suseke emahlweni ka Yehovha, va ta veka kona swinkwa leswi kufumelaka siku va tekeke swin'wana.

⁷Kambe nandza un'wana wa Sawulo, a a ri kona siku lero, a hlwerisiwe emahlweni ka Yehovha. Vito ra yena a a ri Dowege wa Edomu, a a ri ndhuna ya varisi va Sawulo.

⁸Kutani Davhida a ku eka Ahimeleke: “Xana a ku na tlhari, hambi ri ri banga ekusuhi na wena-ke? Hikuva a ndzi tekanga banga ra mina, hambi ma ri matlhari ya mina, hikuva mhaka ya hosi yi ndzi hatlisele.”

⁹Muprista a ku: “Ku ni banga ra Goliyadi, Mufilista, loyi u n'wi dlayeke enkoveni wa mikanyi, hi rona, ri phutseriwile engubyini endzhaku ka efodi; loko u rhandza ku ri teka, ri teke, hikuva a ku na rin'wana kwala.” Kutani Davhida a ku: “A ku na rin'wana leri fanaka na rona, ndzi nyikete rona.”

¹⁰Kavaloko Davhida a suka a baleka siku lero emahlweni ka Sawulo, a ya eka Akixi, hosi ya Gati.

¹¹Kutani malandza ya Akixi ma ku eka yena: “Loyi a hi Davhida hosi ya tiko xana? A hi yena loyi va n'wi yimbeleleke tinsin'wini, va ku: “ ‘Sawulo u dlele khume ra madzana! Kambe Davhida u dlele dzana ra madzana!’ ”

¹²Davhida a nghenisa marito lawa embilwini ya yena, kutani a chava ngopfu Akixi, hosi ya Gati.

¹³Kutani a endla swange a hlanya emahlweni ka vona, a tsala marimba ya tinyangwa, a tshika rihlakahla ri xiririka emalebvini ya yena.

¹⁴Akixi a ku eka malandza ya yena: “Ma vona kunene leswaku munhu loyi u ni rihuhu; mi n'wi tisele yini ka mina?

¹⁵Xana lava hlanyaka va pfumariwa eka mina, leswi mi ndzi tiseleke loyi leswaku a ta hlanya emahlweni ka mina? Xana loyi a nga nghena endlwini ya mina-ke?”