Read tsonga I Samuwele 22 Bible Online

I Samuwele 22 - tsonga bible

I Samuwele 22

¹Davhida a suka kona, a tsutsumela ebakweni ra Adulama. Kutani vamakwavo ni yindlu hinkwayo ya tata wa yena va swi twa, va ngirimela kona eka yena.

²Kavaloko vanhu hinkwavo lava nga eku chaveni, ni hinkwavo lava ingi va ri ni milandzu ni hinkwavo lava vavisekaka emimoyeni ya vona, va hlengeletana eka yena, kutani a va hosi ya vona. Vanhu lava lavaka ku va mune wa madzana a va ri na yena.

³Davhida a suka kona, a ya eMispe wa Mowabu; kutani a ku eka hosi ya Mowabu: “Wa nga pfumelela tatana na manana va tshama eka wena, ndzi ko ndzi tiva leswi Xikwembu xi nga ta endla swona ha mina.”

⁴Kavaloko a va tisa emahlweni ka hosi ya Mowabu; kutani va tshama eka yena hi masiku hinkwawo lawa Davhida a tshamaka ekhokholweni ha wona.

⁵Kutani Gadi, muprofeta, a ku eka Davhida: “U nga tshami ekhokholweni; suka u ya etikweni ra Yuda.” Kutani Davhida a suka a ya exihlahleni xa Hereti.

⁶Kutani Sawulo a twa leswaku vanhu va tiva timhaka ta Davhida ni ta vanhu lava ngi va ri na yena. Kambe Sawulo a a tshamisile eGibeya, ehansi ka nkuhlu, exitsungeni; a a ri ni tlhari evokweni ra yena, ni malandza ya yena hinkwawo a ma yimile ekusuhi na yena.

⁷Kavaloko Sawulo a ku eka malandza ya yena lama yimeke ekusuhi na yena: “Yingisani, va Benjamini! Xana n'wana Yese u ta mi nyika hinkwenu masimu ni tivhinya? Xana u ta mi veka hinkwenu tindhuna ta khume ra madzana ni ta dzana,

⁸leswi mi twananeke ku ndzi pfuka, hikuva a ku na munhu la ndzi byelaka leswaku n'wananga u endlile xinakulobye ni n'wana Yese, na swona a ku na un'we wa n'wina la ndzi vavisekelaka, a ndzi byela leswaku n'wananga a ndzi pfuxele nandza wa mina ku ndzi etlelela hilaha a swi endlaka hakona namuntlha!”

⁹Kutani Dowege, wa Edomu, la yimeke swin'we ni malandza ya Sawulo, a hlamula a ku: “Ndzi vonile n'wana Yese a ta eNobo eka Ahimeleke, n'wana Ahituba.

¹⁰Kutani Ahimeleke u n'wi vutisisile Yehovha a n'wi nyika timbuva, kambe u n'wi nyika ni banga ra Goliyadi, Mufilista.”

¹¹Kutani hosi yi rhuma ku ya vitana Ahimeleke n'wana Ahituba, muprista, ni yindlu hinkwayo ya tata wa yena, va ri vaprista lava nga eNobo; kutani va ta hinkwavo ehosini.

¹²Sawulo a ku: “Wa nga yingisa n'wana Ahituba.” Kutani a ku: “Hi mina loyi, hosi yanga.”

¹³Sawulo a ku eka yena: “Xana mi ndzi dlumamele yini wena ni n'wana Yese, leswi u n'wi nyikeke vuswa ni banga kutani u n'wi vutisisile Yehovha, leswaku a ndzi pfuka, a ndzi etlelela hilaha a endlaka hakona namuntlha?”

¹⁴Ahimeleke a hlamula, a ku eka yena: “I mani exikarhi ka malandza hinkwawo ya wena la tshembekaka kukotisa Davhida, mukon'wana wa hosi yi nga ndhuna leyi tivaka timhaka ni leyi dzunisiwaka endlwini ya wena?

¹⁵Xana ndzi sungula namuntlha ku n'wi vutisela Xikwembu xana? Mhaka leyi yi le kule na mina! Hosi yi nga vekeli nandza wa yona nandzu ni wun'we, hambi ka un'wana wa yindlu ya tatana, hikuva exikarhi ka timhaka hinkwato leti, nandza wa wena a nga tivi mhaka ni yin'we, hambi leyitsongo, hambi leyikulu.”

¹⁶Kutani hosi yi ku eka yena: “U ta fa kunene, wena Ahimeleke, ni yindlu hinkwayo ya tata wa wena.”

¹⁷Kutani hosi yi ku eka malandza lama yimeke ekusuhi na yena: “Hundzukani mi dlaya vaprista va Yehovha, hikuva na vona va twanana na Davhida, va swi tivile swinene leswaku a a baleka, kambe a va ndzi tivisanga nchumu.” Kambe malandza ya hosi ma ala ku tlakusa mavoko ya vona ehenhla ka vaprista va Yehovha.

¹⁸Kutani hosi yi ku eka Dowege: “Wena, hundzuka, u dlaya vaprista.” Kutani Dowege, wa Edomu, a hundzuka a dlaya vaprista. A dlaya siku lero vanhu va 85 lava ambaleke efodi ya ntsembyana.

¹⁹Kutani Sawulo a hlasela Nobo, muti wa vaprista, hi vukari bya banga, a dlaya vavanuna ni vavasati ni vana ni swihlangi, ni tihomu ni timbhongolo ni tinyimpfu, a heta hinkwaswo hi vukari bya banga.

²⁰Ku baleka un'wana wa vana va Ahimeleke, n'wana Ahituba, vito ra yena a a ri Abiyatara; a tsutsumela eka Davhida.

²¹Kutani Abiyatara a vikela Davhida leswaku Sawulo u dlayile vaprista va Yehovha.

²²Davhida a ku eka Abiyatara: “Ndzi swi tivile swinene siku leri Dowege wa Edomu, la ngi a ri kona leswaku a nga ka a nga tshiki ku ya byela Sawulo timhaka. Hi mina ndzi nga ni nandzu wa rifu ra yindlu hinkwayo ya tata wa wena.

²³Tshama na mina u nga chavi, hikuva loyi a lavaka vutomi bya mina a lava vutomi bya wena; u ta hlayisiwa swinene ka mina.”