Read tsonga I Samuwele 23 Bible Online

I Samuwele 23 - tsonga bible

I Samuwele 23

¹Kutani va ya byela Davhida, va ku: “Waswivo, Vafilista va hlasela Keyila, va ri karhi va phanga swivuya.”

²Kavaloko Davhida a vutisa Yehovha, a ku: “Xana ndzi ta ya hlasela Vafilista lava?” Yehovha a ku eka Davhida: “Famba, u ta hlula Vafilista kutani u ta ponisa Keyila.”

³Kambe vanhu va Davhida va ku eka yena: “Waswivo, ni haleno etikweni ra Yuda ha ha chava, kutani hi ta ku yini loko hi ya eKeyila, hi ya lwa ni tinyimpi ta Vafilista?”

⁴Davhida a vutisa kambe Yehovha, kutani Yehovha a n'wi hlamula, a ku: “Pfuka, u ngirimela eKeyila, hikuva ndzi ta nyiketa Vafilista emavokweni ya wena.”

⁵Sweswo Davhida a suka ni vanhu va yena, a ya eKeyila, a lwa ni Vafilista, a teka mitlhambi ya vona, a va hlula swinene. Sweswo Davhida a ponisa vaaki va Keyila.

⁶Kakuloko Abiyatara, n'wana Ahimeleke, a balekela eka Davhida eKeyila, efodi a yi ri evokweni ra yena.

⁷Kutani va ya tivisa Sawulo leswaku Davhida u nghene eKeyila. Sawulo a ku: “Xikwembu xi n'wi nyiketile emavokweni ya mina; hikuva u tipfalele emutini lowu nga ni timbanti ni tinghole.”

⁸Kutani Sawulo a vitana tiko hinkwaro va huma nyimpi, va ta ngirimela eKeyila, va rhendzela Davhida ni vanhu va yena.

⁹Kambe Davhida a swi tiva leswaku Sawulo a a n'wi lava, kutani a ku eka Abiyatara, muprista: “Tisa efodi!”

¹⁰Kutani Davhida a ku: “Yehovha, Xikwembu xa Israele, nandza wa wena u swi twile leswaku Sawulo a lava ku nghena eKeyila ku herisa muti hikwalaho ka mina.

¹¹Xana vanhu va Keyila va ta ndzi nyiketa emavokweni ya yena-ke? Xana Sawulo u ta ngirimela hilaha nandza wa wena a swi tweke hakona? Oho Yehovha, Xikwembu xa Israele! Wa nga tivisa nandza wa wena!” Yehovha a hlamula, a ku: “U ta ngirimela.”

¹²Kutani Davhida a ku: “Vanhu va Keyila va ta ndzi nyiketa emavokweni ya Sawulo, mina ni vanhu va mina xana?” Yehovha a ku: “Va ta mi nyiketa.”

¹³Kavaloko Davhida a suka ni vanhu va yena, va lava ku va vavanuna va 600, kutani va huma eKeyila va famba va rhendzeleka hilaha va swi kotaka hakona. Kutani va tivisa Sawulo leswaku Davhida u tsutsumile u suke eKeyila kutani a tshika ku humesa nyimpi.

¹⁴Davhida a tshama emananga, emakhokholweni, kutani a tshama entshaveni ya mananga ya Zifi; Sawulo a a n'wi lava masiku hinkwawo, kambe Xikwembu a xi n'wi nehanga emavokweni ya yena.

¹⁵Davhida a vona leswaku Sawulo a a humile ku lava vutomi bya yena, kutani a tshama emananga ya Zifi, exihlahleni.

¹⁶Kambe Yonatani n'wana Sawulo, a suka a ya eka Davhida exihlahleni, kutani a tiyisa mavoko ya yena eka Xikwembu.

¹⁷A ku eka yena: “U nga chavi, hikuva voko ra tatana Sawulo ri nga ka ri nga ku kumi; u ta fuma Israele, na mina ndzi ta va ndhuna ya wena; tatana Sawulo wa swi tiva na yena.”

¹⁸Kavaloko va endla xinakulobye vona havambirhi emahlweni ka Yehovha. Kutani Davhida a tshama exihlahleni Yonatani yena, a tlhelela endlwini ya yena.

¹⁹Va ka Zifi va tlhandlukela eka Sawulo eGibeya, va ku: “Davhida a nga tumbelanga exikarhi ka hina, hambi emakhokholweni hambi exihlahleni, hambi exitsungeni xa Hakila, lexi nga exineneni ka rivala xana?

²⁰Sweswi, wee hosi, leswi mbilu ya wena yi navelaka ngopfu ku ngirimela, u nga ngirimela, kutani hi ta n'wi nyiketa emavokweni ya hosi.”

²¹Sawulo a ku eka vona: “A mi katekisiwe hi Yehovha hikuva mi ndzi twele vusiwana.

²²Fambani-ke, mi vutisisa swinene mi ta tiva ni ku vona ndhawu ya yena laha nenge wa yena wu nga kona; ni loyi a n'wi voneke kona; hikuva va ndzi byerile leswaku u tlharihile ngopfu.”

²³Mi ta vona ni ku tiva vutumbelo bya yena hinkwabyo; kutani mi ta tlhela eka mina mi ndzi byela mahungu lama tiyeke, kutani ndzi ta famba na n'wina; kungakuloko a ri etikweni leri, ndzi ta n'wi lavisisa exikarhi ka madzanadzana hinkwawo ya Yuda.

²⁴Kutani va suka va famba va ya Zifi, va rhangela Sawulo. Yena Davhida ni vanhu va yena, a va ri emananga ya Mawoni, erivaleni edzongeni ka mananga lamakulu.

²⁵Kutani Sawulo a suka ni vanhu va yena, a ya lava Davhida; kambe Davhida a tivisiwa mahungu lawa, kutani a suka emaribyeni, a tshama emananga ya Mawoni. Sawulo a swi twa, kutani a landzelela Davhida emananga ya Mawoni.

²⁶Sawulo a a famba hitlhelo rin'wana ra ntshava, kambe Davhida ni vanhu va yena, va famba hitlhelo rin'wana ra ntshava. Kakuloko Davhida a tsutsuma ku balekela Sawulo, Sawulo ni vanhu va yena a va ri karhi va lava ku rhendzelekela Davhida ni vanhu va yena ku va khoma.

²⁷Kambe ntsumi yi fika eka Sawulo, yi ku: “Hatlisa u ta, hikuva Vafilista va nghene etikweni.”

²⁸Sawulo a tshika ku hlongorisa Davhida, kutani a tlhela ku ya hlangana ni Vafilista. Hikwalaho, va thyile xivandla lexi, Sela-Maklekoto (Ribye ra ku hambana).