Read tsonga I Samuwele 24 Bible Online

I Samuwele 24 - tsonga bible

I Samuwele 24

¹Davhida a suka kona, a ya tshama emakhokholweni ya Eni-Gedi.

²Kutani kuteloko Sawulo a tlhela eku hlongoriseni ka Vafilista, va ta n'wi byela, va ku: “Waswivo, Davhida u le mananga ya Eni-Gedi.”

³Kavaloko Sawulo a teka vanhu va 3 000 lava hlawuriweke eIsraeleni hinkwawo, kutani a ya lava Davhida ni vanhu va yena emaribyeni ya tintshembe.

⁴A ya fika emadyelweni ya tinyimpfu; endleleni a ku ri ni bako kona, kutani Sawulo a nghena eka rona ku tifunengeta milenge; kambe Davhida ni vanhu va yena a va ri emakun'weni ya bako.

⁵Kutani vanhu va Davhida va ku eka yena: “Hi rona siku Yehovha a ku byelaka, a ku: ‘Waswivo, ndzi nyiketa nala wa wena emavokweni va wena: u n'wi endla hilaha u swi rhandzaka hakona.’ ” Kambe Davhida a pfuka a ya xeka hi vutlhari nguvu ya Sawulo.

⁶Kutani ndzhaku ka swona, ripfalo ra yena ri n'wi tshinya, hikuva a a xekile nguvu ya Sawulo.

⁷Kutani a ku eka vanhu va yena: “Yehovha a a ndzi sivele ku endlela hosi ya mina, a nga muhlawuriwa wa Yehovha, mhaka leyi, ndzi tlakusa voko ra mina ehenhla ka yena! Hikuva i muhlawuriwa wa Yehovha.”

⁸Sweswo Davhida a yimisa vanhu va yena hi marito lawa, kutani a nga va pfumelelanga ku pfuka Sawulo. Kutani Sawulo a pfuka a huma ebakweni, a famba hi ndlela ya yena.

⁹Endzhaku ka swona, Davhida a pfuka a huma ebakweni kutani a huwelela endzhaku ka Sawulo, a ku: “Oho hosi! Hosi yanga!” Sawulo a languta endzhaku ka yena, kutani Davhida a korhama ehansi hi mombo wa yena, a khinsama.

¹⁰Kutani Davhida a ku eka Sawulo: “U yingisela yini marito ya vanhu lava ku byelaka, va ku: ‘Waswivo, Davhida a lava ku ku dyohela’?

¹¹Wa swi vona sweswi hi mahlo ya wena leswaku Yehovha a a ku nyiketile emavokweni ya mina ebakweni. Va ndzi byele ku ku dlaya, kambe ndzi ku tsetselerile, ndzi ku: ‘Ndzi nga ka ndzi nga tlakusi voko ra mina ehenhla ka hosi ya mina, hikuva u muhlawuriwa wa Yehovha.’

¹²Languta tatana, vona nguvu ya wena evokweni ra mina. Leswi ndzi xekeke nguvu ya wena ndzi nga ku dlayanga, tiva ni ku vona leswaku a ku na ku biha ni ku dlaya evokweni ra mina, ni leswaku a ndzi ku dyohelanga; kambe wena wa ndzi hlongorisa ku ndzi tekela vutomi.

¹³Yehovha a a ve muavanyisi exikarhi ka mina na wena; Yehovha kambe a ndzi rihisela eka wena; ntsena voko ra mina ri nga ka ri nga vi ehenhla ka wena.

¹⁴Hilaha xivuriso xa va khale xi nga te: ‘Swo biha swi huma eka lavo biha,’ kambe voko ra mina ri nga ka ri nga vi ehenhla ka wena.

¹⁵Hosi ya Israele yi humile endzhaku ka mani xana? U landzela mani xana? I mbyana leyi feke, kumbe vutseka xana?

¹⁶Yehovha u ta va muavanyisi, u ta avanyisa xikarhi ka mina na wena! A a vone, kambe a a kanele mhaka ya mina, kutani a a ndzi ponise evokweni ra wena.”

¹⁷Kuteloko Davhida a hetile ku byela Sawulo marito lawa, Sawulo a ku: “Xana i rito ra wena, Davhida, n'wananga?” Kutani Sawulo a tlakusa rito a rila.

¹⁸Kutani a ku eka Davhida: “Wa ndzi tlula hi ku lulama, hikuva u ndzi tlherisele leswinene, kambe mina ndzi ku tlherisele leswo biha.

¹⁹U kombisile namuntlha leswaku u ndzi endle hi vunene: Yehovha u ndzi vekile namuntlha emavokweni ya wena, kambe a ku ndzi dlayanga.

²⁰Loko munhu a hlangana ni nala wa yena, xana a n'wi tshika a famba endleleni ya yena hi ku tsaka xana? Yehovha a a ku tlherisele hi vunene, hikwalaho ka leswi u ndzi endleleke namuntlha.

²¹Sweswi, ndza swi tiva leswaku u ta va hosi, ni leswaku vuhosi bya Israele byi ta tiya evokweni ra wena.

²²Kambe sweswi, ndzi hlambanyele hi Yehovha leswaku u nga ka u nga herisi vana va mina endzhaku ka mina ni ku hlangula vito ra mina endlwini ya tatana.”

²³Davhida a hlambanyela Sawulo, kutani Sawulo a suka a famba ekaya ka yena, kambe Davhida ni vanhu va yena va tlhandlukela ekhokholweni.