Read tsonga I Samuwele 26 Bible Online

I Samuwele 26 - tsonga bible

I Samuwele 26

¹Vanhu va Zifi va ta eka Sawulo eGibeya, va ku: “Davhida a nga tumbelanga exitsungeni xa Hakila, ku langutene ni mananga xana?”

²Kavaloko Sawulo a pfuka, a ngirimela emananga ya Zifi, a ri ni vanhu lava hlawuriweke Vaisraele va 3 000, a ya lava Davhida emananga ya Zifi.

³Kutani Sawulo a gova exitsungeni xa Hakila, ku langutene ni rivala, kusuhi ni ndlela; kambe Davhida a a tshamile emananga, kutani a vona leswaku Sawulo a a tile ku ta n'wi lava emananga.

⁴Davhida a rhuma tinhlori, kutani a tiva leswaku Sawulo u fikele kunene.

⁵Kavaloko Davhida a suka a ya laha Sawulo a goveke kona Davhida a vona ndhawu leyi Sawulo e etleleke ka yona na Abinere, n'wana Neri, ndhuna ya nyimpi ya yena. Sawulo a a etlele exikarhi ka tigolonyi, kutani tiko a ri govile ematlhelweni hinkwawo ya yena.

⁶Kutani Davhida a vulavula na Ahimeleke, Muhiti, na Abixayi, n'wana Seruya makwa Yowabu, a ku eka vona: “I mani la nga ta xikela na mina eka Sawulo emagoveleni?” Abixayi a ku: “Mina, ndzi ta famba na wena.”

⁷Kavaloko Davhida na Abixayi va ya fika nivusiku ekusuhi ni nyimpi, kutani maswivo, Sawulo a etlele vurhongo exikarhi ka tigolonyi, kambe tlhari ra yena ri dzimiwile ehansi evuseketelweni bya yena. Kambe Abinere ni vanhu va tiko a va etlele ematlhelweni ya yena.

⁸Abixayi a ku eka Davhida: “Namuntlha Xikwembu xi nyiketile nala wa wena evokweni ra wena; sweswi ndzi pfumelele ndzi n'wi tlhava hi tlhari, ndzi n'wi bela ehansi kan'we; a ndzi nga ha bi ra vumbirhi.”

⁹Davhida a ku eka Abixayi: “U nga tshuki u n'wi dlaya, hikuva i mani la nga ta tlakusa voko ehenhla ka muhlawuriwa wa Yehovha, a nga vi na nandzu xana?”

¹⁰Davhida a ku: “Yehovha wa hanya! I Yehovha ntsena a nga ta n'wi ba, hambi siku ra ku fa ka yena ri fika, kumbe loko a ya eku lweni a dlawa kona!

¹¹Yehovha a a ndzi sivele ku tlakusa voko ra mina ehenhla ka muhlawuriwa wa Yehovha! Sweswi, teka tlhari leri nga evuseketelweni bya yena, ni nghotsa ya mati, kutani hi suka hi famba.”

¹²Davhida a teka tlhari ni nghotsa evuseketelweni bya Sawulo, kutani va famba. Kambe a va voniwanga hi munhu ni ku tiviwa; a ku pfukanga na un'we, hikuva a va etlele hinkwavo; Yehovha a a va etlerisile hi vurhongo lebyo tika.

¹³Davhida a pelela etlhelo rin'wana, kutani a yima enhlohlorhini ya ntshava a ri kule; mpfhuka lowo leha wu ri exikarhi ka vona.

¹⁴Kutani Davhida a huwelela eka nyimpi ni ka Abinere, n'wana Neri, a ku: “Xana a ku hlamuli Abinere?” Kutani Abinere a hlamula a ku: “U mani, wena la huwelelaka eka hosi?”

¹⁵Davhida a ku eka Abinere: “A ku wanuna xana? I mani la fanaka na wena eIsraeleni xana? A ku hitekelanga hosi, mufumi wa wena xana? Hikuva un'wana wa tiko u tile ku ta dlaya hosi, n'wini wa wena.

¹⁶A hi swona leswi u swi endleke. Yehovha wa hanya! Mi fanekele hi rifu n'wina mi nga hitekelangiki n'wini wa n'wina, a nga muhlawuriwa wa Yehovha. Languta sweswi, ri kwihi tlhari ra hosi, ni nghotsa ya mati, leswi ngi swi ri evuseketelweni bya yena xana?”

¹⁷Sawulo a tiva rito ra Davhida, kutani a ku: “Xana a hi rito ra wena, n'wananga, Davhida?” Davhida a ku: “I rito ra mina, wee hosi, n'wini wanga.”

¹⁸A ku: “Xana hosi yanga yi hlongorisela yini sweswo nandza wa yena? Hikuva ndzi endle yini xana? Ku dyoha ku kwihi evokweni ra mina xana?

¹⁹Sweswi hosi yanga yi nga yingisa marito ya nandza wa yena! Loko a ri Yehovha la ku susumetaka ku ndzi hlongorisa, a a amukele mhamba! Kambe loko va ri vanhu, a va rhukaniwe emahlweni ka Yehovha, hikuva va ndzi hlongorile ku ndzi sivela ku hlangana ni ndzhaka ya Yehovha, va te: ‘Famba u ya tirhela swikwembu swin'wana!’

²⁰Sweswi, ngati ya mina yi nga tshuki yi wela ehansi kule ni mombo wa Yehovha; hikuva hosi ya Israele yi humile ku ya lava vutseka, kukotisa munhu loko a hlongorisa n'hwari etintshaveni.”

²¹Kavaloko Sawulo a ku: “Ndzi dyohile; tlhela, n'wananga Davhida, hikuva ndzi nga ka ndzi nga ku dyoheli, hikuva namuntlha vutomi bya mina a byi ri ni risima ngopfu emahlweni ka wena. Waswivo, ndzi endlile hi vuphukuphuku, ndzi ni nandzu lowukulu ngopfu.”

²²Davhida a hlamula, a ku: “Tlhari ra hosi hi leri; a ku te jaha rin'wana ra wena ri ta ri teka.

²³Yehovha u ta tlherisela un'wana ni un'wana hi vunene bya yena ni ku tshembeka ka yena, hikuva Yehovha a a ku vekile namuntlha emavokweni ya mina, kambe a ndzi rhandzanga ku tlakusa voko ra mina ehenhla ka muhlawuriwa wa Yehovha.

²⁴Waswivo, kukotisa leswi namuntlha vutomi bya wena a byi ri ni risima ngopfu emahlweni ka mina, vutomi bya mina byi ta va ni risima sweswo emahlweni ya Yehovha, kutani u ta ndzi ponisa emakhombyeni hinkwawo.”

²⁵Kutani Sawulo a ku eka Davhida: “A ku katekisiwe n'wananga, Davhida! Kunene u ta katekisiwa emitirhweni ya wena.”

²⁶Kutani Davhida a famba endleleni ya yena, kambe Sawulo a tlhelela ekaya ka yena.