Read tsonga I Samuwele 28 Bible Online

I Samuwele 28 - tsonga bible

I Samuwele 28

¹Emasikwini lawa, Vafilista va hlengeleta tinyimpi ta vona ku ya pfuka Vaisraele. Kavaloko Akixi a ku eka Davhida: “Wa swi tiva leswaku ndzi ta huma na wena ku ya emixaxeni ni vanhu va wena.”

²Davhida a ku eka Akixi: “U ta vonisisa leswi nga ta endliwa hi nandza wa wena.” Kutani Akixi a ku eka Davhida: “Hi swona, ndzi ta ku veka mulanguteri wa nhloko ya mina hi masiku.”

³Samiele a a file, kutani Vaisraele hinkwavo a va n'wi rila; a va n'wi lahlile eRhama, emutini wa yena. Kambe Sawulo a a susile lava vitanaka vafi, ni vangoma, etikweni.

⁴Kutani Vafilista va hlengeletana, va ya gova eXuneme. Kutani Sawulo a hlengeleta Vaisraele hinkwavo, va ta gova eGilibowa.

⁵Sawulo a vona magovela ya Vafilista, kutani a chava, mbilu ya yena yi rhurhumela ngopfu.

⁶Sawulo a vutisa Yehovha, kambe Yehovha a nga n'wi hlamulanga nchumu, hambi ku ri milorhweni, hambi hi Urimi, hambi hi vaprofeta.

⁷Sawulo a ku eka malandza ya yena: “Ndzi laveleni wansati la tivaka ku vitana vafi, ndzi ta ya eka yena, ndzi n'wi vutisa.” Malandza ya yena ma ku eka yena: “Emutini wa Eni-Dori, ku ni wansati la tivaka ku vitana vafi.”

⁸Kutani Sawulo a tihundzula munhu un'wana, a ambala tinguvu tin'wana, a famba ni vanhu vambirhi. Va ya fika nivusiku eka wansati. Kutani Sawulo a ku: “Wa nga ndzi hlahluvela, hi ku vitana vafi, u ndzi vitanela loyi ndzi nga ta ku byela.”

⁹Wansati a ku eka yena: “Waswivo, wa tiva leswi endliweke hi Sawulo, hi laha a heriseke etikweni lava vitanaka vafi, ni vangoma, u ndzi vekela yini rindzi ku ndzi dlaya xana?”

¹⁰Kutani Sawulo a n'wi hlambanyela hi Yehovha, a ku: “Yehovha wa hanya! Ku nga ka ku nga ku humeleli ku biha emhakeni leyi.”

¹¹Kutani wansati a ku: “Ndzi ta ku vitanela mani-ke?” A ku: “Ndzi vitanele Samiele.”

¹²Kuteloko wansati a vona Samiele, a ba huwa leyikulu, kutani wansati a ku eka Sawulo: “U ndzi kanganyisele yini-ke? Hi wena Sawulo!”

¹³Hosi yi ku eka yena: “U nga tshuki u chava! Kambe u vona yini xana?” Wansati a ku eka Sawulo: “Ndza vona xikwembu xin'wana lexi tlhandlukaka xi huma emisaveni.”

¹⁴Sawulo a ku eka yena: “Xivumbeko xa xona i xini xana?” A hlamula, a ku: “I nkulukumba la humaka, u ambele nguvu leyo leha.” Sawulo a tiva leswaku i Samiele, kutani a korhamela hansi hi mombo, a khinsama.

¹⁵Samiele a ku eka Sawulo: “U ndzi pfuxele yini hi ku ndzi tlhandlukisa xana?” Sawulo a ku: “Ndzi le khombyeni lerikulu, hikuva Vafilista va lwa na mina, kambe Xikwembu xi sukile eka mina, a xa ha ndzi hlamuli, hambi ku ri hi vaprofeta, hambi hi milorho. Kutani ndzi ku vitanile leswaku u ndzi tivisa leswi ndzi fanelaka ku swi endla.”

¹⁶Samiele a ku: “U ndzi vutisela yini leswi Yehovha a ku sukeleke a hundzuke nala wa wena?

¹⁷Yehovha u endlile hilaha a vuleke hakona ha mina; Yehovha u handzurile vuhosi bya wena u byi nyikile warikwenu, Davhida.

¹⁸Hikuva a ku yingisangi rito ra Yehovha, a ku endlelanga Amaleke hi ku avanyisiwa ka vukari bya yena hikwalaho ka mhaka leyi, Yehovha u ku endlele sweswo namuntlha.

¹⁹Na swona Yehovha u ta nyiketa Israele na wena emavokweni ya Vafilista; kutani mundzuku, wena ni vana va wena mi ta va na mina. Yehovha u ta nyiketa ni mixaxa ya Israele emavokweni ya Vafilista.”

²⁰Kutani hi nomu lowu, Sawulo a wa ehansi hi xiyimo xa yena hinkwaxo, hikuva marito ya Samiele ma n'wi chavisile ngopfu, na swona a ku nga ha vanga na matimba eka yena, hikuva a nga dyanga nchumu siku hinkwaro ni vusiku hinkwabyo.

²¹Wansati a ta eka Sawulo, kutani a vona leswaku a chava ngopfu, a ku eka yena: “Waswivo, nandza wa wena u yingisile rito ra wena, kambe ndzi vekile vutomi bya mina exandleni xa mina, ndzi yingisile marito lawa u ndzi byeleke wona.

²²Kambe sweswi, wanga yingisa, na wena, rito ra nandza wa wena; u ndzi pfumelela ku veka emahlweni ka wena xipandzwa xa vuswa, u dya, u ta kuma matimba ku famba endleleni ya wena.”

²³Kambe a ala, a ku: “Ndzi nga ka ndzi nga dyi.” Kambe malandza ya yena ni wansati va n'wi sindzisa, kutani a yingisa rito ra vona, a pfuka a tshamisa esangwini.

²⁴Wansati a a ri ni rhole leri noneke; kutani a hatlisa a ri tlhava, a teka ni mapa a ma pfuva, a sweka swinkwa leswi nga riki na comela.

²⁵A swi tisa emahlweni ka Sawulo ni le mahlweni ka malandza ya yena, va dya; kutani va pfuka va famba vusiku byebyo.