Read tsonga I Samuwele 3 Bible Online

I Samuwele 3 - tsonga bible

I Samuwele 3

¹Wandzisanyana Samiele a a tirhela Yehovha emahlweni ka Heli. Kambe rito ra Yehovha a ri kala emasikwini lawa; ni mahlori ma nga talanga.

²Rin'wana siku, loko Heli a etlele endlwini ya yena, kambe mahlo ya yena ma sungurile ku phumela, a nga ha voni,

³rivoningo ra Xikwembu loko ri nga si timeka, na yena Samiele a a etlela endlwini ya Yehovha, laha areka ya Xikwembu ingi yi ri kona;

⁴Yehovha a vitana Samiele. Yena a ku: “Hi mina loyi.”

⁵Kutani a tsutsuma, a ya eka Heli, a ku eka yena: “Hi mina loyi, hikuva u ndzi vitanile.” Heli a ku eka yena: “A ndzi ku vitananga; tlhela u ya etlela.” Kutani a ya etlela.

⁶Yehovha a vitana kambe Samiele; kutani Samiele a pfuka, a ya eka Heli, a ku eka yena: “Hi mina loyi, hikuva u ndzi vitanile.” Heli a ku eka yena: “A ndzi ku vitananga, n'wananga; famba u ya etlela.”

⁷A ku ri loko Samiele a a nga si tiva Yehovha, ni loko rito ra Yehovha ri nga si humelela eka yena.

⁸Yehovha a vitana kambe Samiele ra vunharhu. Kavaloko Samiele a pfuka, a ya eka Heli, a ku eka yena: “Hi mina loyi, hikuva u ndzi vitanile.” Heli a twisisa leswaku Yehovha a a vitana wandzisanyana.

⁹Kutani Heli a ku eka Samiele: “Famba u ya etlela. Kutakuloko u vitaniwa, u ta ku: ‘Vulavula, Yehovha, hikuva nandza wa wena wa yingisa.’ ” Kutani Samiele a famba a ya etlela endhawini ya yena.

¹⁰Kutani Yehovha a ta, a yima, a vitana kambe kukotisa eku sunguleni, a ku: “Samiele, Samiele!” Kutani Samiele a ku: “Vulavula, hikuva nandza wa wena wa yingisa.”

¹¹Kavaloko Yehovha a ku eka Samiele: “Waswivo, ndzi ta endla eIsraeleni mhaka leyi; kutakuloko munhu a yi twa, tindleve ta yena ti ta pfuma.

¹²Hi siku lero ndzi ta hetisa henhla ka Heli hinkwaswo leswi ndzi swi vuleke hikwalaho ka yindlu ya yena; ndzi ta sungula, ndzi va ndzi heta.

¹³Ndzi n'wi byerile leswaku ndzi ta avanyisa yindlu ya yena hilaha ku nga heriki hikwalaho ka xidyoho lexi a xi tivaka. Hikuva vana va yena va tilavele ndzhukano ehenhla ka vona, kambe a nga va layanga.

¹⁴Hikwalaho ndzi hlambanyile ehenhla ka yindlu ya Heli leswaku ku dyoha ka yindlu ya Heli ku nga ka ku nga hlanguriwi, hambi hi magandzelo, hambi hi mihlengo hi masiku.”

¹⁵Samiele a etlela ku fika nimixo; kutani a pfula tinyangwa ta yindlu ya Yehovha; kambe Samiele a a chava ku ya byela Heli mahlori.

¹⁶Kambe Heli a vitana Samiele, a ku: “Samiele, n'wananga!” A ku: “Hi mina loyi.”

¹⁷Heli a ku: “Yehovha u ku byele rito rihi Xana? U nga ndzi fihleli nchumu. Xikwembu a xi ku endlise hi matimba ni ku engetela, loko u ndzi fihlela rito rin'we ra hinkwaswo leswi xi ku byeleke swona!”

¹⁸Kavaloko Samiele a n'wi byela hinkwaswo, a nga n'wi fihlelanga nchumu, Kutani Heli a ku: “Yehovha; a a endle hi ku twisisa ka yena.”

¹⁹Samiele a a kula, kutani Yehovha a a ri na yena; kambe a nga tshikanga rito rin'we ra marito hinkwawo ya yena ri wa ehansi.

²⁰Kutani Vaisraele hinkwavo, ku suka eDani ku fika eBerexeba, va tiva leswaku Samiele a vekiwile muprofeta wa Yehovha.

²¹Yehovha a tshama a humelela eXilo; hikuva Yehovha a a tihlavutela eka Samiele eXilo, hi rito ra Yehovha. Kutani rito ra Samiele ri tshama ri yisiwa eka Vaisraele hinkwavo.